ⵉⵅⴼ ⵏ ⵡⴰⵡⵡⵓⴽ, ⵓⵏⴳⴰⵍ ⵏ ⵎⵓⵃⵎⵎⴰⴷ ⵓⵙⵓⵙ
ⵢⵓⵙⵉ ⵡⵓⵏⴳⴰⵍ, "ⵉⵅⴼ ⵏ ⵡⴰⵡⵡⵓⴽ" ⵏ ⵎⵓⵃⵎⵎⴰⴷ ⵓⵙⵓⵙ, ⴳ ⵜⵓⵎⴰⵢⵜ ⵏⵏⵙ ⵢⴰⵜ ⵜⵓⵍⵍⵉⵙⵜ ⵉⴳⴰⵏ ⵡⴰⵥ! ⵜⵓⵍⵍⵉⵙⵜ ⵉⵜⵜⴳⵯⵏⴰⵏ ⵙ ⵢⵉⵍⵙ ⵉⴼⵔⵙⵏ, ⵉⴱⵖⵔⵏ ⴷ ⵡⵓⵍ ⵉⴱⵙⵓⵙⴰⵏ; ⵉⵙⵎⴷ ⴰⵙ ⵓⵙⵡⵉⵏⴳⵎ ⵢⴰⵜⵜⵓⵢⵏ ⵜⵉⵥⵉⵍⵜ ⵅⴼ ⵜⴰⵢⵢⴰⴹ. ⵜⵓⵚⴽⵉⵡⵜ ⵜⴰⵎⴰⵍⵍⴰⵙⵜ ⵏ ⵡⵓⵏⴳⴰⵍ ⴰⴷ ⵜⵍⵍⴰ ⴳⵔ ⵜⴰⵜⵔⴰⵔⴰ ⴷ ⴹⴰⵕⵜ ⵜⴰⵜⵔⴰⵔⴰ, ⵍⵍⵉⴳ ⵜⵓⵙⵉ ⴳ ⵜⵓⵎⴰⵢⵜ ⵏⵏⵙ ⴰⵔⵔⴰⵜⵏ ⵢⴰⴹⵏⵉⵏ ⵙ ⵡⴰⵏⴰⵡⵏ ⵏⵏⵙ ⵉⵎⵏⵏⴰⵡⵏ (ⵜⵉⵔⵔⴰ ⵏ ⵜⵏⴰⵔⵙⵉⵙⵜ).
ⵓⵚⴽⴰ ⵓⵎⴰⵔⴰ ⵏ ⵡⵓⵏⴳⴰⵍ ⴰⴷ ⴰⵔⵔⴰ ⵏⵏⵙ ⵙ ⴽⴽⵓⵥ ⵉⵙⴽⵯⴼⴰⵍ ⴳ ⵔⴰⴷ ⵏⵏ ⵢⴰⴼ ⵢⵉⵎⵖⵔⵉ ⵉⵣⴷⴷⵓⵢⵏ ⵜⵜⵢⴰⵙⴰⵙⵏⵉⵏ ⴳⵔ ⵜⵡⵊⴰ ⵏ ⵡⴰⵡⵡⵓⴽ, ⵏⵜⵜⴰⵏ ⵏⵉⵜ ⵍⵍⵉ ⵉⴳⴰⵏ ⴰⴼⴳⴰⵏ ⵓⵏⵥⵉⵥ, ⵉⵣⴷⴳ ⵡⵓⵍ ⵏⵏⵙ ⴷ ⵓⵔ ⵉⵃⵎⵍ ⵜⵉⴽⵏⵏⴰⴷ... ⴳ ⵓⵎⵏⴰⴷ, ⵉⵍⵍⴰ ⴳⵯⵎⴰⵙ ⵉⵖⵉⵔⴷⵎ ⵍⵍⵉ ⵜ ⵓⵔ ⵉⵔⵡⴰⵙⵏ ⴳ ⵉⵎⵥⵎⵍⴰⵍ ⴷ ⵉⵙⴽⴽⵉⵔⵏ ⵏⵏⵙ, ⵎⴽⵍⵍⵉ ⵉⵍⵍⴰ ⴱⴰⴱⴰⵜⵙⵏ ⵍⵍⵉ ⵉⴳⴰⵏ ⵢⴰⵏ ⵓⵔⴳⴰⵣ ⴷ ⵉⵜⵜⴱⴱⵉⵏ ⴰⵖⵔⵓⵎ ⵉ ⵜⵡⵊⴰ ⵏⵏⵙ ⴳ ⵡⴰⵔⵔⴰⵙ ⴷ ⵓⵙⵉⴳⴳⵍ ⴳ ⵡⴰⵔⵔⴰⵙ ⵍⵍⵉ ⵙ ⵏⵏ ⴳⵔⵏ ⵎⵉⴷⴷⵏ. ⵜⵓⴳⵜ ⵏ ⵉⵎⵓⴽⵔⵉⵙⵏ ⵔⴰⴷ ⵙⴰⵔⵏ ⵉ "ⵡⴰⵡⵡⵓⴽ" ⵙ ⵓⵙⵔⴰⴳ ⵏ ⵡⴰⵔⵔⴰⵙ ⵍⵍⵉ ⴳ ⵛⵜⵜⴰⵏ ⵜⵉⵔⴰⵎ ⵏⵏⵙⵏ - ⵙⵍⴰⵡⴰⵏ ⴰⴽⴽⵯ ⵍⵍⵉⴳ ⴱⴷⴷⴰ ⴳⵉⵙⵏ ⵉⵍⵍⴰ ⵓⵚⵕⴰⴱ- ⵔⴰⴷ ⵉⴳⵓⵜⵏ ⵉⵎⵓⴽⵔⵉⵙⵏ, ⵣⵓⵏ ⴷ ⴰⵣⴷⴷⵓⵢ ⵜⴰⵖⴰⵔⴰ ⵏ ⵓⵣⴷⴷⵓⵢ ⵏ ⴱⴰⴱⴰⵙ ⴷ ⵎⴰⵙ ⴷ ⵜⵉⴷⵜ ⵏ ⵜⵍⴰⵍⵉⵜ ⵏⵏⵙ ⴷ ⵜⴷⵢⴰⵏⵜ ⵍⵍⵉ ⴰⵙ ⵉⵙⴰⵔⵏ ⴳ ⵜⵉⵏⵎⵍ ⵍⵍⵉⴳ ⵉⵙⵙⴼⴹ ⵙ ⵓⵛⵏⵢⴰⵍ ⴰⵏⴰⵎⵓⵔ ⵍⵍⵉⴳ ⵜ ⵉⴽⴽⴰ ⵓⵚⵕⴰⴱ...
ⴰⵏⵓⵃⵢⵓ ⴳ ⵜⵖⴰⵔⴰ ⵜⴰⵏⴼⴳⴰⵏⵜ ⴰⵔ ⵜⴻⵜⵜⴰⵊⵊⴰ ⵙⵉⵏ ⵡⴰⵢⵜⵎⴰⵜⵏ ⴰⴷ ⴼⵍⵍⴰⵙⵏ ⵜⵉⵏⵉⵜ ⵉⵙ ⴷ ⵓⵔ ⴽⴽⵉⵏ ⵢⴰⵏ ⵓⵙⵉⵔⵡ, ⵉⴳ ⵏⵥⵕⴰ ⴰⵙⴽⴽⵉⵔ ⵏ ⵉⵖⵉⵔⴷⵎ ⵍⵍⵉ ⵉⵔⴰⵏ ⴰⴷ ⴰⵙ ⴰⵇⵇⵔⴰⵏ ⵎⵉⴷⴷⵏ ⵙ “ⵍⵃⴰⵊⵊ ⵎⴱⴰⵔⴽ” ⵙ ⵛⵛⵉⵍ, ⵉⴳ ⴱⵓ ⵜⵙⵓⵏⵉⵡⵉⵏ ⵏⵉⵖ ⴱⵓ ⵡⵓⴷⵎⴰⵡⵏ ⵉⵎⵏⵏⴰⵡⵏ ⵜⵜⵏⴼⴰⵍⵏⵉⵏ. ⵜⴰⵏⴼⵍⵉⵜ ⵏ ⵜⵓⵍⵍⵉⵙⵜ ⵏ ⵡⵓⵏⴳⴰⵍ ⵔⴰⴷ ⵜⵙⵎⵉⵇⵇⵉⵔ ⵎⵓⵙⴰ ⴰⴼⵕⵢⴰⴹ ⴰⵎⵙⴳⵏⴰⴼ ⴰⵏⵢⵉⵎⴰⵏ ⴷ ⵡⴰⵡⵡⵓⴽ, ⵉⵍⵎⵎⴰ ⵢⵉⵍⵉ ⵢⴰⵏ ⵓⵎⵢⴰⵙⵙⴰ ⵉⴷⵔⴰⵏ ⴳⵔⴰⵜⵙⵏ... ⵔⴰⴷ ⵉⵍⵎⵎⴰ ⵢⵉⵡⵔⵔⵉ ⵓⵎⴰⴹⵓⵏ ⴰⵏⵢⵉⵎⴰⵏ ⵏⵉⵖ ⴷ ⴰⵎⴰⴹⵓⵏ ⵏ ⵓⵏⵍⵍⵉ "ⴰⵡⵡⵓⴽ" ⴰⴷ ⵉⵣⵣⵔⴰⵢ ⵉ ⵡⴰⴷⴷⴰⴷ ⴰⵏⵢⵉⵎⴰⵏ ⵏ ⵓⵎⵙⴳⵏⴰⴼ ⴰⵏⵢⵉⵎⴰⵏ, ⵢⴰⴼ ⵏⵏ ⵓⵎⵙⴳⵏⴰⴼ ⵉⵙ ⵉⵜⵜⴰⴹⵏ ⵙ ⵜⵢⵔⵙⵉⵏ ⵓⴳⴳⴰⵔ ⵏ ⵓⵎⴰⴹⵓⵏ ⵉⵜⵜⵓⴽⵔⴰⴼⵏ ⵙ ⵉⴱⵏⵉⵇⵏ ⵏ ⵓⵙⴳⵏⴰⴼ, ⵙ ⵉⵍⴳⴰⵎⵏ ⵏⵏⵙ ⵉⵙⴳⵏⴰⴼⵏ, ⵙ ⵡⵉⵍⵍⵉ ⵉⵙⵔⵙ ⵓⵏⵓⴼⵍ ⵏ ⵓⴼⴳⴰⵏ ⴰⴼⴰⴷ ⴰⴷ ⵉⵙⵡⵓⵜⵜⵓ ⴰⵏⵓⴼⵍ ⵍⵍⵉ ⵉⵥⵕⵕⴰ ⵙ ⵜⵉⵟⵟ ⵏ ⵢⵉⵚⵉⴹ.
ⵓⵏⴳⴰⵍ ⴰⴷ ⵉⴳⴳⵔ ⵏⵏ ⵉ ⵜⵓⴳⵜ ⵏ ⵉⵙⴽⴽⵉⵏⵏ ⵏ ⵜⴰⵍⵍⴰ ⵜⴰⵏⴼⴳⴰⵏⵜ, ⵜⵉⵍⵍⵉ ⵣⴷⵉⵏⵉⵏ ⴷ ⵓⵙⵡⵉⵏⴳⵎ ⴷ ⵜⵉⵢⵢⴰⴹ ⵣⴷⵉⵏⵜ ⴷ ⵓⵙⴽⴽⵉⵔ, ⵢⴰⵏ ⵙⴳ ⵉⵙⴽⴽⵉⵏⵏ ⴰⴷ, ⵜⴳⴰ ⵜ ⵜⵙⵙⵓⵎⴳⴰ, ⴰⵢⴰⴷ ⴰⵔ ⵜ ⵎⵎⴰⵍⵏ ⵉⴼⵔⵉⵙⵏ ⵏ ⵓⵥⵕⵓ ⵍⵍⵉ ⴳⴰⵏⵉⵏ ⵉⵡⵔⵉⴽⵏ ⴳ ⵡⵓⵏⴳⴰⵍ ⴳ ⵢⴰⵏ ⵙⴳ ⵉⵎⴰⴹⴰⵍⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵍⵍⵉ ⵎⵎⵕⵥⴰⵏ ⴳⵔⴰⵜⵙⵏ, ⴳⵉⵏ ⴰⴽⵕⴽⵓⵕ ⵍⵍⵉ ⵙⵓⵍ ⵓⵔ ⵉⵣⵎⵔⵏ ⴰⴷ ⴼⵍⵙⵏ ⵉⵙ ⵉⵎⵎⵓⵜ ⵡⴰⴽⵓⵛ ⵏⵏⵙⵏ (ⴰⵏⴰⵥⵓⵕ ⵍⵍⵉ ⵜⵏ ⵉⵙⴽⵔⵏ). ⵎⴽⵍⵍⵉ ⵢⵓⵎⴰ ⵡⵓⵏⴳⴰⵍ ⵉⵙⴽⴽⵉⵏⵏ ⵢⴰⴹⵏⵉⵏ ⵣⵓⵏ ⴷ ⵡⵉⵏ ⵜⵎⴰⵙⵙⴰⵏⵉⵏ ⵍⵍⵉⴳ ⵉⵙⵙⵎⵔⵙ ⵓⵎⴰⵔⴰ ⵜⵓⵎⴰⵏⵜ ⵏ ⵉⵛⵏⴱⴰ ⵉⴱⵔⴽⴰⵏⵏ ⵙ ⵢⴰⵜ ⵜⵖⴰⵔⵙⵜ ⵉⴼⵓⵍⴽⵉⵏ ⴷ ⵉⴽⴽⵔⵣⵏ ⴰⴱⵀⴰⴹ ⴳ ⵉⵎⴰⵏ ⵏ ⵢⵉⵎⵖⵔⵉ, ⴷ ⵙ ⵜⵎⴰⵎⴽⵜ ⵍⵍⵉ ⵙ ⵉⵙⵙⵏⵥⵉ ⵜⴰⴱⵔⵉⴷⵜ ⵜⴰⵎⴰⵍⵍⴰⵙⵜ ⵍⵍⵉ ⵙ ⵉⵜⵜⵓⵙⵎⵔⴰⵙ ⴳ ⵓⴹⵕⵉⵚ.
ⵜⴰⴳⴰⵔⴰ ⵏ ⵡⵓⵏⴳⴰⵍ ⵔⴰⴷ ⵜⵙⵙⴱⵀⴹ ⵉⵎⵖⵔⵉ ⵙ ⵜⵓⵎⴰⵢⵜ ⵏⵏⵙ ⵉⴳⴰⵏ ⵜⴰⵎⵏⵏⴰⵡⵜ ⴷ ⵜⴰⵍⵍⵉ ⵉⵜⵜⴰⵡⵉⵏ ⵙ ⵓⴳⴳⴰⵔ ⵏ ⵢⴰⵏ ⵓⵙⴷⵔⵎ ⵍⵍⵉ ⵔⴰⴷ ⴽ ⵏⵉⵜ ⴷⴰⵖ ⵉⵙⵙⴽⵛⵎ ⵙ ⵡⵓⵔⵜⵉ ⵢⴰⴹⵏ ⴳ ⵔⴰⴷ ⵜⵙⵉⴳⴳⵉⵍⵜ ⴰⵙⴷⵡⵍ ⵏ ⵉⵡⵔⵉⴽⵏ ⴷ ⵓⵙⵎⴰⵔ ⵏ ⵜⵓⵍⵍⵉⵙⵜ ⵏⵏⵙⵏ. ⵙ ⵓⵏⴰⵎⴽ ⵢⴰⴹⵏ, ⴰⵎⴰⵔⴰ ⵏ ⵡⵓⵏⴳⴰⵍ ⴰⴷ ⵉⴳⴰ ⵉ ⵡⵓⵏⴳⴰⵍ ⵏⵏⵙ ⵓⴳⴳⴰⵔ ⵏ ⵢⴰⵜ ⵜⴳⴰⵔⴰ; ⴰⵢⵍⵍⵉ ⵔⴰⴷ ⵢⴰⵊⵊ ⵉⵎⵖⵔⵉ ⴰⴷ ⵉⵙⵜⵉ ⵜⴰⴳⴰⵔⴰ ⵏⵏⴰ ⵉⵎⵙⴰⵙⴰⵏ ⴷ ⵓⵙⵢⴰⴼⴰ ⵏⵏⵙ ⴷ ⴰⴷ ⵜ ⵓⵔ ⵉⴱⴹⵍ ⵓⵣⴷⴷⵓⵢ ⴰⵏⵏ ⴷⴰ ⵉⵙⴽⵔ ⴷ ⵉⵡⵔⵉⴽⵏ ⴷ ⵉⵎⵓⴽⵔⵉⵙⵏ ⵏⵏⵙⵏ, ⵙⵍⴰⵡⴰⵏ ⴰⴽⴽⵯ ⵉⴳ ⴰⵙⵏ ⵉⴼⴽⴰ ⵉⵍⵍⵉ ⵉⴱⵙⵓⵙⴰⵏ ⴳ ⵡⵓⵍ ⵏⵏⵙ.
ⵚⴰⵍⵃ ⴰⵢⵜ ⵚⴰⵍⵃ
