ⵉⵏⴰⴽⵓⴼⵏ, ⵓⵏⴳⴰⵍ ⵏ ⵎⵓⵃⵎⵎⴰⴷ ⵓⵙⵓⵙ
ⵉⴳⴰ ⵡⵓⵏⴳⴰⵍ "ⵉⵏⴰⴽⵓⴼⵏ" ⵙⴳ ⵡⵓⴷⵎ ⴰⵜⵔⴰⵔ ⵏ ⵡⵓⵏⴳⴰⵍⵏ ⴳ ⵜⵙⴽⵍⴰ ⵜⴰⵎⴰⴹⵍⴰⵏⵜ, ⵉⴱⴱⵉ ⴳⵉⵙ ⵓⵎⴰⵔⴰ ⴷ ⵜⵖⴰⵔⴰⵙⵜ ⵜⴰⴽⵍⵚⴰⴽⵜ ⵍⵍⵉ ⵙ ⵢⴰⴷⵍⵍⵉ ⵉⵜⵜⵡⴰⵙⵙⵏ ⵡⵓⵏⴳⴰⵍ ⵎⵏⵛⴽ ⴰⵢⴰⴷ. ⵜⵉⴳⴰⵔⵉⵡⵉⵏ ⴰⴷ, ⵙⵏⴼⵍⵏ ⵉⵎⵏⴳⴰⵍⵏ ⵜⴰⵖⴰⵔⴰⵙⵜ ⴷ ⵜⵓⵚⴽⴰ ⵏ ⵜⵎⵙⴰⵔⵉⵏ, ⵕⵥⵏ ⵉⵣⵎⴰⵣ, ⵙⵏⴼⵍⵓⵍⵏ ⵉⵎⴰⵍⵍⴰⵙⵏ...
ⵉⵏⴰⴽⵓⴼⵏ, ⵉⴳⴰ ⵢⴰⵜ ⵜⵓⴳⴳⴰ ⵏ ⵢⴰⵏ ⵡⴰⵡⵡⴰⴼ, ⵉⴼⴽⴰ ⵜⵜ ⵜⵉⵣⵉ ⵍⵍⵉ ⵏⵏ ⵉⵥⵕⴰ ⴽⵔⴰ ⵏ ⵉⴹⴰⴳⴳⵯⵏ ⴷ ⵉⵥⵉⵍⵍⵉⴹⵏ ⵍⵍⵉ ⴳ ⵓⵔ ⵜⵍⵍⵉ ⵜⵓⵔⴷⴰ ⵉⵙ ⵔⴰⴷ ⵙⵙⵓⴽⴼⵏ ⴰⵡⵡⴰⴼ ⴰⵏⵏ, ⴳⵏ ⵜⵉⴳⵉⵔⴰ ⵉ ⵜⵓⴷⵔⵜ ⵏⵏⵙ, ⵓⴽⴰⵏ, ⵓⵔ ⵜⴰ ⴷ ⵍⴽⵉⵎⵏ, ⵢⵓⴳⵉ ⴰⵎⵔ ⴰⴷ ⵉⴼⴽ ⵜⵓⴳⴳⴰ ⵏⵏⵙ ⴷ ⵓⵢⵍⵍⵉ ⴰⴽⴽⵯ ⵉⵙⵙⵏ ⴷ ⵜⵓⴼⵔⴰⵢⵉⵏ ⵏⵏⵙ, ⵓⴽⴰⵏ ⴰⵍⵍⴰⵙ ⵏ ⵡⵓⵏⴳⴰⵍ ⴰⴷ ⴳ ⵜⵉⵍⴰⵡⵜ ⵓⵔ ⵏⵏ ⵜⵣⵔⵉ 20 ⵏ ⵜⵓⵙⴷⵉⴷⵉⵏ ⴰⵔ ⵢⴰⵜ ⵜⵙⵔⴰⴳⵜ, ⴰⵏⵛⴽ ⵍⵍⵉ ⵅⴼ ⵔⴰⴷ ⴷ ⵍⴽⵎⵏ ⵉⵥⵉⵍⵍⵉⴹⵏ ⴰⵡⵡⴰⴼ ⴰⵏⵏ (ⴰⵢⴰⴷ ⵢⵉⵡⵉ ⵜ ⵉⴷ ⵎⴰⵙⵙ ⵍⵃⵙⵏ ⵣⴰⵀⵓⵔ).
ⵉⵙⵜⵉ ⵓⵎⵏⴳⴰⵍ ⴰⵎⴰⵍⵍⴰⵙ ⵍⵍⵉ ⵓⵔ ⵉⴳⵉⵏ ⴰⴼⴳⴰⵏ, ⴰⵡⵡⴰⴼ, ⴰⵡⵡⴰⴼ ⴰⴷ, ⵎⵇⵇⴰⵔ ⵉⴳⵔⵙ ⴳ ⵓⴷⵖⴰⵔ ⵏⵏⵙ, ⵉⵣⵎⵔ ⴰⴷ ⵉⵙⵙⵏ ⴰⵎⵣⵔⵓⵢ ⴷ ⵜⵉⵍⴰⵡⵜ ⴷ ⵢⵉⵎⴰⵍ ⵏ ⴰⵢⵜ ⵓⵃⵛⵎⵓⴹ (ⵓⵙⵓⵏ ⵍⵍⵉ ⴳ ⵙⴰⵔⵏⵜ ⵜⵎⵙⴰⵔⵉⵏ), ⴰⵔ ⴷ ⵉⵜⵜⴰⵡⵉ ⵉⵏⵖⵎⵉⵙⵏ ⵙ ⵓⵢⵍⵍⵉ ⵏⵉⵜ ⵉⵥⵕⵕⴰ ⵏⵉⵖ ⴷ ⴰⵢⵍⵍⵉ ⴰⵙ ⵜⵜⴰⵍⵙⵏ ⵉⴳⴹⴰⴹ ⴷⴰ ⴷ ⵉⴷⴷⵓⴽⴽⵍ ⵎⵇⵇⴰⵔ ⵉⵜⵜⵡⴰⵙⴽⴰⵔ ⴰⴷ ⵜⵏ ⵉⵙⵙⵉⵡⵉⴷ. ⴰⵔ ⵉⵙⵢⴰⴼⴰ ⵓⵍⴰ ⵏⵜⵜⴰ, ⴰⵔ ⵉⵜⵜⴰⴼⵔⴰⵢ ⵣⵓⵏ ⴷ ⴰⴼⴳⴰⵏ.
ⴳ ⵜⴰⵏⵏⴰⵢⵜ ⵉⵏⵓ, ⴰⵔ ⵜⵜⴰⵏⵏⴰⵢⵖ ⵎⴰ ⵙ ⵉⴳⴰ ⵡⵓⵏⴳⴰⵍ ⴰⴷ ⵢⴰⵏ ⵓⵣⴳⵣⵍ ⵏ ⵜⵓⴷⵔⵜ ⵏ ⵜⵎⴰⵣⵉⵔⵜ ⵏⵏⵖ ⵏⵉⵖ ⴷ ⴰⴽⴽⵯ ⵜⴰⵎⴰⵣⵖⴰ, ⵜⴷⴷⵔ ⵢⴰⴷⵍⵍⵉ ⴳ ⵓⴼⵔⴰ ⴷ ⵓⵙⵢⵢⴰ ⴷ ⵜⴰⵢⵔⵉ, ⵉⵎⵉⴽⴽ ⴽⵛⵎⵏ ⵜⵜ ⵉⴷ ⵉⴱⵕⵕⴰⵏⵉⵢⵏ ⵙ ⵜⵅⵏⴷⴰⵍⵍⴰⵙⵜ ⴷ ⵜⵎⵓⵜⵜⴰⵍ, ⵏⴱⴹⵏ ⴳ ⵜⵎⴰⵣⵉⵔⵜ ⴰⵏⵏ, ⴰⵢⵡⴰⵏ ⴰⵔ ⵙⵏⴼⴰⵍⵏ ⴰⵢⵍⵍⵉ ⴷ ⵓⴼⴰⵏ ⵙ ⵓⵢⵍⵍⵉ ⴷ ⵉⵡⵉⵏ, ⵙⵏⴼⵍⵏ ⵟⵟⴰⵍⴱ ⵙ ⵡⴰⵢⵢⴰⴹ ⵍⵍⵉ ⴰⵙⵏ ⵉⴳⵯⴷⵍⵏ ⵜⴰⵡⵓⵔⵉ ⵙ ⵓⵣⵔⴼ ⴷ ⵜⵎⵢⵓⵔⵉⵏ ⵏⵏⵙⵏ (ⴰⵃⵡⴰⵛ) ⴷ ⵜⵎⵢⵉⴷⵉⵔⵜ ⴷ ⵡⵓⴷⴰⵢⵏ ⴰⵢⵍⵍⵉⵖ ⴼⵔⴷⵏⵜ ⵜⴽⵚⵚⴰⴹ ⴷ ⵜⵍⴽⴽⴰⵡⵜ ⴳ ⴰⵢⵜ ⵜⵎⴰⵣⵉⵔⵜ, ⴰⴷⵔⵏ ⵉ ⵢⵉⵅⴼ ... ⵍⵍⵉⵖ ⵜⵎⵎⵓⵜ ⵜⵔⵔⵓⴳⵣⴰ ⴳ ⴰⵢⵜ ⵓⵃⵛⵎⵓⴹ, ⵉⴼⵍ ⵜⵏ ⵡⵉⵏⵥⴰⵕ, ⵉⴷⴷⵓ ⵙ ⵢⴰⵏ ⵢⵉⴼⵔⵉ ⵉⴷⴷⵔ ⴳⵉⵙ ⴷ ⵉⴱⴱⴰ ⴽⵎⵎⵓⵙ (ⵜⴰⵎⵖⴰⵔⵜ ⵉⵔⵡⴰⵙⵏ ⵜⴰⵖⵥⵏⵜ), ⵜⴼⵔⴷ ⵉⵍⵎⵎⴰ ⵜⵡⴽⴽⴰ ⴳ ⵡⵓⵙⵓⵏ, ⴰⵢⵍⵍⵉⵖ ⵜⵍⴽⵎ ⵜⵉⵙⵏⵜ ⵏⵏⵙⵏ. ⴳ ⵜⴳⵉⵔⴰ, ⵓⵛⴽⴰⵏ ⴷ ⴽⵔⴰ ⵏ ⵉⴳⴰⵢⵡⴰⵔⵏ (ⵉⵙⵏⵙⵍⵎⵏ) ⵔⴰⴷ ⴷ ⵙⵎⴷⵏ ⵉⵍⵎⵎⴰ ⵉ ⵡⵓⵙⵓⵏ ⵎⴰ ⴰⴷ ⵉⵅⵚⵚⴰⵏ, ⵉⵔⵉⵏ ⴰⴷ ⵜⵜⵏⴱⴰⴹⵏ ⵓⵍⴰ ⵏⵜⵜⵏⵉ. ⵜⴰⵎⵜⵜⴰⵏⵜ ⵏ ⴽⵎⵎⵓⵙ ⴷ ⵡⵉⵏⵥⴰⵕ ⵜⵍⴰ ⴰⴷⴷⵓⵔ, ⵜⵉⵏ ⵟⵟⴰⵍⴱ ⴷ ⵓⵎⵖⴰⵔ ⵜⴳⴰ ⴰⵙⵔⴳⵎ.
ⵉⴳⴳⵔ ⵏⵏ ⵓⵎⵏⴳⴰⵍ, ⵎⴰⵙⵙ ⵎⵓⵃⵎⵎⴰⴷ ⵓⵙⵓⵙ ⵉ ⵎⵏⵏⴰⵡ ⵉⵙⵏⵜⴰⵍ ⴳ ⵡⵓⵏⴳⴰⵍ ⴰⴷ, ⵉⵙⴰⵡⵍ ⵅⴼ ⵜⴰⵢⵔⵉ ⴷ ⵜⵏⴱⴰⴹⵜ ⴷ ⵓⵙⴳⴷ ⴷ ⵓⴱⵔⵙⵉⵡⴷ, ⴷ ⵜⵎⵓⴹⴰⵏ ⵜⵉⵎⴷⵏⴰⵏⵉⵏ ⴳ ⵜⵎⴰⵣⵉⵔⵜ ⵏ ⴰⵢⵜ ⵓⵃⵛⵎⵓⴹ. ⵓⵏⴳⴰⵍ ⴰⴷ, ⵉⴱⵖⵔ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵎⵎⵉⵎⵏ ⵉⴷⵔⴰⵏ, ⵉⵔⵡⴰⵙ ⵉⵙ ⴼⵍⵍⴰⵙ ⵢⵓⵜ ⵓⵎⵏⴳⴰⵍ ⵜⴰⵎⵎⴰⵔⴰ ⵉⴳⴳⵓⵜⵏ ⵍⵍⵉⵖ ⴰⵔ ⵜ ⵉⵥⵟⵟⴰ, ⴰⵛⴽⵓ ⵉⵙⵙⵓⴳⵜ ⴳⵉⵙ ⵉⵡⴰⵍⵉⵡⵏ ⴳⵔⵙⵉⵏ ⴷ ⵉⵡⴰⵍⵉⵡⵏ ⴷⴷⵔⵏⵉⵏ (ⵢⵉⵡⵉ ⴷ ⵢⴰⴷ ⵎⴰⵙⵙ ⵎⵓⵃⵎⵎⴰⴷ ⴰⵔⵊⴷⴰⵍ ⵅⴼ ⵓⵢⴰⴷ), ⵓⵍⴰ ⴰⵎⴰⵡⴰⵍ ⴰⵎⴰⵣⵉⵖ, ⵉⴼⵙⴰ ⵙⵉⵙ, ⵔⴰⴷ ⵏⵏ ⴳⵉⵙ ⵜⴰⴼⵜ ⵜⴰⵎⴰⵣⵉⵖⵜ ⵏ ⵎⵏⵏⴰⵡⵜ ⵜⵎⵏⴰⴹⵉⵏ ⵏ ⵜⵎⴰⵣⵉⵔⵜ ⵏⵏⵖ, ⴳⵉⵙ ⴰⵎⴰⵡⴰⵍ ⴰⵣⴰⵢⴽⵓ ⵍⵍⵉ ⵉⵜⵜⵢⴰⴼⴰⵏ ⴳ ⵡⴰⵔⵔⴰⵜⵏ (ⵓ ⵜⵓⵏⴰⵔⵜ) ⴷ ⵉⵡⴰⵍⵉⵡⵏ ⵉⵎⴰⵢⵏⵓⵜⵏ ⵜⵜⵡⴰⵙⵙⴰⵏⵏⵉⵏ ⵜⵉⴳⴰⵔⵡⵉⵏ ⴰⴷ. ⵉⴱⵖⵔ ⵡⵓⵏⴳⴰⵍ ⴳ ⵓⵥⵟⵟⴰ ⵏⵏⵙ ⵓⵍⴰ ⵙ ⵡⴰⵏⴰⵡⵏ ⵉⵙⴽⵍⴰⵏⵏ ⵉⵎⵏⵏⴰⵡⵏ, ⴳⵉⵙ ⵓⵎⵉⵢⵏ (ⴰⴳⴹⵉⴹ ⴱⵓ ⵡⵓⵎⵉⵢⵏ) ⴳⵉⵙ ⵜⴰⵏⴹⴹⴰⵎⵜ ⵏ ⵓⵙⴰⵢⵙ ⴷ ⵜⵎⴷⵢⴰⵣⵜ ⵜⴰⵜⵔⴰⵔⵜ.
ⵉⵇⵇⴰⵏ ⴷ ⴰⴷ ⵏⴱⴷⵔ ⵓⵍⴰ ⵎⴰ ⵙ ⵢⴰⴷⵍⵍⵉ ⵉⵜⵜⵡⴰⵙⵙⴰⵏ ⵎⴰⵙⵙ ⵓⵙⵓⵙ ⵙ ⵜⵣⴷⴰⵢⵜ ⵏⵏⵙ ⵉⴷⵔⴰⵏ ⴷ ⵜⵎⵉⵟⵓⵍⵓⵊⵉⵢⵜ, ⵓⴽⴰⵏ ⴰⵔ ⵏⵏ ⴷⴰⵖ ⵏⵜⵜⴰⴼⴰ ⴰⵢⴰⴷ ⴳ ⵡⵓⵏⴳⴰⵍ "ⵉⵏⴰⴽⵓⴼⵏ", ⵙⵍⴰⵡⴰⵏ ⴰⴽⴽⵯ ⵓⵎⵉⵢ ⵏ ⵓⵏⵥⴰⵕ ⴷ ⵜⵙⵍⵉⵜ ⵏⵏⵙ ⴷ ⵢⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ, ⵓⵛⵛⵏ ⴷ ⵢⵉⵏⵙⵉ...
ⴳ ⵜⴳⵉⵔⴰ, ⵉⵇⵇⴰⵏ ⴷ ⴰⴷ ⵉⵜⵜⵓⵖⵔⴰ ⵡⵓⵏⴳⴰⵍ ⴰⴷ ⵎⵏⵏⴰⵡⵜ ⵜⵡⴰⵍ, ⵉⵖ ⵏⵔⴰ ⴰⴷ ⵏⴷⴷⵓ ⵙ ⵜⵙⴽⵍⴰ ⵜⴰⵎⴰⵣⵉⵖⵜ ⵙ ⵎⵏⵉⴷ, ⵙⵍⴰⵡⴰⵏ ⴰⴽⴽⵯ ⴳ ⵎⴰ ⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ ⴷ ⵜⴷⵓⴳⴰⵎⵜ.
ⵀⵉⵛⴰⵎ ⴼⵓⵡⴰⴷ ⴳⴳⵓⵖⵍⵜ
