ⵚⴰⵏⴹⵕⵉⵍⵍⴰ (1/2) - ⵜⴰⵙⵓⵖⵍⵜ ⵏ ⵎⵓⵃⵎⵎⴰⴷ ⴱⵍⵍⵖⵣⴰⵍⵉ

ⵉⴽⴽⴰ ⵜⵜ ⵏⵏ ⵢⴰⵏ ⵓⵔⴳⴰⵣ ⵢⵓⵡⵍ ⵜⵉⴽⴽⵍⵜ ⵜⵉⵙⵙ ⵙⵏⴰⵜ ⴷⴼⴼⵉⵔ ⵎⴰⵢⴷ ⴰⵙ ⵜⵎⵎⵓⵜ ⵜⵎⵟⵟⵓⵜ ⵜⴰⵎⵣⵡⴰⵔⵓⵜ, ⵢⴰⵡⵢ ⵢⴰⵜ ⵜⵎⵟⵟⵓⵜ ⵉⵎⵔⴰⵏ ⵉⵙⵅⴰⵜⵔⵏ ⵉⵖⴼ ⵏⵏⵙ ⵓⴳⴳⴰⵔ ⵏ ⴽⵔⴰ ⵉⵍⵍⴰⵏ. ⵖⵓⵔⵙ ⵙⵏⴰⵜ ⵜⵔⴱⴰⵜⵉⵏ ⵜⵜ ⵉⵔⵡⴰⵙⵏ ⴳ ⵜⵖⴰⵔⴰ, ⴰⵡⵉⵏⵜ ⴷ ⵙⴳⵉⵙ ⴽⵔⴰⵢⴳⴰⵜ ⵜⴰⵖⴰⵡⵙⴰ. ⴰⵔⴳⴰⵣ ⵏⵜⵜⴰ ⵖⵓⵔⵙ ⵢⴰⵜ ⵜⵔⴱⴰⵜ ⵜⴰⴼⴷⴷⴰⵎⵜ ⵙⴳ ⵜⵎⵟⵟⵓⵜ ⵏⵏⵙ ⵏⵏⴰ ⵉⵎⵎⵓⵜⵏ, ⵎⴰⵛⴰ ⵜⴰⵍⵓⵖⵉ ⵏⵏⵙ ⴷ ⵓⴼⵓⵍⴽⵉ ⵏⵏⵙ ⵏⵜⵜⴰⵜ ⵓⵔ ⵍⵉⵏ ⴰⵏⴰⵡ, ⴰⵢⴰ ⵜⵓⵡⵢ ⵜ ⵉⴷ ⵙⴳ ⵎⴰⵙ ⵏⵏⴰ ⵢⵓⴼⵏ ⵎⴰⵢⴷ ⵉⵍⵍⴰⵏ ⵖⴼ ⵡⴰⴽⴰⵍ.

ⵓⵔ ⵉⵣⵔⵉ ⵢⴰⵜ ⵖⴼ ⵜⵎⵖⵔⴰ, ⵜⵙⵙⵓⵎⴰⵏ ⴷ ⵜⵎⵟⵟⵓⵜ ⵜⴰⵎⴰⵢⵏⵓⵜ ⵜⵓⵅⵅⵓⵜ ⵏⵏⵙ. ⵜⵙⴱⵉⴱⴱⵉⵢ ⵜⵉⵡⵓⵔⵉⵡⵉⵏ ⴰⴽⴽⵯ ⵎⵔⴰⵏⵉⵏ ⵏ ⵜⴰⴷⴷⴰⵔⵜ ⵉ ⵜⵔⴱⴰⵜ ⵜⴰⵎⵥⵢⴰⵏⵜ: ⵏⵜⵜⴰⵜ ⴰⵢⴷ ⵉⵙⵙⵉⵔⵉⴷⵏ ⵉⵔⵓⴽⵓⵜⵏ ⴷ ⵜⵎⵍⵙⴰ, ⵜⴼⵕⴹ ⵜⴰⵣⵇⵇⴰ ⵏ ⵜⵎⵟⵟⵓⵜ ⵏ ⴱⴰⴱⴰⵙ ⴷ ⴰⵡⴷ ⵜⵉⵏ ⵉⵙⵜⵜⵎⴰⵙ. ⴷⴰ ⵜⴳⴳⴰⵏ ⴳ ⵓⴼⵍⵍⴰ ⴰⴽⴽⵯ ⵏ ⵜⴳⵎⵎⵉ, ⴳ ⵢⴰⵜ ⵜⴰⴷⴷⵡⴰⵔⵉⵜ, ⵖⴼ ⵢⴰⵏ ⵡⵓⵙⵓ ⵉⵎⴷⴰⵏ, ⴰⵔ ⴳⴳⴰⵏⴻⵏⵜ ⵉⵙⵜⵜⵎⴰⵙ ⵏⵉⵜⵏⵜⵉ ⴳ ⵜⵣⵖⵡⵉⵏ ⵖⵓⴷⴰⵏⵉⵏ ⴳ ⵍⵍⴰⵏ ⵡⵓⵙⵓⵜⵏ ⵥⵉⵍⵏⵉⵏ ⴷ ⵜⵉⵙⵉⵜⵉⵏ ⴳ ⵜⵜⴰⵏⵏⴰⵢⵏⵜ ⵉⵖⴼⴰⵡⵏ ⵏⵏⵙⵏⵜ ⵙⴳ ⵢⵉⵖⴼ ⴰⵔ ⵉⴹⴰⵕⵏ.

ⴰⵔ ⵜⵜⵔⴼⵓⴼⵓⵏ ⵜⴳⵍⵍⵉⵏⵜ ⵏ ⵜⵛⵉⵔⵔⴰⵜⵉⵏ, ⵉⴳⴰⵏ ⵙ ⵢⵉⵙⵎ ⵚⴰⵏⴹⵕⵉⵍⵍⴰ, ⵎⴰⵛⴰ ⵜⵥⵥⵉⴹⵕ, ⵓⵔ ⵜⵖⵉⵢ ⴰⴷ ⵜⵙⵎⵓⵎⵎⵢ ⵖⴼ ⴱⴰⴱⴰⵙ ⴰⴼⴰⴷ ⴰⴷ ⵙⵉⵙ ⵓⵔ ⵉⵏⴽⵔ ⴰⵛⴽⵓ ⵜⴱⴰⴹ ⴷⵉⴳⵙ ⵜⵎⵟⵟⵓⵜ ⵏⵏⵙ. ⵎⵇⵇⴰⵔ ⴷⴰ ⵜⵍⵙⵙⴰ ⵖⴰⵙ ⴽⵔⴰ ⵏ ⵉⴷⵔⴱⴰⵍⵏ ⵉⵎⴷⴰⵏ ⵉⵎⵜⴰⵡⴰⵢⵏ, ⴷⴰ ⵜⴻⵜⵜⵓⵎⴰⵏ ⵚⴰⵏⴹⵕⵉⵍⵍⴰ ⵜⵓⴼ ⵉⵙⵜⵜⵎⴰⵙ ⵙ ⵜⵎⵉⴹⵉ ⵏ ⵜⵉⴽⴽⵍⵜ, ⴷⴰⵛⵛⵏ ⴰ ⵎⵔ ⵜⵍⵙⵉ ⴰⵕⵕⵓⴹ ⵉⵖⵓⴷⴰⵏ.

ⵜⵎⵢⴰⵔ ⵚⴰⵏⴹⵕⵉⵍⵍⴰ ⴽⵓⴷⵏⵏⴰ ⵜⵙⵎⴷ ⵜⴰⵡⵓⵔⵉ ⵏⵏⵙ ⴰⴷ ⵜⴻⵜⵜⴳⵉⵡⵉⵔ ⴳ ⵜⵖⵎⵔⵜ ⴳ ⵜⵍⵍⴰ ⵜⵙⵡⴰⵡⵡⵓⵜ ⵜⵇⵇⵉⵎ ⵖⴼ ⵢⵉⵖⴷ ⴰⵍⵍⵉⴳ ⴷⴰ ⴰⵙ ⵇⵇⵔⴰⵏ ⴰⵢⵜ ⵜⴰⴷⴷⴰⵔⵜ ⵙ ⵎⵣⵔⵉⵖⴷ. ⵜⴰⵎⵥⵢⴰⵏⵜ ⴳ ⵉⵙⵜⵜⵎⴰⵜⵏ ⴽⴰ ⴰⵢⴷ ⴰⵙ ⵉⵇⵇⴰⵔⵏ ⵙ ⵢⵉⵙⵎ ⵏⵏⵙ ⵏ ⵜⵉⴷⵜ ⴰⵛⴽⵓ ⵓⵔ ⴱⴰⵀⵔⴰ ⵜⵅⵅⵉ (ⵜⵅⵛⵉⵏ) ⴰⵎⵎ ⵜⵅⴰⵜⴰⵔⵜ.

ⵢⴰⵏ ⵡⴰⵙⵙ ⴳ ⵡⵓⵙⵙⴰⵏ, ⵉⵙⴽⵔ ⵎⴻⵎⵎⵉⵙ ⵏ ⵓⴳⵍⵍⵉⴷ ⵢⴰⵜ ⵜⴼⵓⴳⵍⴰ, ⵉⵍⴰⵖⴰ ⵏⵏ ⵙⵉⵙ ⵉ ⵜⵔⴱⴰⵜⵉⵏ ⴰⴽⴽⵯ ⴼⵓⵍⴽⵉⵏⵉⵏ ⴳ ⵜⵎⴰⵣⵉⵔⵜ ⴰⴼⴰⴷ ⴰⴷ ⵉⵙⵜⵢ ⵜⴰⵏⵏⴰ ⵔⴰⴷ ⵉⵜⵜⵔ ⵙ ⵢⵉⵡⵍ.

ⵜⴰⴷⴳⴳⵯⴰⵜ ⵏⵏⴰ, ⴰⵔ ⵜⴻⵜⵜⵎⵓⵜⵜⵓⴳ ⵜⵎⵖⴰⵔⵜ ⴷ ⵉⵙⵜⵉⵙ ⴰⴽⴽⵏ ⴰⴷ ⴷⴷⵓⵏⵜ ⵖⵔ ⵜⴼⵓⴳⵍⴰ, ⵜⴻⵜⵜⵔ ⵚⴰⵏⴹⵕⵉⵍⵍⴰ ⵉ ⵜⵎⵟⵟⵓⵜ ⵏ ⴱⴰⴱⴰⵙ ⴰⴷ ⵜⵜ ⵜⴰⵊⵊ ⴰⴷ ⵉⴷⵙⵏⵜ ⵜⵎⵓⵏ. ⵜⵔⴰⵔ ⴰⵙ:
- ⵎⴰⵛⴰ ⴰ ⵚⴰⵏⴹⵕⵉⵍⵍⴰ ⵀⴰⵜ ⵜⴻⵜⴽⴰⵔⴷ ⴰⴽⴽⵯ ⵙ ⵓⴳⴹⵕⵓⵕ ⴷ ⵉⵔⴽⴰⵏ ⵜⵉⵔⵉⴷ ⴰⴷ ⵜⴼⵜⵓⴷ ⵖⵔ ⵜⴼⵓⴳⵍⴰ? ⵓⵔ ⵖⵓⵔⵎ ⵜⴰⵔⵙⵡⴰⵢⵜ, ⵓⵔ ⴷⴰⵔⵎ ⵉⴷⵓⴽⴰⵏ ⵜⵉⵔⵉⴷ ⴰⴷ ⵜⵔⴽⵣⴷ?
- ⴹⵓⴼ ⵜⴰⴷⴷⴰⵔⵜ, ⵀⴰ ⵏⵏ ⴰⴷ ⵜⴳⵏⴷ ⵓⵔ ⵜⴰ ⴷ ⵏⴰⵖⵓⵍ, ⴰⴷ ⴰⵙ ⵏⵏⴰⵏⵜ ⵉⵙⵜⵎⴰⵙ ⴷⴰⵜ ⴰⴷ ⴼⴼⵖⵏⵜ.

ⵢⴰⵏ ⵉⵎⵉⴽⴽ, ⵜⵙⵍⵍⴰ ⵚⴰⵏⴹⵕⵉⵍⵍⴰ ⵉ ⵢⴰⵏ ⵓⵎⵙⵍⵉ. ⴷ ⴰⵎⵙⵍⵉ ⵏ ⵍⴰⵍⵍⴰⵙ ⵜⴰⵎⴽⵔⵔⵉⵡⵜ, ⵏⵏⴰ ⴰⵙ ⵉⵏⵏⴰⵏ:
- ⵚⴼⴹ ⵉⵎⵟⵟⴰⵡⵏ ⵏⵏⵎ, ⵇⴰⴷ ⵜⴷⴷⵓⴷ ⵖⵔ ⵜⴼⵓⴳⵍⴰ, ⵓⵙⵉⵖ ⴰⵎ ⵉⵙⵙ.

ⵓⴽⴰⵏ ⵙ ⵢⴰⵏ ⵓⵙⵉⵍⵍⴼ ⵙ ⵜⵖⵔⵓⵢⵜ ⵜⴰⵎⴽⵓⵔⴰⵏⵜ, ⵜⴳⴰ ⵢⴰⵜ ⵜⵖⵙⴰⵢⵜ ⴷ ⵜⴰⴽⵕⵕⵓⵚⵜ ⵜⴰⵎⵏⵏⵓⵔⵖⵜ ⵉⵎⵇⵇⵓⵔⵏ ⵜⴼⴰⵍⴽⵉ ⴰⵟⵟⴰⵚ, ⵜⴳ ⵉⵜⵙⵏ ⵉⵖⵔⴷⴰⵢⵏ ⴷ ⵉⵢⵙⴰⵏ ⵖⵓⴷⴰⵏⵉⵏ, ⵢⴰⵏ ⵡⴰⵢⴷⵉ ⴷ ⴰⵎⵏⴷⴰⵀ ⴷ ⵉⴷⵙⵏ ⵉⴳⵯⵔⴰ ⵉⵎⵥⵢⴰⵏⵏ ⴷ ⵉⵎⴽⵉⵔⵉⵜⵏ.

ⵙ ⵢⴰⵜ ⵜⵢⵜⵉ ⵢⴰⴹⵏ ⵙ ⵜⵖⵔⵓⵢⵜ, ⵓⵎⴰⵏⴻⵏⵜ ⴷ ⴽⵔⴰ ⵏ ⵜⴷⵓⴽⵉⵏ ⵉⵍⵀⴰⵏ ⵏ ⵓⵙⴰⵎⵎⵖ ⵖⴼ ⵜⴹⴰⵕⵉⵏ ⵏⵏⵙ. ⵉⵍⵎⵎⴰ ⵜⵙⵏⴼⵍ ⵜⵎⴽⵔⵔⵉⵡⵜ ⵜⴰⵔⵙⵡⴰⵢⵜ ⵉⵎⴷⴰⵏ ⵜⴳ ⵜⵜ ⴷ ⵢⴰⵜ ⵜⵔⵙⵡⴰⵢⵜ ⵉⴽⵏⴰⵏ ⵉⴳⴰⵏ ⵉ ⵓⴱⴰⵔⴰⵣ ⵏ ⵜⴼⵓⴳⵍⴰ.

ⵓⵎⵉ ⵜⵎⵎⵓⵜⵜⴳ, ⵜⵙⵎⴰⴳⵍ ⵜⵜ ⵜⵎⴽⵔⵔⵉⵡⵜ ⵜⵏⵏⴰ ⴰⵙ:
- ⴰⴷ ⴽⵎ ⵉⵏⵏ ⵓⵔ ⵢⴰⴼ ⵡⴰⵎⵎⴰⵙ ⵏ ⵢⵉⴹ ⴳ ⵓⴱⴰⵔⴰⵣ, ⴰⵛⴽⵓ ⴰⴷ ⴷⴰⵢ ⵉⵍⴽⵎ ⵔⴰⴷ ⴰⴽⴽⵯ ⵏⵖⵓⴱⵓⵏⵜ ⵜⵀⵓⵙⴽⵉⵡⵉⵏ ⴰ ⴰⴽⴽⵯ!
- ⵓⵔ ⵜⵜⴳⴳⵯⴷ ⴰ ⵍⴰⵍⵍⴰ, ⵓⵔ ⵏⵏⵉⵖ ⴰⴷ ⵜⵜⵓⵖ ⴰⵙⵎⵉⴳⵍ ⵏⵏⵎ.

ⵓⴽⴰⵏ ⵜⴰⵎⵥ ⵜⴽⵕⵕⵓⵚⵜ ⴰⴱⵔⵉⴷ ⵖⵔ ⵉⵖⵔⵎ ⴰⴳⵍⴷⴰⵏ.

ⴷⵖⵢⴰ ⵜⴼⴼⵖ ⵜⵜ ⵏⵏ ⵚⴰⵏⴹⵕⵉⵍⵍⴰ ⴳ ⵓⴱⵔⴳⵎⵎⵉ ⵏ ⵓⴳⵍⵍⵉⴷ, ⵢⴰⴼ ⵏⵏ ⵓⴳⵍⴷⵓⵏ ⵎⴰⵙ ⴷ ⵜⴰⵔⴱⴰⵜ ⴰ ⵉⵖⵓⴷⴰⵏ ⵏⵏⴰ ⵓⵔ ⵉⵙⵙⵉⵏ ⴰⵡⴷ ⵢⴰⵏ ⴰ ⵙ ⵢⴰⴷⵍⵍⵉ ⵉⵜⵜⵇⵇⵍ.

ⵉⴷⴷⵎ ⵓⵥⴰⵡⴰⵏ ⵉⵜⵜⵔ ⴰⵙ ⵓⴳⵍⴷⵓⵏ ⴰⴷ ⵉⴷⵙ ⵜⵔⴽⵣ. ⵜⵎⵎⵓⵜ ⵚⴰⵏⴹⵕⵉⵍⵍⴰ ⵙ ⵜⵓⵎⵔⵜ ⴷ ⵓⵎⴷⴰⵣ. ⴰⵔ ⵜⴻⵜⵜⵇⵇⵍ ⴰⴷ ⵜⴰⵡⴹ ⵜⵙⵔⴰⴳⵜ ⵜⵉⵙⵙ ⵢⴰⵏ ⴷ ⵎⵔⴰⵡⵜ ⴷ 45 ⵏ ⵜⵓⵙⴷⵉⴷⵜ. ⵖⴰⵙ ⵜⵍⴽⵎ ⴷⴰⵢ ⵜⵖⴰⵡⵍ ⵜⴼⵜⵓ ⵙ ⴷⵉⴷⴷⴰ ⴷ ⵜⴽⴽⴰ.

ⵜⵙⵏⵉⵎⵎⵔ ⴽⵉⴳⴰⵏ ⵍⴰⵍⵍⴰⵙ ⵜⴻⵜⵜⵔ ⴰⵙ ⴰⴷ ⴰⵙ ⴷⴰⵖ ⵜⴰⵡⵙ ⴰⴷ ⵜⴷⵡⵍ ⵜⵉⴽⴽⵍⵜ ⵢⴰⴹⵏ ⵖⵔ ⵓⴱⴰⵔⴰⵣ ⵏ ⵜⴼⵓⴳⵍⴰ, ⴰⵢⵏⵏⴰ ⵏⵉⵜ ⴰⵢⴷ ⵜⵙⴽⵔ ⴰⵣⴽⴽⴰ ⵏⵏⵙ.

ⵜⴽⵏⴰ ⵓⴳⴳⴰⵔ ⵏ ⵓⵢⵏⵏⴰ ⵉⵣⵔⵉⵏ; ⵢⵓⴼ ⴰⵙ ⵡⴰⵙⵙⴰ ⵉⴹⵍⵍⵉ ⴳ ⵓⴼⵓⵍⴽⵉ. ⵉⵇⵇⵉⵎ ⵓⴳⵍⴷⵓⵏ ⴰⵔ ⴰⴽⵉⴷⵙ ⵉⵜⵜⵔⴽⴰⵣ ⴽⵔⴰ ⵉⵍⴰ ⵢⵉⴹ.

ⵖⵔ ⴰⴳⵣⵣⵓⵎ ⵡⵉⵙ ⵙⵉⵏ (ⴰⵎⴳⴳⴰⵔⵓ): ⵚⴰⵏⴹⵕⵉⵍⵍⴰ (2/2) - ⵜⴰⵙⵓⵖⵍⵜ ⵏ ⵎⵓⵃⵎⵎⴰⴷ ⴱⵍⵍⵖⵣⴰⵍⵉ