ⴰⴷⵖⴰⵔ ⴰⴷⵔⵣⴰⵏ ⵏ ⵡⴰⵍⵉⵍⵉ

ⵜⴰⵎⴷⵉⵏⵜ ⵏ ⵡⴰⵍⵉⵍⵉ

ⵜⴳⴰ ⵡⴰⵍⵉⵍⵉ ⵢⴰⵜ ⵜⵎⴷⵉⵏⵜ ⵜⴰⵎⴰⵣⵉⵖⵜ ⵜⴰⵣⴰⵢⴽⵓⵜ, ⵜⴻⵜⵜⵓⵥⴽⴰ ⴳ ⵜⴰⵙⵓⵜ ⵜⵉⵙⵙ ⴽⵕⴰⴹⵜ ⵏⵖ ⴷ ⵜⵉⵙⵙ ⴽⴽⵓⵥⵜ ⴷⴰⵜ ⵏ ⵜⵍⴰⵍⵉⵜ, ⵜⴳⴰ ⵢⴰⴷⵍⵍⵉ ⵜⴰⵎⴰⵥⵓⵏⵜ ⵏ ⵜⴳⵍⴷⵉⵜ ⵏ ⵎⵓⵔⵉⵟⴰⵏⵢⴰ. ⵜⴳⴰ ⵖⵉⵍⴰⴷ ⵢⴰⵏ ⵙⴳ ⵉⴷⵖⴰⵔⵏ ⵉⴷⵔⵣⴰⵏⵏ ⵉⵏⴼⵔⴰⵔⵏ ⴳ ⵡⴰⵎⵓⵔ ⵏ ⵡⴰⴽⵓⵛ, ⵉⵍⵍⴰ ⴳ ⵓⵣⴰⵖⴰⵔ ⵏ ⵙⴰⵢⵙ ⵉⴹⴼⵕⵏ ⵉ ⵜⴳⵔⴰⵡⵜ ⵜⴰⵎⵓⵔⴰⵏⵜ ⵏ ⵡⴰⵍⵉⵍⵉ ⴳ ⵜⵙⴳⴰ ⵏ ⵎⴽⵏⴰⵙ.

ⴳ ⵜⴰⵙⵓⵜ ⵜⵉⵙⵙ 8 ⵉⵙⵙⵏⵜⴰ ⴳⵉⵙ ⵉⴷⵔⵉⵙ ⵉⴱⵏ ⵄⴰⴱⴷⵓⵍⵍⴰⵀ ⴰⵏⴱⴰⴹ ⵏ ⴰⵢⵜ ⴷⵔⵉⵙ ⴳ ⵓⵎⵓⵔⴰⴽⵓⵛ, ⴳ ⵜⴰⵙⵓⵜ ⵜⵉⵙⵙ 11 ⴼⵍⵏ ⵜⵜ ⵉⵎⵣⴷⴰⵖⵏ ⴰⵍⵍⵉⴳ ⵉⵎⵎⵓⵜⵜⵢ ⵓⵏⴱⴰⴹ ⵏ ⴰⵢⵜ ⴷⵔⵉⵙ ⵙ ⵜⵎⴷⵉⵏⵜ ⵏ ⴼⴰⵙ, ⵜⵓⴳⵜⵜ ⵏⵏⵙⵏ ⵎⵎⵓⵜⵜⵉⵏ ⵙ ⵜⵎⴷⵉⵏⵜ ⵏ ⵎⵓⵍⴰⵢ ⴷⵔⵉⵙ ⵥⵕⵀⵓⵏ.

ⵙⵙⵏⵜⴰⵏ ⴳⵉⵙ ⵉⵔⵣⵣⵓⵜⵏ ⵉⵔⴽⵢⵓⵍⵓⵊⵉⵜⵏ ⵙⴳ ⵜⵉⵣⵡⵉⵔⵉ ⵏ ⵜⴰⵙⵓⵜ ⵜⵉⵙⵙ 20, ⴰⵢⵍⵍⵉ ⴳⵉⵙ ⵉⵜⵜⵢⴰⴼⴰⵏ ⵢⵓⵊⵊⴰ ⵜⵜ ⴰⴷ ⵜⴻⵜⵜⵓⵣⵎⵉⵎ ⴳ ⵜⵍⴳⴰⵎⵜ ⵏ ⵉⴷⵖⴰⵔⵏ ⵉⵎⴰⴹⵍⴰⵏⵏ ⵏ ⵢⵓⵏⵉⵙⴽⵓ ⴰⵙⴳⴳⵯⴰⵙ 1997.

ⴰⵥⵓⵕ ⵏ ⵢⵉⵙⵎ: ⵡⴰⵍⵉⵍⵉ

ⵜⵓⴳⵜⵜ ⵏ ⵉⵎⵔⵣⴰ ⵓⵔⵎⵏ ⴰⴷ ⵙⵙⴼⵔⵓⵏ ⵉⵙⵎ ⵏ ⵡⴰⵍⵉⵍⵉ ⵙⴳ ⵜⴳⵓⵔⵉ ⵜⴰⵍⴰⵜⵉⵏⵉⵜ [ⵡⵓⵍⵉⴱⵓⵍⵉⵙ], ⵏⵖ ⵙⴳ ⵉⵖⴱⵓⵍⴰ ⴰⵄⵕⴰⴱⵏ, ⵣⵓⵏⴷ ⵛⴰⵔⵍ ⵊⵓⵣⵉⴼ ⵜⵉⵙⵓ (1828–1884) ⵍⵍⵉ ⵉⵏⵏⴰⵏ ⵎⴰⵙ ⵜⴻⵜⵜⵓⴱⴷⴰⵔ ⵡⴰⵍⵉⵍⵉ ⴳ ⴽⵔⴰ ⵏ ⵉⵖⴱⵓⵍⴰ ⴰⵄⵕⴰⴱⵏ ⵙ ⵢⵉⵙⵎ (ⵇⴰⵚⵕ ⴼⴰⵔⵄⵓⵏ = ⵉⵖⵔⵎ ⵏ ⴼⵔⵄⵓⵏ), ⵜⵜⵓⵏ ⵏⵖ ⴷ ⵓⵔ ⵔⵉⵏ ⴰⴷ ⵔⵣⵓⵏ ⵙ ⵓⵏⴰⵎⴽ ⴳ ⵜⴷⵍⵙⴰ ⴷ ⵜⵓⵜⵍⴰⵢⵜ ⵏ ⵉⵎⵣⴷⴰⵖⵏ ⵉⵥⵖⵓⵕⴰⵏⵏ ⵏ ⵓⴷⵖⴰⵔ, ⴰⵢⵍⵍⵉ ⵢⵓⵊⵊⴰⵏ ⴰⵥⵓⵕ ⵏ ⵢⵉⵙⵎ ⵓⵔ ⵉⵜⵜⵢⴰⵡⵙⵙⴰⵏ ⵙ ⵜⵏⵖⴷⴰ, ⵎⴰⵛⵛ ⵉⵔⵡⴰⵙ ⵉⵙ ⴰⵔ ⵉⵜⵜⵓⵔⵔⴰⵢ ⵙ ⵜⴳⵓⵔⵉ ⵜⴰⵎⴰⵣⵉⵖⵜ "ⵡⴰⵍⵉⵍⵜ" ⵏⵏⴰ ⵉⴳⴰⵏ ⵢⴰⵏ ⵉⵎⵖⵉ ⴰⵔ ⵉⵜⵜⵎⵖⴰⵢ ⴳ ⵜⴰⵎⵡⵉⵏ ⵏ ⵡⴰⵍⵉⵍⵉ. ⵎⴽⵍⵍⵉ ⵉⵥⴹⴰⵕ ⵢⵉⵙⵎ ⵏ ⵡⴰⵍⵉⵍⵉ ⴰⴷ ⴷⴰⵔⵙ ⵜⵉⵍⵉ ⵜⵣⴷⴰⵢⵜ ⴰⵡⴷ ⴰⴽⴷ ⵢⵉⵙⵎ ⵏ ⵢⴰⵜ ⵜⵡⵙⵉⵜ ⵜⴰⵎⴰⵣⵉⵖⵜ ⴱⴷⵔⵏ ⵜⵜ ⵉⵎⵔⵣⴰ ⵏ ⵓⵎⵣⵔⵓⵢ ⵉⵕⵓⵎⵉⵢⵏ ⵙ ⵢⵉⵙⵎ "ⵓⵍⵓⴱⵉⵍⵉⵜⴰⵏⵉ".

ⴰⴷⵖⴰⵔ ⵏ ⵡⴰⵍⵉⵍⵉ

ⵜⴻⵜⵜⵓⵥⴽⴰ ⵜⵎⴷⵉⵏⵜ ⵏ ⵡⴰⵍⵉⵍⵉ ⴳ ⵓⵖⵍⵍⴰ ⵏ ⵓⴷⵔⴰⵔ ⵏ ⵥⵕⵀⵓⵏ ⵜⴰⵎⴰ ⵏ ⵡⴰⵙⵉⴼ ⵏ ⵅⵓⵎⴰⵏ ⴷ ⵡⴰⵙⵉⴼ ⵏ ⴼⵕⵟⴰⵚⴰ, ⵜⵍⴽⵎ ⵜⵊⵓⵎⵎⴰ ⵏⵏⵙ 42 ⵀⵉⴽⵜⴰⵔ, ⵜⴰⴳⴳⵓⴳ ⵙ 3 ⵉⴷ ⴽⵉⵍⵓⵎⵉⵜⵔ ⵅⴼ ⵜⵎⴷⵉⵏⵜ ⵏ ⵎⵓⵍⴰⵢ ⴷⵔⵉⵙ ⵥⵕⵀⵓⵏ, 30 ⵉⴷ ⴽⵉⵍⵓⵎⵉⵜⵔ ⵅⴼ ⵜⵎⴷⵉⵏⵜ ⵏ ⵎⴽⵏⴰⵙ, ⴷ 63 ⵉⴷ ⴽⵉⵍⵓⵎⵉⵜⵔ ⵅⴼ ⵜⵎⴷⵉⵏⵜ ⵏ ⴼⴰⵙ. ⵍⵍⴰⵏ ⵜⴰⵎⴰ ⵏⵏⵙ ⴽⵔⴰ ⵏ ⵉⵣⴰⵖⴰⵔⵏ ⵎⵓ ⵉⴼⵓⵍⴽⵉ ⵡⴰⴽⴰⵍ ⵏⵏⵙⵏ, ⴰⵔ ⵙⵎⵖⴰⵢⵏ ⴰⵏⴰⵡⵏ ⵏ ⵡⴰⴷⴷⴰⴳⵏ, ⵙ ⵍⴰⵡⴰⵏ ⴰⴽⴽⵯ ⴰⴷⴷⴰⴳⵏ ⵏ ⵓⵣⵎⵎⵓⵔ ⵏⵏⴰ ⵉⴳⴰⵏ ⵜⴰⵔⵙⵍⵜ ⵏ ⵜⴷⵎⵙⴰ ⴳ ⵜⵙⴳⴰ.

ⴰⵎⵣⵔⵓⵢ ⵏ ⵡⴰⵍⵉⵍⵉ

ⵉⴽⴽⴰ ⵜⵜ ⵏⵏ ⵓⴷⵖⴰⵔ ⵉⵙⵙⵓⵜⵍⵏ ⵉ ⵡⴰⵍⵉⵍⵉ ⵉⵜⵜⵓⵣⴷⴰⵖ ⵙⴳ ⵓⵣⵎⵣ ⴰⵜⵍⴰⵏⵜⵉ ⴷ ⵓⵏⵢⵓⵍⵉⵜⵉ, ⴰⵜⵜⴰⵢ ⵏ 5.000 ⵏ ⵉⵙⴳⴳⵯⴰⵙⵏ ⴰⵢⴰ. ⵉⵔⵣⵣⵓⵜⵏ ⵉⵔⴽⵢⵓⵍⵓⵊⵉⵜⵏ ⵜⵜⵓⵙⴽⴰⵔⵏⵉⵏ ⴳ ⵓⴷⵖⴰⵔ ⵏ ⵡⴰⵍⵉⵍⵉ ⵙⴷⵓⴳⴳⴰⵏ ⴷ ⴽⵔⴰ ⵉⴷⵇⵇⵉ ⵎⵉ ⵉⵜⵜⵓⵔⵔⴰⵢ ⵓⵙⴰⴽⵓⴷ ⴰⵔ ⴰⵣⵎⵣ ⴰⵏⵢⵓⵍⵉⵜⵉ, ⵉⵔⵡⴰⵙ ⴽⵔⴰ ⵏ ⵉⴳⵣⵎⴰⵏ ⵜⵜⵢⴰⴼⴰⵏⵉⵏ ⴳ ⵉⴱⵉⵔⵢⴰ. ⴽⴽⴰⵏ ⵜⵜ ⵏⵏ ⴳⵉⵙ ⵉⵇⴰⵔⵟⴰⵊⵉⵢⵏ ⴳ ⵜⴰⵙⵓⵜ ⵜⵉⵙ 8, ⴰⵢⴰ ⵎⵍⴰⵏⵜ ⵜ ⴽⵔⴰ ⵏ ⵜⵎⵉⵜⴰⵔ ⵍⵍⵉ ⵖⵉⵏⵏ ⴼⵍⵏ, ⵣⵓⵏ ⴷ ⵉⵅⵔⴱⴰⵏ ⵏ ⵍⵎⴰⵄⴱⴰⴷ ⵏ ⵡⴰⴽⵓⵛ ⴱⴰⵄⵍ, ⵉⴷⵇⵇⵉ ⵏⵏⵙⵏ ⴷ ⴽⵔⴰ ⵏ ⵉⵥⵕⴰⵏ ⴳ ⴳⵣⵉⵏ ⵜⵉⵔⵔⴰ ⵏⵏⵙⵏ ⵙ ⵜⵓⵜⵍⴰⵢⵜ ⵜⴰⴼⵉⵏⵉⵇⵉⵢⵜ.

ⵜⴽⵛⵉⵎ ⵜⵎⴷⵉⵏⵜ ⵏ ⵡⴰⵍⵉⵍⵉ ⴳ ⵜⴳⵍⴷⵉⵜ ⵏ ⵎⵓⵔⵉⵜⴰⵏⵢⴰ ⴷⴷⵓ ⵜⵏⴱⴰⴹⵜ ⵏ ⵉⵕⵓⵎⵉⵢⵏ ⴹⴼⴼⵉⵕ ⵜⴰⴹⵓⵕⵉ ⵏ ⵇⴰⵕⵟⴰⵊ ⴳ ⵓⵙⴳⴳⵯⴰⵙ 146 ⴷⴰⵜ ⵏⵜⵍⴰⵍⵉⵜ. ⵜⵙⵓⵍ ⵜⵣⵔⵉⵔⵜ ⵏ ⵉⴼⵉⵏⵉⵇⵉⵢⵏ ⴳ ⵡⴰⵍⵉⵍⵉ ⵎⵏⵏⴰⵡ ⵉⵙⴳⴳⵯⵙⵏ ⵅⴼ ⴰⵍⵍⵉⵖ ⵢⴰⴷ ⵜⵍⵍⴰ ⴷⴷⵓ ⵉⴼⴰⵙⵏ ⵏ ⵉⵕⵓⵎⵉⵢⵏ, ⴳ ⵉⵎⴷⵢⴰⵜⵏ ⵏ ⵜⵣⵔⵉⵔⵜ ⴰⴷ, ⵍⵍⴰⵏ ⵉⵏⵣⵣⵓⵔⴼⴰ ⵍⵍⵉ ⴷⴰⵔ ⵉⵖⴰⵎⴰ ⵢⵉⵙⵎ ⴰⵇⴰⵕⵟⴰⵊⵉⵢ ⵙⵓⴼⴼⵉⵜ. ⵉⵙⵙⵏⵜⴰ ⵢⵓⴱⴰ ⵡⵉⵙⵙ ⵙⵉⵏ ⵜⵓⵥⴽⴰ ⵏ ⵢⴰⵜ ⵜⴰⵎⴰⵥⵓⵏⵜ ⵜⴰⴳⵍⴷⴰⵏⵜ ⴳ ⵡⴰⵍⵉⵍⵉ ⴷⴰⵕⴰⵜ ⵏ ⵎⴰⴷ ⵜ ⵉⵙⵙⵏⵚⴱ ⵓⴳⵓⵙⵜⵉⵏ ⵅⴼ ⵓⴷⴰⴱⵓ ⵏ ⵜⴳⵍⴷⵉⵜ ⵏ ⵎⵓⵔⵉⵜⴰⵏⵢⴰ ⴳ ⵓⵙⴻⴳⴳⵡⴰⵙ 25 ⴷⴰⵜ ⵏ ⵜⵍⴰⵍⵉⵜ. ⵉⵖⵔⴰ ⵢⵓⴱⴰ ⵡⵉⵙⵙ ⵙⵉⵏ ⴳ ⵕⵓⵎⴰ, ⵉⵜⴰⵀⵍ ⵙ ⴽⵍⵢⵓⴱⴰⵟⵕⴰ ⵙⵉⵍⵉⵏⵉ, ⵉⵍⵍⵉⵙ ⵏ ⵎⴰⵕⴽ ⴰⵏⵟⵓⵏⵉ ⴷ ⴽⵍⵢⵓⴱⴰⵟⵕⴰ, ⵎⵇⵇⴰⵔ ⵉⴳⴰ ⵢⵓⴱⴰ ⴷ ⵢⵉⵡⵉⵙ ⴱⵟⵓⵍⵉⵎⵉ ⵉⵎⴰⵣⵉⵖⵏ ⵙ ⵓⵥⵓⵕ, ⵜⵉⵖⵔⵉ ⴷ ⵓⵙⵡⵉⵏⴳⵎ ⵏⵏⵙⵏ ⴳⴰⵏ ⵉⵕⵓⵎⵉⵢⵏ, ⵙⵍⴰⵡⴰⵏⵏ ⴰⴽⴽⵯ ⵜⴰⵥⵓⵕⵉ ⴷ ⵜⵎⵙⴷⴰⴳⵜ ⵜⴰⵕⵓⵎⵉⵢⵜ ⵜⴰⵇⴱⵓⵔⵜ, ⵣⵓⵏ ⴷ ⵜⴰⵎⴰⵎⴽⵜ ⵍⵍⵉ ⵙ ⵉⵥⴽⴰ ⵢⵓⴱⴰ ⵜⴰⵎⴷⵉⵏⵜ ⵏ ⵡⵍⵉⵍⵉ.

ⵉⵔⵣⵣⵓⵜⵏ ⵉⵔⴽⵢⵓⵍⵓⵊⵉⵢⵏ ⴳ ⵡⴰⵍⵉⵍⵉ

ⵉⵔⵣⵣⵓⵜⵏ ⴳⴳⵓⵜⵏⵉⵏ ⴳ ⵡⴰⵍⵉⵍⵉ ⵜⵜⵓⵙⴽⴰⵔⵏ ⴳ ⵓⵣⵎⵣ ⵏ ⵓⵙⴷⵓⵔⵔⵢ ⴰⴼⵕⴰⵏⵉⵚ ⴳⵔ ⵉⵙⴳⴳⵯⴰⵙⵏ 1912 ⴷ 1955, ⵎⴰⵛⵛ ⵙⵙⵏⵜⴰⵏ ⴷⴰⵜ ⵏ ⵓⵣⵎⵣ ⴰⴷ ⵙ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ. ⵙⴳ ⵎⴰⴷ ⵜⵙⴷⵓⵔⵔⵢ ⴼⵕⴰⵏⵚⴰ ⴷⵣⴰⵢⵔ ⴳ ⵓⵙⴳⴳⵯ 1930, ⵙⵙⵏⵜⴰⵏ ⵉⵎⴰⵙⵙⴰⵏ ⵉⵔⴽⵢⵓⵍⵓⵊⵉⵜⵏ ⵉⴼⵕⴰⵏⵚⵉⵚⵏ ⵉⵔⵣⵣⵓⵜⵏ ⴳ ⵉⴷⵔⵉⵣⵏ ⵏ ⵉⵕⵓⵎⵉⵢⵏ ⵍⵍⴰⵏⵉⵏ ⴳ ⵉⵥⵥⵍⵎⴹ ⵏ ⵜⴰⴳⵓⵜ ⴷ ⵜⵓⵥⵥⵓⵎⵜ ⵏ ⵜⴼⵔⵉⵇⵜ ⵙ ⵜⵉⴹⴰⴼ ⵏ ⵉⵙⵔⴷⴰⵙⵏ ⵏ ⴼⵕⴰⵏⵚⴰ.

ⵉⵔⵣⵣⵓⵜⵏ ⵉⵔⴽⵢⵓⵍⵓⵊⵉⵜⵏ ⵉⵙⴽⵔ ⵜⵏ ⵓⵎⵔⵣⵓ ⴰⴼⵕⴰⵏⵚⵉⵚ ⵀⵉⵏⵔⵉ ⴷⵓ ⵍⴰ ⵎⴰⵔⵜⵉⵏⵉ ⴳⵔ ⵉⵙⴳⴳⵯⴰⵙⵏ 1887 ⴷ 1892. ⴳ ⵓⵙⴳⴳⵯⵙ ⵏ 1915 ⵉⵙⵎⴰⴳⵍ ⵓⴱⵉⵔ ⵍⵢⵓⵟⵉ, ⴰⵏⴱⴱⴰⴹ ⴰⵎⵙⵔⴷⴰⵙ ⵏ ⵎⵓⵔⴰⴽⵓⵛ ⴳ ⵓⵣⵎⵣ ⵏ ⵓⵙⴷⵓⵔⵔⵢ, ⴰⵎⵔⵣⵓ ⴰⵔⴽⵢⵓⵍⵓⵊⵉ ⴰⴼⵕⴰⵏⵚⵉⵚ ⵎⴰⵕⵙⵉⵍ ⵓⴳⵉⵙⵜ ⴷⵢⵓⵍⴰⴼⵡⴰ ⴰⴷ ⵉⵙⴽⴰⵔ ⵉⵔⵣⵣⵓⵜⵏ ⴳ ⵓⴷⵖⴰⵔ ⵏ ⵡⴰⵍⵉⵍⵉ, ⴷⴼⴼⵉⵔ ⴰⵙ ⵉⵙⵡⵓⵔⵉ ⴳⵉⵙ ⵍⵡⵉⵙ ⵛⴰⵜⵉⵍⴰⵏ. ⴰⵍⵍⵉⵖ ⵢⵓⵎⵥ ⵎⵓⵔⴰⴽⵓⵛ ⴰⵣⴰⵔⵓⴳ ⵏⵏⵙ, ⵙⵎⴷⵏ ⵉⵙⵏⵓⴱⴱⵓⵛⵏ ⴳ ⵓⴷⵖⴰⵔ ⵏ ⵡⴰⵍⵉⵍⵉ ⴷⴷⵓ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ.