ⵚⴹⵉⵚⵜ ⵜⵖⴰⵔⴰⵙⵉⵏ ⴼⴰⴷ ⵉⵎⵢⵓⵔⵏ ⵡⴰⵣⵣⴰⵏⵏ ⵜⵉⵖⵔⵉ

ⵜⴷⵔⵓⵙ ⵜⵖⵔⵉ ⴷⴰⵔ ⵉⵏⵍⵎⴰⴷⵏ ⴳ ⵓⵣⵎⵣ ⴰⴷ, ⵓⵔ ⵙⵓⵍ ⵉⴳⵉ ⵡⴰⴷⴷⴰⴷ ⵎⴽⵍⵍⵉ ⵢⴰⴷⵍⵍⵉ ⵉⴳⴰ, ⴰⵔ ⵢⴰⴷⵍⵍⵉ ⵣⵣⵔⴰⵢ ⵜⴰⵔⵡⴰ ⵜⵉⵣⵉ ⵏⵏⴰ ⴰⵙⵏ ⴷ ⵉⵛⵉⴹⵏ ⴳ ⵜⵖⵔⵉ ⵏ ⵜⵓⵍⵍⵉⵙⵉⵏ, ⵜⵉⵏⴼⵓⵙⵉⵏ, ⵓⵎⵎⵉⵢⵏ ⴷ ⵎ'ⴰⴷ ⵜⵏ ⵉⵔⵡⴰⵙⵏ. ⵖⵉⵍⴰ ⵓⵀⵓ, ⵜⵉⵣⵉ ⵏⵏⴰ ⴰⵙⵏ ⴷ ⵉⵛⵉⴹⵏ ⴰⵔ ⵜⵜ ⵊⵊⵍⴰⵡⵏ ⴳ ⵉⵥⴹⵡⴰⵏ ⵏ ⵓⵎⵙⴰⵡⴰⴹ ⴰⵏⴰⵎⵓⵏ ⴷ ⵜⵙⵏⵙⵉⵡⵉⵏ ⵏ ⵡⵓⵔⴰⵔⵏ ⵉⵍⵉⴽⵕⵓⵏⴰⵏⵏ ⴳ ⵉⵜⵉⵍⴼⵓⵏⵏ ⴷ ⵡⴰⵍⵍⴰⵍⵏ ⵉⵎⵉⵖⵉⵙⵏ.

ⴰⵢⴰ, ⵓⵔ ⴳⵉⵙ ⵜⵓⵔⴷⴰ, ⴰⵔ ⵢⴰⴽⴽⴰ ⴰⵏⴰⵡ ⵏ ⵉⵏⵍⵎⴰⴷⵏ ⴷ ⵉⵎⵖⵔⵉⵜⵏ ⵍⵍⵉ ⵓⵔ ⵥⴹⴰⵕⵏⵉⵏ ⴰⴷ ⴰⵇⵔⴰⵏ ⵙ ⵜⴼⵙⵙⵉ ⵓⵍⴰ ⴰⴷ ⴰⵔⴰⵏ ⵎⵇⵇⴰⵔ ⴷ ⵢⴰⵏ ⵓⴳⵟⵟⵓⵎ ⴱⵍⴰ ⵜⵉⵣⴳⴰⵍⵉⵏ, ⴰⵛⴽⵓ ⵓⵔ ⵎⵢⴰⵔⵏ ⵜⵉⵖⵔⵉ ⵙⴳ ⵜⵎⵥⵉⵢⵜ ⵏⵏⵙⵏ.

ⴳ ⵓⵎⵏⵉⴷ ⵏ ⵜⵎⵓⴽⵔⵉⵙⵉⵏ ⴷ ⵉⵏⴰⵥⴰⵕⵏ ⴰⴷ ⵍⵍⵉ ⵉⵜⵜⵎⵏⴰⵍⴰⵏ ⵉⵏⵍⵎⴰⴷⵏ, ⵉⵇⵇⴰⵏ ⴷ ⴰⴷ ⴰⵙⵏ ⴰⵡⵙⵏ ⵉⵎⴰⵔⴰⵡⵏ ⵏⵏⵙⵏ ⴼⴰⴷ ⵉⵎⵢⵓⵔⵏ ⵜⵉⵖⵔⵉ. ⵉⵍⵉⵏⵜ ⵜⵓⴳⵜ ⵏ ⵜⵖⴰⵔⴰⵙⵉⵏ ⵍⵍⵉ ⵔⴰⴷ ⵢⴰⵡⵙ ⵉ ⵉⵎⵡⴰⵔⴰⵡⵏ ⴼⴰⴷ ⵙⵙⵉⵎⵢⵓⵔⵏ ⵜⵉⵖⵔⵉ ⵉ ⵜⴰⵔⵡⴰ ⵏⵏⵙⵏ. ⵔⴰⴷ ⴳⵉⵙⵏⵜ ⵏⴱⴷⵔ ⵙⵎⵎⵓⵙⵜ.

1. ⵥⵍⵉⵢⴰⵜ ⵢⴰⵜ ⵜⵖⵎⵔⵜ ⵉ ⵜⵖⵔⵉ ⴳ ⵓⴳⵏⵙ ⵏ ⵜⴳⵎⵎⵉ. ⵙⵔⵙⴰⵜ ⴳⵉⵙ ⴰⵏⴰⵡⵏ ⵏ ⵉⴷⵍⵉⵙⵏ, ⵜⵉⵙⵖⵓⵏⵉⵏ, ⵉⵖⵎⵉⵙⵏ, ... ⵙⵔⵙⴰⵜ ⴳⵉⵙ ⴰⵡⴷ ⵉⵎⴰⵡⴰⵍⵏ ⴷ ⵉⵙⵓⵎⴰ, ⵉⵖ ⴷⴰⵔⵓⵏ ⵍⵍⴰⵏ, ⵜⴰⵊⵊⵎ ⵜⴰⵔⵡⴰ ⴰⴷ ⵜⵏ ⴰⵇⵔⴰⵏ, ⵓⵔ ⴷ ⴰⴷ ⵜⵏ ⴽⴰ ⵜⵙⵔⵙⵎ ⵉ ⵓⴷⵉⴽⵓⵕ.

2. ⴰⵔ ⴰⵇⵔⴰⵢⴰⵜ ⴳ ⵓⵎⵏⵉⴷ ⵏ ⵜⴰⵔⵡⴰ ⵏⵏⵓⵏ. ⴰⵊⵊ ⵉⴳⵉⵜⵏ ⵏⵏⵓⵏ ⴰⴷ ⵙⴰⵡⴰⵍ ⵓⴳⴳⴰⵔ ⵏ ⵉⵡⵏⵏⵉⵜⵏ ⵏⵏⵓⵏ. ⵉⵖ ⴽⵯⵏ ⵥⵕⴰⵏ ⵜⴰⵔⵡⴰ ⴰⵔ ⵜⴰⵇⵔⴰⵎ, ⵔⴰⴷ ⵉⵔⵉⵏ ⴰⵡⴷ ⵏⵜⵜⵏⵉ ⴰⴷ ⴰⵇⵔⴰⵏ.

3. ⵙⵜⵉⵢⴰⵜ ⵢⴰⵜ ⵜⵉⵣⵉ ⵜⵎⵓⵏⵎ ⴰⴽⴽⵯ ⴳⵉⵙ ⵉ ⵜⵖⵔⵉ. ⵢⴰⵜ ⵜⵉⵣⵉ ⴰⴷ ⴰⴽⴽⵯ ⴳⵉⵙ ⵎⵓⵏⵏ ⵉⴳⵎⴰⵎⵏ ⵏ ⵜⵡⵊⴰ ⴳ ⵢⴰⵏ ⵉⴳⵉⵡⵔ ⵉⵥⵍⵉⵏ ⵉ ⵜⵖⵔⵉ, ⵎⴽⵍⵍⵉ ⴰⴱⴷⴰ ⵜⵜⴳⵉⵡⵉⵔⵏ ⴹⵓⴼⵏ ⴰⵜⵉⵍⵉⴼⵉⵣⵢⵓⵏ, ⵢⴰⵜ ⵜⴽⴽⵍⵉⵜ ⵏⵖ ⵙⵏⴰⵜ ⴳ ⵉⵎⴰⵍⴰⵙⵙ ⴰⴷ ⵎⵓⵏⵏ ⵉ ⵜⵖⵔⵉ.

4. ⴰⵔ ⵜⵜⵎⵓⵏⴰⵜ ⴷ ⵜⴰⵔⵡⴰ ⵏⵏⵓⵏ ⵖⵔ ⵜⵙⴷⵍⵉⵙⵜ. ⵎⵓⵏⴰⵜ ⴷⵉⴷⵙⵏ ⵢⴰⵜ ⵜⴽⴽⵍⵉⵜ ⵏⵖ ⵙⵏⴰⵜ ⴽⵔⴰⵢⴳⴰⵜ ⴰⵢⵢⵓⵔ ⵙ ⴽⵔⴰ ⵜⵙⴷⵍⵉⵙⵜ, ⴼⴰⴷ ⵙⵙⵏⵏ ⴰⵏⴰⵡⵏ ⵏ ⵉⴷⵍⵉⵙⵏ, ⵜⵙⵖⵎ ⴰⵙⵏ ⵢⴰⵏ ⵏⵖ ⵙⵉⵏ, ⵎⴰⵛⵛ ⴰⵊⵊⴰⵜ ⵜⵏ ⴰⴷ ⵙⵜⵉⵏ ⵡⴰⵏⵏⴰ ⵔⴰⵏ.

5. ⴷⵔⵓⵢⴰⵜ ⴷⵉⴷⵙⵏ ⵜⵉⵖⵔⵉ ⵏ ⵜⵙⵖⵓⵏⵉⵏ ⴷ ⵉⵖⵎⵉⵙⵏ. ⵉⵖ ⴰⵔ ⵜⴰⵇⵔⴰⵎ ⵜⵉⵙⵖⵓⵏⵉⵏ ⴷ ⵉⵖⵎⵉⵙⵏ, ⴰⵔ ⴰⵙⵏ ⵜⵎⵎⴰⵍⵎ ⵉⴽⴰⵔⵉⴽⴰⵜⵓⵔⵏ ⴷ ⵉⵏⵖⵎⵉⵙⵏ ⵙⴹⵚⴰⵏⵉⵏ, ⴰⵔ ⵜⵏ ⵜⵙⵇⵙⴰⵎ ⵖⴼ ⵜⴳⵓⵔⵉⵡⵉⵏ ⵜⵜⵓⵙⵡⴰⵍⴰⵏⵉⵏ, ⵎⵇⵇⴰⵔ ⵜⵙⵙⵏⵎ ⵜⴰⵎⵔⴰⵔⵓⵜ.

6. ⴰⵔ ⴰⵇⵔⴰⵢⴰⵜ ⵉ ⵜⴰⵔⵡⴰ ⵏⵏⵓⵏ ⴷⴰⵜ ⴰⴷ ⴳⵯⵏⵏ ⵜⴼⵓⵍⴽⵉ ⵜⵖⵔⵉ ⵏ ⵜⵏⴼⴰⵙ, ⵓⵎⵎⵉⵢⵏ, ⵜⵉⴷⵎⵉⵏⵉⵏ, ⴷ ⵜⵣⵍⴰⵜⵉⵏ ⵉ ⵡⴰⵣⵣⴰⵏ ⴳ ⵢⵉⴹ ⴷⴰⵜ ⵏ ⵜⴳⵓⵏⵉ, ⴰⵔ ⴳⵉⵙ ⵜⵙⵎⵓⵙⵙⵓ ⵜⴰⵢⵔⵉ ⵏ ⵜⵖⵔⵉ ⴷ ⵓⵙⵙⴼⴷ ⴷ ⵓⵔⵣⵣⵓ.

ⵍⵍⴰⵏⵜ ⵜⵓⴳⵜⵜ ⵏ ⵜⵖⴰⵔⴰⵙⵉⵏ ⵢⴰⴹⵏⵉⵏ, ⵔⴰⴷ ⵙⵓⵍ ⴼⵍⵍⴰⵙⵏⵜ ⵏⵙⴰⵡⵍ ⴳ ⵜⵥⵕⵉⴳⵉⵏ ⴷ ⵉⴷⴷⴰⵏ.