ⵜⵉⵔⵎⵉⵜ ⵉⵏⵓ ⴷ ⵜⵎⴰⵣⵉⵖⵜ ⴳ ⵓⵏⵎⵓⴳⴳⴰⵔ ⵏ ⵡⵉⴽⵉ ⵉⵏⴷⴰⴱⴰ 2023 ⴳ ⵓⴳⴰⴷⵉⵔ

ⴰⵏⵎⵓⴳⴳⴰⵔ ⵏ ⵡⵉⴽⵉ ⵉⵏⴷⴰⴱⴰ

ⵜⴻⵜⵜⵓⵙⵖⵉⵎ ⵜⵙⵓⵜⵍⵜ ⵜⵉⵙⵙ ⵙⴰⵜ ⵏ ⵓⵏⵎⵓⴳⴳⴰⵔ ⴰⵏⵙⴳⴳⵯⴰⵙ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⴳ ⵜⴼⵔⵉⵇⵜ ⴷ ⵓⵣⵡⴰⴳ, ⵡⵉⴽⵉ ⵉⵏⴷⴰⴱⴰ 2023, ⴳ ⵜⵎⴷⵉⵏⵜ ⵏ ⵓⴳⴰⴷⵉⵔ ⵙⴳ 3 ⴰⵔ 5 ⵏⵓⵡⴰⵏⴱⵉⵔ 2023. ⵜⵙⵏⵎⴰⵍⴰ ⵜ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⴳ ⵍⵎⵖⵔⵉⴱ, ⵙ ⵡⴰⵏⵏⴰⵍ ⵏ ⵜⵎⵔⵙⵍⵜ ⵏ ⵡⵉⴽⵉⵎⵉⴷⵢⴰ, ⵜⴰⵙⴷⴰⵡⵉⵜ ⵏ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵏ ⴱⵓⵍⵉⵜⵉⴽⵏⵉⴽ, ⴷ ⵜⵎⴰⵡⴰⵙⵜ ⵏ ⵜⵄⵓⵔⵔⵎⴰ ⴷ ⵜⴷⵍⵙⴰ, ⵜⴰⵣⵓⵏⵉ ⵏ ⵜⴷⵍⵙⴰ. ⴷ ⵙ ⵜⵓⵛⵛⵔⴽⴰ ⴰⴽⴷ ⵜⵎⵓⵏⵜ ⵜⴰⵡⴼⵔⵉⴽⵜ, ⴰⵥⵟⵟⴰ ⵏ ⵜⵖⵔⵉ ⴳ ⵍⵎⵖⵔⵉⴱ ⴷ ⴱⵔⵉⵜⵉⵛ ⴽⴰⵡⵚⵍ. ⴷⵔⵓⵏ ⴷⴳⵙ ⵓⴳⴳⴰⵔ ⵏ 130 ⵏ ⵓⵏⵙⵙⵎⵔⵙ ⵏ ⵡⵉⴽⵉⵎⵉⴷⵢⴰ ⵙⴳ ⵡⵓⴳⴳⴰⵔ ⵏ 36 ⵜⵎⵔⴰ ⵏ ⵜⴼⵔⵉⵇⵜ ⴷ ⵓⵎⴰⴹⴰⵍ.

ⵉⵎⵓⵙⵙⵓⵜⵏ ⵏ ⵓⵏⵎⵓⴳⴳⴰⵔ

ⵏⵜⵉⵏ ⵉⵎⵓⵙⵙⵓⵜⵏ ⵏ ⵓⵏⵎⵓⴳⴳⴰⵔ ⴳ ⵓⵙⵏⵙⵓ "ⵍⵉ ⴷⵓⵏ ⴹ'ⵓⵖ" ⴳ ⵜⵎⴷⵉⵏⵜ ⵏ ⵓⴳⴰⴷⵉⵔ ⴰⵙⵙ ⵏ ⵓⵙⵉⵎⵡⴰⵙ 3 ⵏⵓⵡⴰⵏⴱⵉⵔ ⵙ ⵉⵡⴰⵍⵉⵡⵏ ⵏ ⵓⵙⵏⴱ ⴷⴰⵔ ⵎⴰⵙⵙ ⴰⵏⴰⵙ ⵙⵙⴷⵔⴰⵜⵉ ⵙⴳ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⴳ ⵍⵎⵖⵔⵉⴱ, ⵎⴰⵙⵙⴰ ⴰⵏⵓⵛⴰ ⵙⴳ ⵜⵎⵔⵙⵍⵜ ⵏ ⵡⵉⴽⵉⵎⵉⴷⵢⴰ, ⴷ ⵓⴳⵏⵙⴰⵙ ⵏ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⴳ ⵔⵓⵡⴰⵏⴷⴰ ⵏⵏⴰ ⵉⵙⵏⵎⴰⵍⴰⵜ ⵜⴰⵙⵓⵜⵍⵜ ⵜⵉⵙⵙ ⵚⴹⵉⵚⵜ, ⵡⵉⴽⵉ ⵉⵏⴷⴰⴱⴰ 2022.

ⴷⴳ ⵜⵖⵣⵉ ⵏ ⴽⵕⴰⴹ ⵡⵓⵙⵙⴰⵏ ⵏ ⵓⵏⵎⵓⴳⴳⴰⵔ, ⵜⵜⵓⵙⴽⴰⵔⵏⵜ ⵜⵓⴳⵜ ⵏ ⵜⵉⵔⴰⵎ, ⵣⵓⵏ ⴷ ⵜⵉⵏⴰⵡⵉⵏ, ⵜⵉⵎⵙⵉⵔⵉⵏ, ⴷ ⵜⵙⴰⵡⵓⵔⵉⵏ ⵖⴼ ⵎⵏⵏⴰⵡ ⵉⵎⵔⵙⵉⵜⵏ ⵇⵇⵏⵏⵉⵏ ⵖⵔ ⵡⵉⴽⵉⵎⵉⴷⵢⴰ ⴷ ⵉⵙⵏⴼⴰⵔⵏ ⵏⵏⵙ ⵙ ⴽⴽⵓⵥⵜ ⵜⵓⵜⵍⴰⵢⵉⵏ, ⵜⴰⵏⴳⵍⵉⵣⵜ, ⵜⵎⴰⵣⵉⵖⵜ, ⵜⴰⵄⵕⴰⴱⵜ ⴷ ⵜⴰⴼⵕⴰⵏⵚⵉⵚⵜ. ⴰⵎⴰⵜⴰ ⵏ ⵜⵉⵔⴰⵎ ⴰⴷ ⴹⴼⴰⵕⵏ ⵜⵏ ⵎⴷⴷⵏ ⴰⵡⴷ ⴳ ⵜⵓⴳⴳⵓⴳⵜ ⵙ ⵜⵖⴰⵔⴰⵙⵜ ⵏ "ⵣⵓⵎ".

ⴳ ⵜⵎⴷⴷⵉⵜ ⵏ ⵡⴰⵙⵙ ⵡⵉⵙⵙ ⵙⵉⵏ ⵏ ⵓⵏⵎⵓⴳⴳⴰⵔ, ⵉⵜⵜⵓⵙⴽⴰⵔ ⵢⴰⵏ ⵓⵎⵓⴷⴷⵓ ⵏ ⵓⴼⵊⵊⴻⵊ ⵉ ⵉⵎⴷⵔⴰⵡⵏ ⵖⵔ ⵓⴼⵜⴰⵙ ⵏ ⵙⵉⴷⵉ ⵡⴰⵙⵙⴰⵢ, ⵣⵣⵔⵉⵏ ⴳⵉⵙ ⵉⵎⴷⵔⴰⵡⵏ ⵢⴰⵜ ⵜⵉⵣⵉ ⵉⴼⵊⵊⵉⵊ ⴰⴽⴷ ⴽⵔⴰ ⵏ ⵜⵔⵓⴱⴱⴰ ⵏ ⵓⵥⴰⵡⴰⵏ, ⵣⵓⵏ ⴷ ⴰⵃⵡⴰⵛ ⴷ ⴳⵏⴰⵡⴰ. ⵉⵎⴷ ⵉⵍⵎⵎⴰ ⵓⵏⵎⵓⴳⴳⴰⵔ ⵜⴰⵎⴷⴷⵉⵜ ⵏ ⵡⴰⵙⵙ ⵡⵉⵙⵙ ⴽⵕⴰⴹ ⵙ ⵉⵏⵎⵓⵇⵇⴰⵔⵏ ⵏ ⵓⵎⵙⴰⴼⴰⴹ ⴷ ⵡⴰⵎⴰⵥ ⵏ ⵜⵡⵍⴰⴼⵉⵏ ⵜⵉⵎⴳⴳⵓⵔⴰ ⵉ ⵜⵎⴽⵯⵜⵉⵜ.

ⵜⴰⵎⴰⵣⵉⵖⵜ ⴳ ⵡⵉⴽⵉ ⵉⵏⴷⴰⴱⴰ

ⵉⴳⴰ ⵓⵏⵎⵓⴳⴳⴰⵔ ⵏ ⵡⵉⴽⵉ ⵉⵏⴷⴰⴱⴰ 2023 ⵢⴰⵏ ⵓⵔⴰⵣⴰⵖ ⵉⴼⵓⵍⴽⵉⵏ ⵖⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⴷⴷⵖ ⵜⴷⴳⴳⵉ ⵏ ⵜⵙⵇⵇⵉⵎⵜ ⵏ ⵜⵓⵜⵍⴰⵢⵉⵏ ⴰⵙⵏⴼⴰⵔ ⵏ ⵡⵉⴽⵉⴱⵉⴷⵢⴰ ⵙ ⵜⵎⴰⵣⵉⵖⵜ ⵜⴰⵏⴰⵡⴰⵢⵜ ⵙⵉⵏ ⵡⵓⵙⵙⴰⵏ ⴷⴰⵜ ⵏ ⵓⵏⵎⵓⴳⴳⴰⵔ, ⵉⵟⵟⴼ ⴰⵙⵉⵜ ⵏⵏⵙ ⴰⵎⴰⴷⴷⵓⴷ ⴳ ⵡⵉⴽⵉⴱⵉⴷⵢⴰ ⵙⵉⵏ ⵡⵓⵙⵙⴰⵏ ⴷⴼⴼⵉⵔ ⵏ ⵓⵏⵎⵓⴳⴳⴰⵔ. ⵜⵉⵍⵉ ⵜⵎⴰⵣⵉⵖⵜ ⴳⵔ ⵜⵓⵜⵍⴰⵢⵉⵏ ⵏ ⵓⵎⵙⴰⵡⴰⴹ ⴳ ⵜⴰⵙⵏⴰ ⵏ ⵓⵏⵎⵓⴳⴳⴰⵔ ⴳ ⵉⵥⴹⵡⴰⵏ ⵉⵏⴰⵎⵓⵏⵏ. ⴰⵡⴷ ⴰⵙⴳⵓⵎ ⵏ ⵜⵙⵓⵜⵍⵜ ⴰⴷ ⵉⵍⵍⴰ ⵙ ⵜⵎⴰⵣⵉⵖⵜ, ⴰⴷ ⵜ ⵉⴳⴰⵏ ⴷ: "ⵜⵉⵡⵉⵣⵉ, ⴰⵣⵣⵎⵔ ⵏ ⵜⴼⵔⵉⵇⵜ ⵙ ⵜⴰⵟⵟⵓⵜ ⵏ ⵜⵓⵙⵙⵏⵉⵡⵉⵏ ⴷ ⵓⵎⵢⴰⵡⴰⵙ”.

ⴰⵢⴰⴷ ⴰⴽⴽⵯ ⵉⴼⴽⴰ ⵢⴰⵏ ⵓⵥⵏⵥⴰⵕ ⴰⵎⵇⵇⵔⴰⵏ ⵉ ⵜⴷⵍⵙⴰ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙⴰⵡⵍⵏ ⴼⵍⵍⴰⵙ ⵜⵓⴳⵜ ⵏ ⵎⴷⴷⵏ ⴳ ⵉⵖⵎⵉⵙⵏ ⴷ ⵉⴱⵍⵓⴳⵏ ⴷ ⵉⵥⴹⵡⴰⵏ ⵏ ⵓⵎⵙⴰⵡⴰⴹ ⴰⵏⴰⵎⵓⵏ, ⵙⵙⵏⵏ ⵎⴰⵙ ⴷ ⵓⵔ ⵜⴰⵄⵕⴰⴱⵜ ⴽⴰ ⴰⴷ ⵉⴳⴰⵏ ⵜⵓⵜⵍⴰⵢⵜ ⵏ ⵉⵎⵖⵔⵉⴱⵉⵢⵏ.

ⵜⵉⵔⵎⵉⵜ ⵉⵏⵓ ⴳ ⵡⵉⴽⵉ ⵉⵏⴷⴰⴱⴰ

ⵉⴳⴰ ⵉⵢⵉ ⴰⴷⴷⵓⵔ ⴰⵎⵇⵇⵔⴰⵏ ⴰⴷ ⴰⵎⵓⵖ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⴳ ⴽⵔⴰ ⵏ ⵓⵏⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵡⵉⴽⵉⵎⵉⴷⵢⴰ, ⴰⴷ ⵉⴳⴰⵏ ⴷ ⵡⵉⴽⵉ ⵉⵏⴷⴰⴱⴰ 2023, ⴳⵖ ⴰⵡⴷ ⴰⵎⵣⵡⴰⵔⵓ ⵏⵏⴰ ⴷⴳⵙ ⵉⵙⴽⵔⵏ ⵢⴰⵜ ⵜⵙⴰⵡⵓⵔⵜ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖⴼ ⵜⵉⵔⵔⴰ ⴳ ⵡⵉⴽⵉⴱⵉⴷⵢⴰ ⵙ ⵜⵎⴰⵣⵉⵖⵜ ⵜⴰⵏⴰⵡⴰⵢⵜ. ⵙⵓⵙⵙⵏⵖ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⵉ ⵉⵏⴱⴳⵉⵡⵏ ⵓⵏⵎⵓⴳⴳⴰⵔ, ⵍⵓⵎⵎⵏ ⴰⵢⵜ ⵜⵎⵓⵔⴰ ⵏ ⵜⴼⵔⵉⵇⵜ, ⵙⵙⵏⵖ ⴷⴰⵔⵙⵏ ⴰⵡⴷ ⵏⴽⴽ ⵜⵉⴷⵍⵙⴰⵡⵉⵏ ⴷ ⵜⵓⵜⵍⴰⵢⵉⵏ ⵏⵏⵙⵏ, ⵍⵎⴷⵖ ⴷⴰⵔⵙⵏ ⵎⴰⵏⵎⴽ ⵙ ⴰⵔ ⵙⵡⵓⵔⵉⵏ ⴳ ⵉⵙⵏⴼⴰⵔⵏ ⵏ ⵡⵉⴽⵉⵎⵉⴷⵢⴰ ⴰⴼⴰⴷ ⴰⴷ ⵙⵙⵍⴽⵎⵏ ⵜⵓⵜⵍⴰⵢⵉⵏ ⴷ ⵜⴷⵍⵙⴰⵡⵉⵏ ⵏⵏⵙⵏ ⵉ ⵓⵎⴰⴹⴰⵍ.

ⵙⴳ ⵜⵖⴰⵡⵙⵉⵏ ⵍⵍⵉ ⵥⵕⵉⵖ ⴳ ⵓⵏⵎⵓⴳⴳⴰⵔ ⴰⴷ, ⵏⵏⵓⵔⵣⵖ ⴰⴷ ⴷⴰⵔⵏⵖ ⵉⵍⵉⵏⵜ ⴰⵡⴷ ⵏⴽⴽⵏⵉ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ, ⵓⴼⵉⵖ ⵏⵏ ⵎⴰⵙ ⴷ ⵜⵓⴳⵜ ⵏ ⵉⵎⴷⵔⴰⵡⵏ ⴷⴰⵔⵙⵏ ⵉⵙⵡⵉⵔⵏ ⴰⵜⵜⵓⵢⵏⵉⵏ ⴳ ⵓⵙⵙⵍⵎⴷ; ⵍⵍⴰⵏ ⵉⵎⵣⵔⴰⵡⵏ, ⵉⵙⵍⵎ ⴰⴷⵏ ⵏ ⵜⵙⴷⴰⵡⵉⵜ, ⵉⵙⵍⵎⴰⴷⵏ ⵏ ⵓⵙⵉⵏⴰⵏ ⴷ ⵡⵉⵏ ⵓⵎⵏⵣⵓ, ⵉⵍⵉⵏ ⵉⵊⵏⵢⵓⵔⵏ ⴷ ⵉⵎⵙⵖⵉⵡⵙ, ⵙⵙⵏⵏ ⴰⴽⴽⵯ ⵜⵓⵜⵍⴰⵢⵉⵏ ⵏⵏⴰ ⵙ ⵜⵜⴰⵔⴰⵏ, ⴷ ⴽⵓⵢⴰⵏ ⴷⴳⵙⵏ ⴰⵔ ⵉⵜⵜⴰⵔⴰ ⵖⴼ ⵢⵉⵥⵍⵉ ⵏⵏⵙ ⴳ ⵡⵉⴽⵉⴱⵉⴷⵢⴰ ⴷ ⵉⵙⵏⴼⴰⵔⵏ ⵏ ⵡⵉⴽⵉⵎⵉⴷⵢⴰ ⵙ ⵓⵎⴰⵜⴰ.

ⵙ ⵓⵙⴳⵣⵍ, ⴰⵏⵎⵓⴳⴳⴰⵔ ⵉⴼⵓⵍⴽⵉ, ⵉⵣⵔⵉ ⴳ ⵉⵣⵎⴰⵣ ⴼⵓⵍⴽⵉⵏⵉⵏ, ⵉⵡⵙ ⴳⵉⵙ ⵙ ⵜⵔⵎⵉⵜ ⵉⵏⵓ ⵜⴰⵎⴰⵏⵓⵣⵜ, ⴰⵡⵉⵖ ⴷ ⴳⵉⵙ ⵜⵉⵔⵎⵉⵜ ⵉⵎⵇⵇⵓⵔⵏ ⵙ ⴽⵉⴳⴰⵏ, ⵉⵔⵉⵖ ⴰⴷ ⵜⵜ ⵣⵣⵔⵉⵖ ⵉ ⵜⴳⵔⴰⵡⵜ ⵉⵏⵓ ⴷ ⵡⵉⵏⵏⴰ ⵔⴰⵏⵉⵏ ⴰⴷ ⴰⵡⵙⵏ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ. ⴰⵢⵉⵏⵏ ⴰ ⵖⴼ ⵙⴽⵔⵖ ⵢⴰⵏ ⵓⵙⵎⵓⵜⵜⴳ ⵖⴼ ⵜⵉⵔⵔⴰ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ ⴳ ⵡⴰⵎⵎⴰⵙ ⴰⵢⵢⵓⵣ ⴰⴽⴰⴷⵉⵎⵉ ⵙ ⵜⵡⵉⵙⵉ ⴰⴽⴷ ⵜⵎⵙⵎⵓⵏⵜ ⵏ ⵢⵓⵙⵙⴼ ⵓ ⵜⴰⵛⴼⵉⵏ, ⴰⵙⵙ ⵏ 17/11/2023, ⵙⵢⴰⴼⵓⵏ ⴳⵉⵙ ⵡⴰⵜⵜⴰⵢⵏ ⵏ 20 ⵏ ⵓⵎⵣⵔⴰⵡ ⴳ ⵜⵣⵓⵏⵉ ⵏ ⵜⵣⵔⴰⵡⵉⵏ ⵜⵉⵎⴰⵣⵉⵖⵏ ⴳ ⵜⵖⵉⵡⴰⵏ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ, ⵜⴰⵙⴷⴰⵡⵉⵜ ⵏ ⵉⴱⵏⵓ ⵥⵓⵀⵕ, ⴰⴳⴰⴷⵉⵔ.

ⴳ ⵓⵎⴳⴳⴰⵔⵓ, ⴰⵔ ⵙⵏⵉⵎⵎⵉⵔⵖ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⴳ ⵍⵎⵖⵔⵉⴱ ⵖⴼ ⵓⵙⵏⵎⴰⵍⴰ ⵏⵏⵙⵏ ⵉⵥⵉⵍⵏ ⴷ ⵜⵎⵔⵙⵍⵜ ⵏ ⵡⵉⴽⵉⵎⵉⴷⵢⴰ ⵏⵏⴰ ⵉⴼⵍⵙⵏ ⴳ ⵜⵣⵎⵎⴰⵔ ⵏⵏⵙⵏ.

ⵉ ⵡⵓⴳⴳⴰⵔ ⵏ ⵜⵡⵍⴰⴼⵉⵏ ⴷ ⵉⴼⵉⴷⵢⵓⵜⵏ ⵙⴳ ⵓⵏⵎⵓⴳⴳⴰⵔ ⵏ ⵡⵉⴽⵉ ⵉⵏⴷⴰⴱⴰ 2023 ⴳ ⵓⴳⴰⴷⵉⵔ, ⵥⵕ ⵢⴰⵏ ⵓⵙⵎⵉⵍ ⵖⴼ ⵓⵏⵎⵓⴳⴳⴰⵔ ⴳ ⵡⵉⴽⵉⵎⵉⴷⵢⴰ ⴽⴰⵎⵏⵣ