ⵚⴹⵉⵚ (6) ⵡⴰⵏⵙⵉⵡⵏ ⵉⴷⵔⵣⴰⵏⵏ ⵉⵏⴼⵔⴰⵔⵏ ⴳ ⵓⵎⵓⵔⴰⴽⵓⵛ

ⵍⵍⴰⵏ ⵜⵓⴳⵜ ⵏ ⵡⴰⵏⵙⵉⵡⵏ ⵉⴷⵔⵣⴰⵏⵏ ⴳ ⵓⵎⵓⵔⴰⴽⵓⵛ ⴰⵔ ⵜⵜⵓⵔⵔⴰⵢⵏ ⵙ ⵉⵣⵎⴰⵣ ⵉⵇⴱⵓⵔⵏ. ⴽⵔⴰ ⴳⵉⵙⵏ ⵜⵜⵓⵙⵙⴰⵏ ⴽⵉⴳⴰⵏ, ⴽⵔⴰ ⵓⵔ ⴱⴰⵀⵔⴰ ⵜⵜⵓⵙⵙⴰⵏⵏ. ⵃⴰⴽⴰ ⵚⴹⵉⵚ (6) ⵡⴰⵏⵙⵉⵡⵏ ⵉⴷⵔⵣⴰⵏ ⵉⵏⴼⵔⴰⵔⵏ ⴳ ⵓⵎⵓⵔⴰⴽⵓⵛ.

ⴰⵎⵓⵔⴰⴽⵓⵛ ⴰⵣⴰⵢⴽⵓ

ⵉⵜⵜⵓⵙⵙⴰⵏ ⵓⵎⵓⵔⴰⴽⵓⵛ ⵙⴳ ⵉⵣⵎⴰⵣ ⵉⵇⴱⵓⵔⵏ ⴷⴰⵜ ⵏ ⵓⵎⵣⵔⵓⵢ ⴰⵔ ⴰⵙⵙ ⴰ ⵙ ⵜⵖⵔⵎⴰ ⵏⵏⵙ ⵢⵓⵜⵉⵏ ⴰⴼⴹⴰⵏ ⵏ ⵉⵙⴳⴳⵯⴰⵙⵏ, ⴷ ⵜⴷⵍⵙⴰ ⵏⵏⵙ ⵉⵎⵖⵉⵏ ⴳ ⵡⴰⴽⴰⵍ ⵏⵏⵙ, ⵜⵏⵏⵓⵕⵥⵎ ⵖⴼ ⵜⴷⵍⵙⵉⵡⵉⵏ ⵣⵔⵉⵏⵉⵏ ⴳ ⵜⵔⴰⴽⴰⵍⵜ ⵏⵏⵙ ⵜⴰⵔⴰⵏⴰⵡⵜ. ⴽⵔⴰ ⵙⴳ ⵡⴰⵏⵙⵉⵡⵏ ⵉⴷⵔⵣⴰⵏⵏ ⴰⴷ ⵍⵍⴰⵏ ⴳ ⵜⵎⴷⵉⵏⵉⵏ, ⵜⵜⵓⵙⵙⴰⵏⵏ ⴷⴰⵔ ⴽⵓⵢⴰⵏ, ⴰⴷⴷⴰⵢ ⵜⵜⵓⴱⴷⵉⵔⵏ ⵉⴷⵔⵉⵣⵏ ⵏ ⵓⵎⵓⵔⴰⴽⵓⵛ, ⴰⵔ ⵉⵙⵡⵉⵏⴳⵉⵎ ⵓⴼⴳⴰⵏ ⴳ ⵜⵓⴷⴷⵓⵔⵉⵏ ⵜⵉⵇⴱⵓⵔⵉⵏ ⵏ ⴼⴰⵙ ⵏⵖ ⵉⵖⵔⵎⴰⵏ ⵏ ⵎⵕⵕⴰⴽⵯⵛ, ⵏⵖ ⵉⴳⵓⴷⴰⵔ ⵏ ⵜⵔⵓⴷⴰⵏⵜ ⴷ ⵎⴽⵏⴰⵙ. ⵉⵍⵉⵏ ⵡⵉⵢⵢⴰⴹ ⴼⴼⵔⵏ ⴳ ⵜⵓⴳⴳⵓⴳⵜ ⴳⵔ ⵡⴰⵍⵎⵓⵜⵏ ⴷ ⵉⴼⴰⵔⴰⵏ. ⵎⴰⵛⵛ ⵉⵎⴰⵔⴰⵢⵏ ⵏ ⵓⵃⴰⴽⴰ ⴷ ⵉⵎⵙⵙⵓⵊⵎⵏ ⵏ ⵉⴷⵔⵉⵣⵏ ⵔⴰⴷ ⵉⵔⵉⵏ ⴰⴷ ⵏⵏ ⴰⴳⴳⵯⵉⵏ ⵙ ⵡⴰⵏⵙⵉⵡⵏ ⴰⴷ.

ⵜⴰⵎⴷⵉⵏⵜ ⵏ ⵡⴰⵍⵉⵍⵉ

ⵙ ⵜⵓⴳⴳⵓⴳⵜ ⵏ ⴽⵕⴰⵎⵔⴰⵡ ⴷ ⴽⵕⴰⴹ (33) ⵉⴷ ⴽⵉⵍⵓⵎⵉⵜⵔ ⵖⴼ ⵜⵎⴷⵉⵏⵜ ⵏ ⵎⴽⵏⴰⵙ ⴳ ⵡⴰⵟⵍⴰⵙ ⴰⵏⴰⵎⵎⴰⵙ, ⵉⵍⵍⴰ ⵢⴰⵏ ⵡⴰⵏⵙⴰ ⴰⴷⵔⵣⴰⵏ ⴰⵏⴼⵔⴰⵔ ⴳ ⵓⵎⵓⵔⴰⴽⵓⵛ. ⵉⵏⵉⴳⵉ ⴰⵎⵟⵟⴰⵍⴰⵍ ⵖⴼ ⵢⴰⵜ ⵜⴰⵙⵓⵜ ⵜⴰⴽⵙⵡⴰⵜⵜ ⴳ ⵓⵎⵣⵔⵓⵢ ⴰⵣⴰⵢⴽⵓ ⵏ ⵜⴳⵍⴷⵉⵜ. ⵜⴳⴰ ⵜⵎⴷⵉⵏⵜ ⵏ ⵡⴰⵍⵉⵍⵉ ⵜⴰⴷⵔⵣⴰⵏⵜ ⴰⵏⵙⴰ ⴰⴷⵔⵣⴰⵏ ⴰⵎⴰⴹⵍⴰⵏ ⵏ ⵢⵓⵏⵉⵙⴽⵓ ⵙⴳ ⵓⵙⴳⴳⵯⴰⵙ 1997, ⵜⴳ ⵜⴰⵎⴰⵥⵓⵏⵜ ⵜⴰⵣⴰⵢⴽⵓⵜ ⵏ ⵜⴳⵍⴷⵉⵜ ⵏ ⵎⵓⵔⵉⵜⴰⵏⵢⴰ ⵜⴰⵎⴰⵣⵉⵖⵜ. ⵜⴻⵜⵜⵓⵚⴽⴰ ⴳ ⵜⴰⵙⵓⵜ ⵜⵉⵙ ⴽⵕⴰⴹⵜ ⴷⴰⵜ ⵏ ⵜⵍⴰⵍⵉⵜ, ⵜⵙⴷⵓⵔⵔⵉ ⵜⵜ ⵕⵓⵎⴰ ⵙⴳ ⵓⵙⴳⴳⵯⴰⵙ 44 ⵏ ⵜⵍⴰⵍⵉⵜ. ⵜⴷⴷⵔ ⵢⴰⵏ ⵡⵓⴷⴷⵓⵔ ⵙⵙⵖⵍⵓⵍⵏ ⵜ ⵉⴷⵍⵉⵙⵏ ⵏ ⵓⵎⵣⵔⵓⵢ.
ⴳⵔ ⵜⴰⵏⵏⴰⵍⵉⵏ ⴷ ⵜⵙⵡⴰⴽ ⴷ ⵉⵙⵡⴰⴽ ⵏⵏⵙ, ⴷⵔⵙⵏⵜ ⵜⴳⵯⵎⵎⴰ ⴷ ⵉⵙⴰⵔⵓⴷⵏ ⴷ ⵉⵃⵓⵏⴰ ⵉⵎⵍⵥⵉⵡⵏ ⵙ ⵜⵉⴷⴷⴰⵙ, ⴷ ⵓⵙⵓⵎⵖ ⵏ ⴽⴰⴱⵉⵜⵓⵍⵉⵏ ⴷ ⵜⴰⴳⴳⵯⵙⵜ ⵏ ⵜⵔⵏⴰⵡⵜ. ⴳⴰⵏⵜ ⵜⵓⵚⴽⵉⵡⵉⵏ ⴰⴽⴽⵯ ⵜⵉⵏⵉⴳⵉⵜⵉⵏ ⵖⴼ ⵓⵣⵎⵣ ⴰⴽⵙⵡⴰⵜ ⵙⴳ ⵓⵎⵣⵔⵓⵢ ⵏ ⵓⵎⵓⵔⴰⴽⵓⵛ ⴳ ⵜⵓⵇⵇⵏⵉⵡⵉⵏ ⵏⵏⵙ ⵜⵉⵙⵔⵜⴰⵏⵉⵏ, ⵜⵉⴷⵎⵙⴰⵏⵉⵏ, ⴷ ⵜⵏⴰⵎⵓⵏⵉⵏ. ⵉⴽⴽⴰ ⵜⵜ ⵏⵏ ⵡⴰⵏⵙⴰ ⵉⴼⵓⵍⴽⵉ ⴰⵔ ⵜⴰⵙⵓⵜ ⵜⵉⵙ ⵜⴰⵎ ⴷ ⵎⵔⴰⵡⵜ (18) ⴰⵍⵍⵉⵖ ⵉⵏⵏⴽⵎⴰ ⴹⴰⵕⵜ ⵏ ⵓⵏⴷⵓⴷⵉ. ⵜⵜⵢⴰⴼⴰⵏⵜ ⴳⵉⵙ ⴽⵔⴰ ⵏ ⵜⵉⴼⵉⵜⵉⵏ ⵜⵉⴷⵔⵣⴰⵏⵉⵏ ⵙⴷⴷⵉⴷⵏⵜ ⵎⴰⵙ ⵜⴳⴰ ⵡⴰⵍⵉⵍⵉ ⵜⴰⵎⴷⵉⵏⵜ ⵜⴰⵎⴰⵣⵉⵖⵜ ⵉⵜⵜⵓⵙⵕⵓⵎⵏⵏ, ⴰⵢⵍⵍⵉ ⵜⵜ ⵢⵓⵊⵊⴰⵏ ⴰⴷ ⵜⴳ ⵢⴰⵏ ⵡⴰⵏⵙⴰ ⴰⴷⵔⵣⴰⵏ ⴰⴷⵙⵍⴰⵏ ⴳ ⵓⵎⵓⵔⴰⴽⵓⵛ. ⵉⵜⵜⵓⵙⵙⴰⵏ ⴱⴰⵀⵔⴰ ⵡⴰⵏⵙⴰ ⴳ ⵓⵎⴰⴹⴰⵍ ⴰⵍⵍⵉⵖ ⴳⵉⵙ ⵉⵜⵜⵓⵙⴽⴰⵔ ⵓⵙⵡⵍⴼ ⵏ ⵓⴼⵉⵍⵎ "ⴰⵙⵓⵔⵔⵙ ⴰⵎⴳⴳⴰⵔⵓ ⵏ ⵓⵎⴰⵙⵉⵃ" ⵏ ⵓⵎⵙⵙⵓⴼⵖ ⵙⴽⵓⵔⵙⵉⵣⵉ. ⵖⵔ ⴳⴳⴰⵔ ⵅⴼ ⵜⵎⴷⵉⵏⵜ ⵏ ⵡⴰⵍⵉⵍⵉ

ⵜⴰⵎⴷⵉⵏⵜ ⵏ ⵍⵉⴽⵙⵓⵙ

ⵜⵡⵔⵔⵄ ⵍⵉⴽⵙⵓⵙ ⵖⴼ ⵢⴰⵜ ⵜⵙⵏⴰ ⵏ ⵚⴹⵉⵎⵔⴰⵡ ⴷ ⵙⵉⵏ (62) ⵉⴷ ⵀⵉⴽⵜⴰⵕ, ⵜⴰⴳⴳⵓⴳ ⵖⴼ ⵓⴱⵔⵉⴷ ⵏ ⵜⵎⴰⵍⵍⴰⵢⵜ ⵏⵏⴰ ⵉⵜⵜⵡⴰⵙⵙⵏⵏ ⴳ ⵓⵎⵓⵔⴰⴽⵓⵛ. ⵜⵍⵍⴰ ⴳ ⵜⵎⴰ ⵏ ⵓⵙⴰⴳⵏ ⵏ ⵍⵄⵔⴰⵢⵛ ⴳ ⵉⵥⵥⵍⵎⴹ ⵏ ⵓⵎⵓⵔⴰⴽⵓⵛ, ⵜⴻⵜⵜⵓⵥⵍⴰⵢ ⵙ ⵢⴰⵏ ⵓⵙⴰⵏⴰⵢ ⵉⵥⵉⵍⵏ ⵖⴼ ⵡⴰⵙⵉⴼ ⵏ ⵍⵓⴽⵓⵙ. ⵉⵡⵉⵏ ⴷ ⴽⵔⴰ ⵏ ⵉⴹⵕⵉⵚⵏ ⵏ ⵉⴳⵔⵉⴽⵏ ⴷ ⵉⵕⵓⵎⵉⵢⵏ ⵎⴰⵙ ⴷⴰ ⵉⵜⵜⵓⵔⵔⴰⵢ ⵓⵎⵣⵔⵓⵢ ⵏ ⵍⵉⴽⵙⵓⵙ ⴰⵔ ⵜⴰⵙⵓⵜ ⵜⵉⵙ ⵙⵏⴰⵜ ⴷ ⵎⵔⴰⵡⵜ (12) ⴷⴰⵜ ⵏ ⵜⵍⴰⵍⵉⵜ. ⵜⵍⵍⴰ ⴳⵉⵙ ⵜⵓⴷⴷⵓⵔⵜ ⵏ ⵉⵙⵓⵎⴰⵖ, ⴰⵎⵣⴳⵓⵏ ⴰⵕⵓⵎⵉⵢ, ⵉⵙⴰⵔⵓⴷⵏ ⵉⴳⴷⵓⴷⴰⵏⵏ, ⵉⵖⵔⵎ ⴰⵅⴰⵜⴰⵔ ⵉⵜⵜⵓⵚⴽⴰ ⴳ ⵓⵣⵎⵣ ⵏ ⵓⴳⵍⵍⵉⴷ ⴰⵎⴰⵣⵉⵖ ⵢⵓⴱⴰ ⵡⵉⵙ ⵙⵉⵏ, ⵓⴷⴷⵉⵙ ⴰⵎⴳⵓⵔⴰⵏ ⴰⴱⴰⵔⴰⵡ ⵉ ⵓⵙⵎⴰⴽⵍ ⵏ ⵉⵙⵍⵎⴰⵏ, ⴷ ⵉⵇⵓⵍⵍⵉⵊⵏ ⵏⵏⴰ ⵉⵙⴱⴰⵢⴰⵏⵏ ⴰⵖⴰⵡⴰⵙ ⵏ ⵜⴳⵯⵎⵎⴰ ⵍⵍⵉ ⴳ ⵣⴷⵖⵏ ⵉⵏⴰⵎⵓⵔⵏ.
ⵜⴻⵜⵜⵓⴱⴷⴰⵔ ⵍⵉⴽⵙⵓⵙ ⴷⴰⵔ ⵉⵎⴰⵔⴰⵜⵏ ⵉⵣⴰⵢⴽⵓⵏ ⵣⵓⵏ ⴷ ⵀⴰⵏⵓ ⵍⵎⵍⵍⴰⵃ, ⴰⵎⵃⴰⴽⴰ ⴰⵡⵇⴰⵕⵟⴰⵊ ⴳ ⵓⵙⴳⴳⵯⴰⵙ 450 ⴷⴰⵜ ⵏ ⵜⵍⴰⵍⵉⵜ. ⵉⵏⵏⴰ ⵄⴰⴱⴷⵙⵙⵍⴰⵎ ⵚⵚⵕⵕⵓⵅ, ⴰⵙⵍⵡⴰⵢ ⵏ ⵜⵣⵓⵏⵉ ⵜⴰⴷⵍⵙⴰⵏⵜ ⴳ ⵜⵖⵉⵡⴰⵏⵜ ⵏ ⵍⵄⵔⴰⵢⵛ, ⵎⴰⵙ ⴷ ⵉⴷⵔⵉⵣⵏ ⵏ ⵓⵎⵣⵔⵓⵢ ⵏⵏⴰ ⵢⵓⵎⴰⵏⵏ ⴳ ⵡⴰⵏⵙⴰ ⵏ ⵍⵉⴽⵙⵓⵙ ⵓⵔ ⴳⵉⵏ ⴰⵎⵔ ⵎⵔⴰⵡ ⴳ ⵜⵎⵉⴹⵉ (10%) ⵙⴳ ⵉⴷⵔⵉⵣⵏ ⵏⵏⴰ ⴰⴽⴽⵯ ⵢⵓⵎⴰ, ⵉⵎⴰ ⵜⵥⴰ ⵎⵔⴰⵡ ⴳ ⵜⵎⵉⴹⵉ (90%) ⵙⵓⵍⵏ ⵓⴽⴰⵏ ⴳ ⴷⴷⵓ ⵡⴰⴽⴰⵍ ⵓⵔ ⵜⴰ ⵜⵜⵓⵃⴰⴽⴰⵏ, ⴷ ⵓⵔ ⵜⵍⵍⵉ ⵜⵓⵔⴷⴰ ⵎⴰⵙ ⴷ ⴽⵓⴷⵏⵏⴰ ⵜⵜⵓⵃⴰⴽⴰⵏ ⵔⴰⴷ ⵙⵏⴼⵍⵏ ⵜⵓⴳⵜ ⵏ ⵜⵉⴷⴰⵜ ⵏ ⵓⵎⵣⵔⵓⵢ.
ⴳ ⵜⴰⵙⵓⵜ ⵜⵉⵙ ⴽⵕⴰⴹⵜ ⵏ ⵜⵍⴰⵍⵉⵜ, ⵜⴳⴰ ⵍⵉⴽⵙⵓⵙ ⵜⴰⵎⴰⵙⵉⵃⵜ ⵙ ⵜⵉⵎⵎⴰⴷ ⵏⵏⵙ, ⵢⵉⵍⵉ ⵓⴷⵔⵉⵣ ⵏ ⵢⴰⵜ ⵜⴼⴰⵛⴳⴰ ⵜⴰⵎⴰⵙⵉⵃⵜ ⴰⵔ ⵜⵙⵙⴰⴳⴳⵯⴰ ⴰⵏⵙⴰ ⴰⴷⵔⵣⴰⵏ. ⵣⴷⵖⵏ ⵉⵡⵎⵓⵔⴰⴽⵓⵛⵏ ⴳ ⵜⵎⴷⵉⴷⵜ ⴰⵔ ⵍⵍⵉⴳ ⵜⵜ ⴼⵍⵏ ⵙ ⵢⴰⵜ ⵜⴽⴽⵍⵉⵜ ⴳ ⵓⵙⴳⴳⵯⴰⵙ 1300 ⵏ ⵜⵍⴰⵍⵉⵜ, ⵙ ⵓⵙⵔⴰⴳ ⵏ ⵜⴰⵖⴰⵔⵜ ⵎⴽⵍⵍⵉ ⵏⵏⴰⵏ ⵉⵏⵎⵣⵔⵓⵢⵏ. ⵎⴰⵛⵛ ⵓⵔ ⵏⵏ ⴼⵍⵍⴰⵙ ⴰⴳⴳⵓⴳⵏ ⴽⵉⴳⴰⵏ, ⵣⴷⵖⵏ ⴳ ⵜⵎⴷⵉⵏⵜ ⵏ ⵍⵄⵔⴰⵢⵛ ⵜⴰⵎⴰ ⵏ ⵡⴰⵏⵙⴰ.

ⵜⴰⵎⴷⵉⵏⵜ ⵏ ⴱⴰⵏⴰⵚⴰ

ⵜⵍⵍⴰ ⵜⵎⴷⵉⵏⵜ ⵏ ⴱⴰⵏⴰⵚⴰ ⵜⴰⴷⵔⵣⴰⵏⵜ ⴳ ⵜⵙⴳⴰ ⵏ ⵙⵉⴷⵉ ⵇⴰⵙⵎ, ⵜⴰⴳⴳⵓⴳ ⵙ ⵙⴰ ⴷ ⵎⵔⴰⵡ (17) ⵏ ⵉⴷ ⴽⵍⵓⵎⵉⵜⵔ ⵖⴼ ⵜⵎⴷⵉⵏⵜ ⵏ ⵎⵛⵔⵄ ⴱⵍⵍⵇⵚⵉⵕⵉ. ⴰⵔ ⵜⴻⵜⵜⴰⵖⵓⵍ ⵖⵔ ⵓⵣⵎⵣ ⴰⵎⵓⵔⵉ ⴰⵎⴰⵣⵉⵖ. ⵜⵜⵢⴰⴼⴰⵏ ⴳⵉⵙ ⵉⴷⵔⵉⵣⵏ ⵏ ⵉⴷⵇⵇⵉ ⴷ ⵡⵓⵏⵓⵖⵏ ⵉⵙⴷⴷⴰⵙⵏ ⴷ ⵜⴳⵯⵎⵎⴰ ⴷ ⵜⵉⴼⵉⵜⵉⵏ ⵏ ⵜⵉⴱⵕⵓⵏⵣⵉⵢⵉⵏ ⴷ ⵉⵙⵓⵎⴰⵖ ⴷ ⵉⴷⵔⵉⵣⵏ ⵢⴰⴹⵏⵉⵏ. ⵜⴻⵜⵜⵓⴼⵙⴰⵔ ⵢⴰⵜ ⵜⴳⵔⵓⵎⵎⴰ ⵎⵇⵇⵓⵔⵏ ⵏ ⵉⴳⵯⵣⵎⴰⵏ ⵉⴷⵔⵣⴰⵏⵏ ⴰⴷ ⴳ ⵓⵙⴰⵍⴰⵢ ⴰⴷⵔⵣⴰⵏ ⴳ ⵕⵕⴱⴰⴹ, ⵜⴻⵜⵜⵡⴰⵃⴹⵓ ⵜⴰⵢⵢⴰⴹ ⴳ ⵉⵅⵣⴰⵏⵏ ⵏ ⵡⴰⵏⵙⴰ ⴰⴷⵔⵣⴰⵏ ⵏ ⵡⴰⵍⵉⵍⵉ.
ⵉⵏⵏⴰ ⵕⴰⵛⵉⴷ ⴰⵖⵔⴱⵉ, ⵉⵎⵃⴹⵉ ⵏ ⵡⴰⵏⵙⵉⵡⵏ ⵏ ⴱⴰⵏⴰⵚⴰ ⴷ ⵜⴰⵎⵓⵙⵉⴷⴰ ⴳ ⵜⵎⴰⵡⴰⵙⵜ ⵏ ⵜⴷⵍⵙⴰ ⴷ ⵓⵎⵙⴰⵡⴰⴹ: «ⵉⴳⴰ ⵡⴰⵏⵙⴰ ⵏ ⴱⴰⵏⴰⵚⴰ ⵢⴰⵏ ⵙⴳ ⵡⴰⵏⵙⵉⵡⵏ ⵉⴷⵔⵣⴰⵏⵏ ⵉⵏⴼⵔⴰⵔⵏ ⴳ ⵜⵎⵏⴰⴹⵜ ⵏ ⵜⴰⴳⵓⵜ ⵏⵏⴰ ⵢⴰⵎⵓⵏ ⴳ ⵜⵉⵣⵉ ⵜⴰⵎⵓⵔⵉⵜ ⴳ ⵜⴰⵎⴰ ⵏ ⵡⴰⵏⵙⵉⵡⵏ ⵏ ⵜⴰⵎⵓⵙⵉⴷⴰ ⴷ ⵔⵉⴳⴰ.».

ⵜⴰⵎⴷⵉⵏⵜ ⵏ ⵜⴰⵎⵓⵙⵉⴷⴰ

ⵉⵍⵍⴰ ⵡⴰⵏⵙⴰ ⵏ ⵜⴰⵎⵓⵙⵉⴷⴰ ⵉⵜⵜⵓⵙⵙⴰⵏ ⴰⵙⵙⴰ ⵙ ⵙⵉⴷⵉ ⵄⵍⵉ ⴱⵏ ⵃⵎⴰⴷ ⴳ ⵓⴳⵎⵎⴰⴹ ⴰⵥⵍⵎⴰⴹ ⵏ ⵡⴰⵙⵉⴼ ⵏ ⵙⴱⵓ, ⵢⴰⴳⴳⵓⴳ ⵙ ⵎⵔⴰⵡ (10) ⵉⴷ ⴽⵉⵍⵓⵎⵉⵜⵔ ⵖⴼ ⵜⵎⴷⵉⵏⵜ ⵏ ⵍⵇⵏⴹⵕⵜ. ⵜⴰⵎⴷⵉⵏⵜ ⵜⴰⵎⴰⵣⵉⵖⵜ ⵜⴰⵣⴰⵢⴽⵓⵜ, ⵜⵏⵏⵓⵛⵛⴳ ⵢⴰⴷⵍⵍⵉ ⴳⵉⵙ ⵜⵙⴱⴱⴰⴱⵜ ⵎⴽⵍⵍⵉ ⵎⵎⴰⵍⵏ ⵉⵔⵔⵎⵉⵎⵏ ⵏ ⵉⴷⵇⵇⵉ ⵍⵍⵉⴷ ⵉⵜⵜⴰⵛⴽⴰⵏ ⴳ ⵡⴰⵙⵉⴼ ⵏ ⵙⴱⵓ ⵙⴳ ⵎⵏⵏⴰⵡⵜ ⵜⵎⵓⵔⴰ ⵏ ⵢⵉⵍⵍ ⴰⴳⵔⴰⴽⴰⵍ. ⵣⵓⵏ ⴷ ⴰⴽⴽⵯ ⴰⵏⵙⵉⵡⵏ ⴰⵏⵏ ⵢⴰⴹⵏⵉⵏ, ⵜⴽⴽⴰ ⵜⵜ ⵏⵏ ⵜⵎⵓⵙⵉⴷⴰ ⴷⴷⵓ ⵜⵎⵙⵙⵓⴳⵓⵔⵜ ⵜⴰⵕⵓⵎⵉⵢⵜ ⵢⴰⵜ ⵜⵉⵣⵉ ⴷⴰⵜ ⴰⴷ ⵜⵜ ⴼⵍⵏ ⴳⵔ ⵉⵙⴳⴳⵯⴰⵙⵏ 274 ⴷ 280 ⵏ ⵜⵍⴰⵍⵉⵜ.

ⴰⵎⴷⵉⵏⵜ ⵏ ⵔⵉⵖⴰ

ⵜⵍⵍⴰ ⵜⵎⴷⵉⵏⵜ ⵏ ⵔⵉⵖⴰ ⵜⴰⴷⵔⵣⴰⵏⵜ ⴳ ⵡⴰⵎⵎⴰⵙ ⵏ ⵢⴰⵏ ⵓⵣⴰⵖⴰⵔ ⴰⵎⵉⵔⵉⵡ ⵙ ⵜⵓⴳⴳⵓⴳⵜ ⵏ ⵜⴰⵎ (8) ⵉⴷ ⴽⵉⵍⵓⵎⵉⵜⵔ ⵖⴼ ⵜⵎⴷⵉⵏⵜ ⵏ ⵙⵉⴷⵉ ⵙⵍⵉⵎⴰⵏ ⴳ ⵓⴳⴰⴼⴰⵢ ⵏ ⵜⴰⴳⵓⵜ, ⴷⴳ ⵓⴳⵎⵎⴰⴹ ⴰⴼⴰⵙⵉⵢ ⵏ ⵡⴰⵙⵉⴼ ⵏ ⴱⵀⵜ. ⵜⴻⵜⵜⵓⵙⵙⴰⵏ ⵜⵎⵏⴰⴹⵜ ⵙ ⵉⴽⴰⵍⵉⵡⵏ ⴱⵍⵓⵍⵙⵏⵉⵏ ⵏⵏⴰ ⵙ ⵜⵜⵡⴰⵙⵙⵏ ⵉⴽⴰⵍⵉⵡⵏ ⵉⴳⵯⵏⵙⴰⵏⵏ ⵏ ⵜⵎⵏⴰⴹⵜ ⵏ ⵜⴰⴳⵓⵜ ⵜⴰⵏⴰⵎⵎⴰⵙⵜ. ⵍⴽⵎⵜ ⵜⵖⵓⵣⵉⵡⵉⵏ ⴷ ⵜⵎⵀⴰⵍ ⵏ ⵓⵏⵓⵏⵛ ⴳ ⵡⴰⵏⵙⴰ ⵎⴰⵙ ⴷ ⵜⴰⵎⴷⵉⵏⵜ ⵜⴽⴽⴰ ⵜⵜ ⵏⵏ ⵜⴳⴰ ⵜⴰⵎⴰⵥⵓⵏⵜ ⵏ ⵜⴳⵍⴷⵉⵜ ⵜⴰⵎⴰⵣⵉⵖⵜ ⵜⴰⵎⵓⵔⵉⵜ.

ⵎⵉⴳⴰⵍⵉⵜ ⵎⵣⵓⵔⴰ

ⵉⴳⴰ ⵎⵉⴳⴰⵍⵉⵜ ⵎⵣⵓⵔⴰ ⵢⴰⵏ ⵡⴰⵏⵙⴰ ⵓⵔ ⵉⵍⵉⵏ ⴰⵏⴰⵡ ⴳ ⵉⵥⵥⵍⵎⴹ ⵏ ⵜⴼⵔⵉⵇⵜ. ⵉⴳⴰ ⵢⴰⵏ ⵡⴰⵏⵙⴰ ⴰⵎⵙⵙⵓⵍⴻⵍ ⴰⴱⴰⵔⴰⵔ ⵏ ⵜⴰⵏⵏⴰⵍⵉⵏ ⵜⵉⵎⵙⵙⵓⵍⴻⵍⵉⵏ, ⵜⴰⴷ ⴳⵉⵙⵏⵜ ⵉⵖⵣⵣⵉⴼⵏ ⵜⵍⴽⵎ ⵙⵎⵎⵓⵙ (5) ⵉⴷ ⵎⵉⵜⵔⵓ. ⵙ ⵜⵓⴳⴳⵓⴳⵜ ⵏ ⵙⵉⵎⵔⴰⵡ (20) ⵉⴷ ⴽⵉⵍⵓⵎⵉⵜⵔ ⵖⴼ ⵜⵎⴷⵉⵏⵜ ⵏ ⵍⵄⵔⴰⵢⵛ, ⴳ ⵜⴰⵎⴰ ⵏ ⴰⵥⴰⵢⵍⴰ, ⴷⵔⵙⵏⵜ 167 ⵏ ⵜⴰⵏⵏⴰⵍⵉⵏ ⴷ ⵉⵙⵓⵍⵉⵍⵏ ⵢⴰⵜ ⵜⴰⵎⴰ ⵏ ⵢⴰⵜ ⴳ ⵢⴰⵜ ⵜⵥⴰⵢⵕⵜ ⴰⵔ ⵜⵜⴰⵖⵓⵍⵏⵜ ⴰⵔ ⴰⵣⵎⵣ ⴰⵡⴱⵕⵓⵏⵥ. ⴰⵔ ⵜⴻⵜⵜⵉⵏⵉ ⵜⵎⵉⵜⵓⵍⵓⵊⵉⵜ ⵜⴰⴳⵔⵉⴳⵜ ⵎⴰⵙ ⵉⴳⴰ ⵡⴰⵏⵙⴰ ⴰⴷ ⴰⵙⵎⴹⵍ ⵏ ⵓⴳⵕⵓⴹ ⴰⵎⴰⵣⵉⵖ ⵄⵉⵏⵜⵉ ⵏⵏⴰ ⵉⵏⵖⴰ ⵀⵉⵔⴰⵇⵍ. ⴰⵔ ⵜⵜⵖⴰⵍⵏ ⵡⵉⵢⵢⴰⴹ ⵉⵙ ⵉⴳⴰ ⴰⵙⵎⴹⵍ ⵏ ⴽⵔⴰ ⵏ ⵓⵏⵎⵖⵓⵔ ⴳ ⵓⵣⵎⵣ ⵏⵏⵙ, ⵎⵇⵇⴰ ⴳⵉⵙ ⵓⵔ ⵉⵜⵜⵢⴰⴼⴰ ⴽⵔⴰ ⵏ ⵓⵙⵎⴹⵍ ⴳ ⵓⵏⵓⵏⵛ ⵉⴷⵔⵓⵙⵏ ⵏⵏⴰ ⴳⵉⵙ ⵉⵜⵜⵓⵙⴽⴰⵔⵏ. ⴰⵔ ⵜⵜⵉⵏⵉⵏ ⵉⵏⵎⵣⵔⵓⵢⵏ ⵎⴰⵙ ⵉⴳⴰ ⵡⴰⵏⵙⴰ ⵏ ⵎⵉⴳⴰⵍⵉⵜ ⵎⵣⵓⵔⴰ ⴰⵙⵓⵎⵖ ⴰⵅⴰⵜⴰⵔ ⵉⵜⵜⵓⵥⵍⴰⵢⵏ ⵉ ⵓⵙⵓⵎⴷ ⵏ ⵜⴰⴼⵓⴽⵜ. ⵜⴳⴰ ⵎⵉⴳⴰⵍⵉⵜ ⵎⵣⵓⵔⴰ ⵜⴰⵥⴰⵢⵕⵜ ⵜⴰⵎⵙⵙⵓⵍⴻⵍⵜ ⵜⴰⵎⵇⵇⵔⴰⵏⵜ ⴳ ⵓⵎⴰⴹⴰⵍ. ⵙⴰⵡ ⵎ'ⴰⴷ ⴳⴰⵏ ⵉⵥⵕⴰⵏ ⴰⴷ? ⵉⵔⵣⵣⵓⵜⵏ ⴷ ⵉⴷⴷⴰⵏ ⴽⴰ ⵔⴰⴷ ⵉⵙⵙⴼⵔⵓ ⴰⴱⵏⵓⴱⴽ ⴰⴷ.

ⵜⴰⵙⴰⵖⵓⵍⵜ

خديجة يكن. 6 أهم مواقع أثرية في المغرب. نمرا واحد. https://www.numero1.ma