ⵓⵙⵙⴰⵏ ⵏ ⵓⵏⵖⵔ, ⵓⵏⴳⴰⵍ ⵏ ⵍⵃⵓⵙⴰⵢⵏ ⵎⵓⵔⴰⴱⵉⵃ

ⵉⴼⴼⵖ ⴷ ⵓⵏⴳⴰⵍ ⴰⴷ ⴳ ⵓⵙⴳⴳⵯⴰⵙ ⵏ 2022/2972 ⵙⴳ ⵜⵥⵕⵉⴳⵉⵏ ⵏ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ, ⴷⴰ ⵉⵙⴰⵡⴰⵍ ⵅⴼ ⵙⵉⵏ ⵉⵡⵔⵉⴽⵏ, ⵉⵙⵎ ⵏⵏⵙⵏ "ⵃⵎⴰⴷ ⵓⵜⵔⵉⵣⵣⵉⵜ" ⵏⵉⵖ "ⴱⵓⵜⵅⵉⵣⵣⵓⵜ" ⴷ "ⴷⴷⴰ ⴱⵍⵍⴰ". ⵉⵖⴰⵎⴰ ⵏⵏ ⴳ ⵢⴰⵏ ⵓⵏⵖⵔ (cave) ⵏ ⵓⴼⴰⵔⵏⵓ ⴷⴼⴼⵉⵔ ⵎⴰ ⴰⴷ ⴷ ⴼⵍⵍⴰⵙ ⵜⴹⵕ ⵜⴳⵯⵍⴰⵙⵜ (ⵜⴰⴷⵓⵍⵉ) ⵏⵏⵙ ⵙ ⵓⵙⵔⴰⴳ ⵏ ⵓⵏⴷⵓⴷⵉ ⵏ ⵡⴰⴽⴰⵍ. ⴰⴽⵓⴷ ⴰⵏⵏ ⴰⴷ ⵔⴰⴷ ⵉⵙⵙⵏⵜⵉ ⴳ ⵜⵔⴼⴰⴼⴰⵏⵜ ⵎⵥⵥⵉⵢⵏ, ⵉⵍⵎⵎⴰ ⵜⴹⴼⵕ ⵜⵜ ⵉⴷ ⵜⵔⴼⴰⴼⴰⵏⵜ ⵎⵇⵇⵓⵔⵏ (ⴷⴼⴼⵉⵔ ⵏ ⵜⵎⵜⵜⴰⵏⵜ ⵏ ⵓⵡⵔⵉⴽ ⵡⵉⵙ ⵙⵉⵏ ⵍⵍⵉ ⵉⴽⴽⴰⵏ ⵚⴹⵉⵚ ⴷ ⵎⵔⴰⵡ ⵏ ⵡⴰⵙⵙ ⴳ ⵓⵏⵖⵔ). ⵜⴰⵍⵍⵉ ⴰⴽⴽⵯ ⵉⵣⵡⴰⵔⵏ; ⴰⴷ ⵉⵙⵎⴰⵜⵜⵉ ⴰⴷⴷⴰⴷ ⵏⵏⵙ ⵙⴳ ⵜⵉⵍⵍⴰⵙ ⵙ ⵜⵉⴼⴰⵡⵜ. ⵍⵍⵉⴳ ⵉⵙⵙⵔⵖⴰ ⵜⵉⴼⴰⵡⵜ ⵏ ⵜⵉⵏⵉⵔⵜ ⴰⴷ ⵙⵙⵏⵜⴰⵏⵜ ⵜⵎⵙⴰⵔⵉⵏ ⵏ ⵡⵓⵏⴳⴰⵍ ⴰⴷ, ⴰⴽⵓⴷ ⵍⵍⵉ ⴳ ⵍⵍⴰⵏ ⵉⴳⴰ 04:10 ⵜⵓⵙⴷⴰⴷⵉⵏ ⵎⴽⴷⴰ ⵜⵎⵎⴰⵍ ⵜⵣⵓⵔⴰⵡⵜ ⵏ ⵓⴼⵓⵙ ⵏ "ⴷⴷⴰ ⴱⵍⵍⴰ", ⵉⴳ ⵉⴹⴳⴰⵎ ⵏⵏⵙ 29 ⴱⵕⴰⵢⵕ 1960 ⵎⴽⵍⵍⵉ ⵏⵙⵙⵏ ⵙⴳ ⵢⵉⵍⵙ ⵏ ⵓⵎⴰⵍⵍⴰⵙ.

ⵉⵙⵙⵎⵔⵙ ⵓⵎⴰⵔⴰ ⵓⵎⵉⵢ ⵏ "ⴳⵓⵔⴷⵣⵉⵍⵍⴰ" ⴰⴼⴰⴷ ⴰⴷ ⵉⵙⵙⵏⵥⵉ ⵓⵎⵏⴰⵏ ⵏ ⵓⵏⴷⵓⴷⵉ ⵏ ⵡⴰⴽⴰⵍ ⴳ ⵓⴳⴰⴷⵉⵔ ⵍⵍⵉ ⴷ ⵢⵉⵡⵉ ⴰⴷ ⵙⵉⵙⵏ ⵉⵏⵏⴰⵍ ⴰⵍⵍⴰⵙ ⵏⵏⵙ, ⵙ ⵓⴼⵉⵍⵎ ⵏ ⴳⵓⴷⵣⵉⵍⵍⴰ ⵍⵍⵉ ⵉⵜⵜⵓⵙⴽⴰⵔⵏ ⴰⵙⴳⴳⵯⴰⵙ ⵏ 1956 ⵍⵍⵉ ⵉⵥⵕⴰ ⵃⵎⴰⴷ ⴷ ⵜⵉⵕⵉⵥⴰ ⴳ ⵙⵓⵍⵉⵎⴰ ⵙⴰⵍⴰⵎ, ⵍⵍⵉ ⴰⵙⵏ ⵉⵙⵔⴳⵏ ⵙ ⵜⵖⵓⵢⵢⵉⵜ ⴳ ⵜⴽⵚⵚⴰⴹ ⵙ ⵜⴰⵣⴰⵜ ⵏ ⵉⵎⵙⵍⵉ ⵍⵍⵉ ⵉⵙⵏⴷⵓⴷⵉⵢⵏ ⵉⵖⵔⴱⴰⵏ ⵏ ⵙⵓⵍⵉⵎⴰ ⵙⴰⵍⴰⵎ. ⵜⴰⵡⴷⴰ ⵍⵍⵉ ⵉⵍⵍⴰⵏ ⴳ ⵃⵎⴰⴷ ⵜⵓⵊⵊⴰ ⵜ ⴰⴷ ⵉⵖⴰⵍ ⵢⴰⴽ ⵓⵔ ⵏⵏ ⴼⵍⵏ ⴽⵔⴰ ⴳ ⵍⵎⵄⵕⵓⴼ ⵏ ⵢⵉⵍⵍ ⵏ ⵙⵉⴷⵉ ⴱⵓⵍⵇⵏⴰⴷⵉⵍ, ⵍⵍⵉ ⵉⵜⵜⵉⵍⵉⵏ ⴽⵓ 15 ⵛⵄⴱⴰⵏ, ⵢⴰⴽ ⵓⵔ ⴷ ⵜⴰⴳⴰⵜ ⴰⴷ ⵉⴽⴽⴰⵜⵏ ⵎⵉⴷⴷⵏ ⵍⵍⵉⴳ ⵜ ⵙⵏⴼⵍⵏ ⵙ ⵓⵍⵎⵓⴳⴳⴰⵔ ⵏ ⵢⵉⵍⵍ ⵍⵍⵉ ⴷ ⵙⴳⴳⵯⵔⴰⵏ ⵉⵕⵓⵎⵉⵢⵏ, ⵉⵜⵜⵉⵍⵉⵏ ⴽⵓ 25 ⵖⵓⵛⵜ. ⵎⴽⴷⴰ ⵉⵙⴰⵔⵏ ⵉ ⴰⵢⵜ ⵛⵉⵏⵡⴰ ⵉⴳ ⴰⵙ ⵓⵔ ⵏⴳⴼⵏ ⵢⴰⵜ ⵙⴳ ⵜⵔⴱⴰⵜⵉⵏ ⵏ ⵓⵙⵓⵏ, ⴰⵔ ⴷ ⵙⵉⵙⵏ ⵉⵜⵜⴼⴼⴰⵖ ⴳⵓⴷⵣⵉⵍⵍⴰ. ⴰⵏⵖⵔ ⴰⴷ ⵍⵍⵉ ⴼⵍⵍⴰⵙⵏ, ⵉⵔⴷⵍⵏ, ⵉⵚⴽⴰ ⵜ ⵢⴰⵏ ⵓⵙⵔⴷⴰⵙ ⴰⵕⵓⵎⵉ, ⵉⵣⵣⵏⵣ ⵜ ⵉ ⴱⴰⴱⴰⵙ ⵏ ⵃⵎⴰⴷ ⵍⵍⵉⴳ ⵉⴼⴼⵓⵖ ⵜⴰⵎⴰⵣⵉⵔⵜ. ⵜⵙⵔⴳ ⵉ ⵜⵓⵙⴽⴰ ⵏⵏⵙ ⵢⴰⵜ ⵜⵎⵙⴰⵔⵜ ⵏ ⵓⵎⵣⵔⵓⵢ, ⵍⵍⵉⴳ ⴷ ⵉⵙⴱⴷⴷ ⵓⵍⵉⵎⴰⵏ ⴰⵖⵔⵔⴰⴱⵓ ⴱⴰⵏⵜⵔ (panther) ⴳ ⵓⴼⵜⴰⵙ ⵏ ⵓⴳⴰⴷⵉⵔ, ⵉⵙⵙⵎⴷⵉ ⵉⵏⴼⴹⵏ ⵏⵏⵙ ⵙ ⴼⵓⵏⵜⵉ ⴷ ⵓⴳⴰⴷⵉⵔ ⵏ ⵓⴼⵍⵍⴰ, ⵜⴻⵜⵜⵓⵙⵙⴰⵏ ⵜⴷⵢⴰⵏⵜ ⴰⴷ ⴳ ⵓⵎⵣⵔⵓⵢ ⵙ "ⴰⵎⵓⴽⵔⵉⵙ ⵏ ⵓⴳⴰⴷⵉⵔ" ⴰⵙⴳⴳⵯⴰⵙ 1911, ⵏⵜⵜⴰⵜ ⵏⵉⵜ ⴰⴷ ⵉⵙⵔⴳⵏ ⵉ ⵢⵉⵎⵏⵖⵉ ⴰⵎⴰⴹⵍⴰⵏ ⴰⵎⵣⵡⴰⵔⵓ 1914.

ⵓⵏⴳⴰⵍ ⴰⴷ ⵢⵓⵙⵉ ⴳⵔ ⵜⴼⵍⵡⵉⵏ ⵏⵏⵙ ⵜⵓⴳⵜ ⵏ ⵉⴷⵖⴰⵔⵏ ⵏ ⵓⴳⴰⴷⵉⵔ ⴳ ⵓⵙⴳⴳⵯⴰⵙ ⵏ 1960, ⵖ ⵉⴳⴰ: ⵉⵎⵙⴳⴳⵉⵏⵏ, ⵉⴷⴰ ⵓⵜⴰⵏⴰⵏ, ⵙⵓⵍⵉⵎⴰ ⵙⴰⵍⴰⵎ, ⵉⵃⵛⴰⵛ, ⵜⴰⵍⴱⵕⵊⵜ, ⵍⴱⴰⵟⵡⴰⵕ, ⵓⵙⵓⵏ ⵏ ⴰⵢⵜ ⵓⴳⵔⵔⴰⵎ, ⵜⴰⵎⵔⴰⵖⵜ, ⴰⵡⵔⵉⵔ, ⴰⵢⵜ ⴰⵎⵔ, ⴰⵏⵥⴰ, ⴼⵓⵏⵜⵉ, ⴰⴳⴰⴷⵉⵔ ⵏ ⵓⴼⵍⵍⴰ...

ⴳ ⵓⴳⵏⵙ ⵏ ⵓⵏⵖⵔ, ⵜⵉⵏⵉⵔⵜ ⵍⵍⵉ ⵉⵙⵙⵔⵖⴰ ⵃⵎⴰⴷ ⴰⴼⴰⴷ ⴰⴷ ⵢⴰⴼ ⵎⴰⵏⵉ ⴷ ⵜⴽⴽⴰ ⵜⵏⴷⵔⴰ ⵏ ⴷⴷⴰ ⴱⵍⵍⴰ ⵍⵍⵉ ⵅⴼ ⵉⴹⵕ ⵓⴼⵏⵉⵇ, ⵉⵕⵥ ⵜ ⴳ ⵓⴹⴰⵕ ⴰⵥⵍⵎⴰⴹ, ⴳⴰⵏⵜ ⵜⵉⵍⵍⵉ ⵙⵏⴼⴰⵍⵏ ⵉⵎⵖⴰⵔⵏ ⵏ ⵙⵉⴷⵉ ⴱⵓⵍⵇⵏⴰⴷⵉⵍ ⴷ ⵙⵉⴷⵉ ⵏⴱⵉⵔ ⴷ ⵙⵉⴷⵉ ⴱⵓⵕⵕⵊⴰ ⵙ ⵜⵏⴳⵯⴰⵍ ⵏ ⵓⵖⵔⵓⵎ, ⵎⴰⵛⵛ ⵎⵇⵇⴰⵔ ⵎⴽⴰⵏⵏ, ⵜⵉⵏⵉⵔⵜ ⴰⴷ ⵜⵥⴹⴰⵕ ⴰⴷ ⴰⵙⵏ ⵜⴳ ⴰⴳⵯⵔⵉ, ⵜⵉⵣⵉ ⵍⵍⵉ ⵉⵙⵡⴰⵏⴳⵎ ⵃⵎⴰⴷ ⴳ ⴽⵕⴰⴹⵜ ⵜⵖⴰⵡⵙⵉⵡⵉⵏ ⵉⵇⵇⴰⵏ ⴷ ⴰⴷ ⵙⵉⵙⵏⵜ ⵉⵙⵙⴽⵙⴰ: ⵓⴽⵙⵉⵊⵉⵏ, ⴰⵎⴰⵏ, ⴰⵎⵜⵛⵓ... ⵜⴰⵍⵍⵉ ⴱⴰⵀⵔⴰ ⵉⵍⴰⵏ ⴰⵜⵉⴳ ⵉⴳⴰ ⵜⵜ ⵓⴽⵙⵉⵊⵉⵏ.

ⵙ ⵜⵓⵜⵍⴰⵢⵜ ⵉⴼⵙⵙⵓⵙⵏ, ⵉⵎⵎⵉⵎⵏ, ⴰⵔ ⵏⵏ ⵏⵜⵜⴰⴼⴰ ⵉⵅⴼⴰⵡⵏ ⵏⵏⵖ ⴷⴰⵜ ⵢⴰⵏ ⵓⴹⵕⵉⵚ ⵉⵎⵎⴰⵍⵏ ⵜⴰⵖⴰⵔⴰ ⵏ ⵓⴼⴳⴰⵏ ⵉⵎⵎⴰⵜⵜⵉⵏ ⵙⴳ ⵍⵍⵉⵖ ⵉⵜⵜⵖⵉ ⵙ ⵜⵓⴷⵔⵜ, ⴰⵏⴰⵔⵓⵣ, ⴰⴳⴰⵏⵉ, ⵜⴰⵏⵣⴱⴰⵢⵜ, ⴰⵎⵢⴰⵡⴰⵙ, ⵜⵉⴽⵚⵚⴰⴹ, ⵜⴰⵡⴷⴰ, ⴰⵙⵎⵎⵏⴷⵓ ⵏ ⵉⵎⵚⵟⵉⵕⵏ ⵙ ⵓⵏⵍⵍⵉ ⴷ ⵓⵏⵣⴳⵓⵎ ⵉ ⵓⵙⴽⴽⴰ, ⵙ ⵡⴰⴷⴷⴰⴷ ⵢⴰⴹⵏ ⴰⵏⵉⵎⴰⵏ ⴹⴰⵕⴰⵜ ⵎⴰ ⴰⴷ ⵉⵎⵎⵓⵜ "ⴷⴷⴰ ⴱⵍⵍⴰ" ⴳ ⵜⴳⴰ ⵜⴳⵓⴹⵉ, ⵜⴰⵎⵜⵜⴰⵏⵜ, ⵜⴰⵣⴰⵎⵎⴰ, ⵜⵓⴷⵔⵜ ⵏ ⵜⵎⴹⵍⵜ, ⵜⴰⵡⴽⴽⴰ, ⴰⴽⵔⵔⴰⵎ, ⵜⴰⵣⵖⵍⵉⵍⵜ, ⵜⴰⵎⴰⴹⵓⵏⵜ, ⴰⵏⴳⴰⵥ, ⵜⵉⵎⵣⵔⵉⵜ, ⵜⴰⵍⴽⴽⴰⴽⵜ ⴷ ⵓⵙⵉⵜⵎ ⵏ ⵜⵎⵜⵜⴰⵏⵜ. ⴰⵢⴰⴷ ⴰⴽⴽⵯ ⵙ ⵢⴰⵏ ⵓⵙⵓⵍⴼ ⵉⵜⵜⵢⴰⵔⴰⵏ ⵙ ⵜⵖⴰⵔⴰⵙⵜ ⵏ ⵓⵙⵉⵏⴰⵔⵢⵓ, ⵣⵓⵏ ⴰⵔ ⵜⵥⵕⵕⴰⵜ ⴽⵔⴰ ⵏ ⵓⴼⵉⵍⵎ.

ⵚⴰⵍⵃ ⴰⵢⵜ ⵚⴰⵍⵃ