ⴰⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵜⵎⴷⵉⵏⵜ ⵏ ⵚⴼⵕⵓ

ⴰⵏⵎⵓⴳⴳⴰⵔ ⵏ ⵓⵔⴷⵍⵉⵎ

ⵉⴳⴰ ⵓⵏⵎⵓⴳⴳⴰⵔ ⵏ ⵓⵔⴷⵍⵉⵎ (ⵃⴱⴱ ⵍⵎⵍⵓⴽ) ⵢⴰⵏ ⵙⴳ ⵉⵏⵎⵓⴳⴳⴰⵔⵏ ⵉⵎⴷⵏⴰⵏⵏ ⵉⵣⴰⵢⴽⵓⵜⵏ ⴳ ⵡⴰⵎⵓⵔ ⵏ ⵡⴰⴽⵓⵛ, ⴰⵔ ⵉⵜⵜⵓⵔⵔⴰⵢ ⵓⵎⵣⵔⵓⵢ ⵏⵏⵙ ⴰⵔ ⵉⵙⴳⴳⵯⴰⵙⵏ ⵉⵎⵣⵡⵓⵔⴰ ⵏ ⵜⴰⵙⵓⵜ ⵜⵉⵙ 20, ⴰⵔ ⵉⵜⵜⵢⴰⵡⵙⴽⴰⵔ ⴽⵔⴰⵢⴳⴰⵜ ⴰⵙⴳⴳⵯⴰⵙ ⴳ ⵜⵎⴷⵉⵏⵜ ⵏ ⵚⴼⵕⵓ ⵙⴳ ⵓⵙⴳⴳⵯⴰⵙ ⵏ 1920. ⴰⵔ ⴷ ⵙⵉⵙ ⵜⵜⴰⵛⴽⴰⵏ ⵜⵓⴳⵜⵜ ⵏ ⵉⵎⴰⵍⵍⴰⵢⵏ ⵙⴳ ⵓⴳⵏⵙ ⵏ ⵎⵓⵔⴰⴽⵓⵛ ⵎⴽⴰⵏⵏ ⴷ ⴱⵕⵕⴰ ⵏⵏⵙ. ⴰⵔ ⴳⵉⵙ ⵉⵜⵜⵓⵙⴽⴰⵔ ⵢⴰⵏ ⵓⵎⵃⵉⵣⵡⴰⵔ ⵉ ⵜⵔⴱⴰⵜⵉⵏ ⵃⵎⴰ ⴰⴷ ⵜⴻⵜⵜⵓⵙⵜⴰⵢ ⵜⴰⴷ ⵔⴰⴷ ⵉⴳ ⵜⴰⴳⵍⵍⵉⴷⵜ ⵏ ⵡⴰⴼⵓⵍⴽⵉ ⵏ ⵓⵔⴷⵍⵉⵎ.

ⴰⵔ ⵜⴻⵜⵜⵉⵍⵉ ⵜⴼⵓⴳⵍⴰ ⵏ ⵓⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵡⴰⵢⵢⵓⵔ ⵏ ⵢⵓⵏⵢⵓ ⴽⵔⴰⵢⴳⴰⵜ ⴰⵙⴳⴳⵯⴰⵙ, ⴽⵓⴷⵏⵏⴰ ⵣⵣⵔⵏ ⵉⵎⴽⵔⴰⵣⵏ ⵜⴰⵢⴰⴼⵓⵜ ⵏ ⵓⵔⴷⵍⵉⵎ, ⴰⵔ ⵜⴻⵜⵜⴽⴽⴰ ⵜⴼⵓⴳⵍⴰ ⴰⴷ ⴽⵕⴰⴹ ⵡⵓⵙⵙⴰⵏ, ⵙⴳ ⵡⴰⵙⵙ ⵡⵉⵙ 13 ⴰⵔ ⵡⵉⵙ 16 ⴳ ⵡⴰⵢⵢⵓⵔ ⵏ ⵢⵓⵏⵢⵓ. ⴰⵔ ⴳⵉⵙ ⵙⴼⵓⴳⵍⵓⵏ ⵉⵎⵣⴷⴰⵖⵏ ⵏ ⵚⴼⵕⵓ ⴷ ⵉⵏⴱⴳⵉⵡⵏ ⵏⵏⵙⵏ ⵙ ⵜⵢⴰⴼⵓⵜ ⵏ ⵓⵔⴷⵍⵉⵎ, ⴰⵔ ⴳⵉⵙ ⵉⵜⵜⵉⵍⵉ ⵓⴼⵓⵍⴽⵍⵓⵕ ⴰⵎⵖⵔⵉⴱⵉ ⵣⵓⵏ ⴷ ⵜⵉⵔⵓⴱⴱⴰ ⵏ ⵓⵃⵉⴷⵓⵙ ⴷ ⵓⵎⴰⵡⴰⵍ (ⵜⵜⴱⵓⵕⵉⴹⴰ).

ⵜⵣⵎⵎⵉⵎ ⵜⵎⴰⴷⴷⴰⵙⵜ ⵏ ⵜⵎⵜⵜⵉⵡⵉⵏ ⵉⵎⵓⵏⵏ ⵉ ⵓⵙⴳⵎⵉ ⴷ ⵜⵎⴰⵙⵙⴰⵏⵜ ⴷ ⵜⴷⵍⵙⴰ (ⵢⵓⵏⵉⵙⴽⵓ) ⴰⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵜⵍⴳⴰⵎⵜ ⵏ ⵢⵓⵏⵉⵙⴽⵓ ⵉ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵔⴽⵎⴰⵎⵜ ⵏ ⵜⴼⴼⵓⴳⵏⴰ ⴳ ⵓⵙⴳⴳⵯⴰⵙ ⵏ 2012.

ⴰⵎⵣⵔⵓⵢ

ⵜⴳⴰ ⵜⵡⵏⴳⵉⵎⵜ ⵏ ⵓⵙⴼⵓⴳⵍⵓ ⵙ ⵓⴳⵎⵎⵓ ⵏ ⵓⵔⴷⵍⵉⵎ ⵜⵉⵏ ⴱⵢⵉⵔ ⵙⵓⴳⴰⵏ, ⴰⵏⴱⴱⴰⴹ ⵏ ⵜⵎⴷⵉⵏⵜ ⵏ ⵚⴼⵕⵓ ⴳ ⵓⵣⵎⵣ ⵏ ⵓⵙⴷⵓⵔⵔⵉ ⴰⴼⵕⴰⵏⵚⵉⵚ, ⵢⵉⵡⵉ ⵜⵜ ⵉⴷ ⵙⴳ ⵜⴼⵓⴳⵍⴰ ⵏⵏⴰ ⵜⵙⴽⴰⵔ ⵜⵎⴰⵣⵉⵔⵜ ⵏ ⵓⵍⴼⵉ ⵏⵏⴰ ⵉⵍⵍⴰⵏ ⴳ ⵜⴰⵎⴰ ⵏ ⵜⵎⴷⵉⵏⵜ ⵏ ⵜⵓⵍⵓⵣ ⴳ ⴼⵕⴰⵏⵚⴰ, ⵜⴻⵜⵜⵓⵙⵙⴰⵏ ⴰⵡⴷ ⵏⵜⵜⴰⵜ ⵙ ⵓⴳⵎⵎⵓ ⵏ ⵓⵔⴷⵍⵉⵎ. ⵉⵙⵙⵏⵖⵍ ⴷ ⴰⴽⴽⵯ ⵉⵎⵓⵙⵙⵓⵜⵏ ⵏⵏⴰ ⵜⵜⵓⵙⴽⴰⵔⵏⵉⵏ ⴳ ⵓⵍⴼⵉ, ⴰⵔ ⵜⵜⵢⵡⵙⴽⴰⵔⵏ ⴰⵡⴷ ⴳ ⵚⴼⵕⵓ, ⴳ ⵏⵉⵜ ⵉⴳⴰ ⵓⵙⵜⴰⵢ ⵏ ⵜⴳⵍⵍⵉⴷⵜ ⵏ ⵓⵔⴷⵍⵉⵎ.

ⵉⴽⴽⴰ ⵜⵜ ⵏⵏ ⵓⵙⴼⵓⴳⵍⵓ ⵙ ⵓⴳⵎⵎⵓ ⵏ ⵓⵔⴷⵍⵉⵎ ⴰⵍⵍⵉⵖ ⴱⵃⵕⴰ ⵉⵏⵜⴰ ⴳ ⵓⵙⴳⴳⵯⴰⵙ ⵏ 1920 ⴷ ⵉⵙⴳⴳⵯⴰⵙⵏ ⵍⵍⵉ ⵜ ⴹⴼⵕⵏⵉⵏ ⴰⵔ ⵉⵜⵜⴳⴳⴰ ⵖⴰⵙ ⵢⴰⵏ ⵓⵃⴰⵔⵔⴰⴼ, ⴰⵔ ⵉⵜⵜⴽⴽⴰ ⵜⵉⵙⵡⴰⴽ ⵏ ⵜⵎⴷⵉⵏⵜ ⵏ ⵚⴼⵕⵓ, ⵜⵉⵣⵡⵓⵔ ⴰⵙ ⵢⴰⵜ ⵜⵣⴰⵢⵓⵢⵜ ⵉⵜⵜⵓⵙⴽⴰⵔⵏ ⴳ ⵓⵖⴰⵏⵉⵎ, ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵡⵜⵎⵜ.

ⵉⵏⵏⴼⵍ ⵢⵉⵙⵎ ⵏ ⵓⵏⵎⵓⴳⴳⴰⵔ ⴳ ⵓⵙⴳⴳⵯⴰⵙ ⵏ 1934, ⵉⴳ ⵉⵍⵎⵎⴰ ⵢⵉⵙⵎ ⵏⵏⵙ ⴰⵎⴰⴷⴷⵓⴷ "ⴰⵏⵎⵓⴳⴳⴰⵔ ⵏ ⵓⵔⴷⵍⵉⵎ", ⵜⵏⵏⴼⵍ ⴳⵉⵙ ⵓⵍⴰ ⵜⵣⴰⵢⵓⵢⵜ ⵏ ⵓⵖⴰⵏⵉⵎ, ⵉⵍⵉⵏⵜ ⵜⵔⴱⴰⵜⵉⵏ ⵜⵉⵕⵓⵎⵉⵢⵉⵏ ⴷ ⵜⵓⴷⴰⵢⵉⵏ ⴳ ⵓⴷⵖⴰⵔ ⵏⵏⵙ, ⴰⵔ ⵏⵏ ⵜⵜⴳⴳⴰⵏⵜ ⵜⴰⵖⵏⵏⴰⵏⵜ ⵎⴰⵏⵜⴰ ⴳⵉⵙⵏⵜ ⵔⴰⴷ ⵉⴳ ⵜⴰⴳⵍⵍⵉⴷⵜ ⵏ ⵓⵔⴷⵍⵉⵎ, ⵜⴳ ⵜⴼⵕⴰⵏⵚⴰⵡⵉⵜ ⵙⵓⵣⴰⵏ ⴱⵉⵕⵏⴰⵕ ⵜⴰⵔⴱⴰⵜ ⵜⴰⵎⵣⵡⴰⵔⵓⵜ ⵏⵏⴰ ⵢⵉⵡⵉⵏ ⵉⵙⵏⵉ ⵏ ⵜⴳⵍⵍⵉⴷⵜ ⵏ ⵓⵔⴷⵍⵉⵎ ⴳ ⵓⵙⴳⴳⵯⴰⵙ ⵏ 1934. ⵜⴰⵜⵜⵓⵢ ⵉⵍⵎⵎⴰ ⵜⵖⵏⵏⴰⵏⵜ ⴰⵍⵍⵉⵖ ⴱⴷⴰⵏⵜ ⵜⵔⴱⴰⵜⵉⵏ ⵜⵉⵎⵙⵍⵎⵉⵏ ⴰⵔ ⵜⵜⴰⵎⵓⵏⵜ ⴰⵡⴷ ⵏⵜⵜⵏⵜⵉ ⴳ ⵜⵖⵏⵏⴰⵏⵜ.

ⴳ ⵜⵙⵓⵜⵍⵜ ⵏⵏⵙ ⵜⵉⵙ 98, ⵉⵏⵏⵓⵕⵥⵎ ⵓⵏⵎⵓⴳⴳⴰⵔ ⵜⵉⴳⴳⵓⵔⴰ ⵏⵏⵙ ⵉ ⵜⴼⴰⴼⴽⴰⵢⵉⵏ ⵏ ⵓⵎⴰⴹⴰⵍ ⴷ ⵜⵎⵖⵔⵉⴱⵉⵢⵉⵏ ⵍⵍⵉ ⵣⴷⵖⵏⵉⵏ ⴳ ⴱⵕⵕⴰ ⴰⴼⴰⴷ ⴰⴷ ⴷⵔⵓⵏⵜ ⴰⵡⴷ ⵏⵜⵜⵏⵜⵉ ⴳ ⵓⵎⵃⵉⵣⵡⴰⵔ ⵏ ⵜⴳⵍⵍⵉⴷⵜ ⵏ ⵡⴰⴼⵓⵍⴽⵉ ⵏ ⵓⴷⵍⵉⵎ.

ⵉⵎⵓⵙⵙⵓⵜⵏ ⵏ ⵓⵏⵎⵓⴳⴳⴰⵔ

ⴰⵔ ⵜⵜⵓⵙⴽⵉⵔⵏ ⵎⵏⵏⴰⵡ ⵉⵎⵓⵙⵙⵓⵜⵏ ⴳ ⵓⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵜⵖⵣⵉ ⵏ ⵉⵎⴰⵍⴰⵙⵙ; ⵍⵍⴰⵏ ⵉⵎⵓⵙⵙⵓⵜⵏ ⵏ ⵜⴷⵍⵙⴰ, ⵜⴰⵥⵓⵕⵉ, ⵜⵓⵏⵏⵓⵏⵜ, ⵜⴰⴷⴰⵎⵙⴰ, ⴷ ⵓⴼⵊⵊⴻⵊ, ⵣⵓⵏ ⴷ ⴰⵎⴰⵡⴰⵍ (ⵜⵜⴱⵓⵔⵉⴹⴰ) ⴷ ⵉⵙⴼⵙⴰⵔ ⵏ ⵜⵥⵓⵕⵉ, ⵉⵍⵉⵏ ⴳⵉⵙ ⴰⵡⴷ ⵉⴷⵖⴰⵔⵏ ⵥⵍⵉⵏⵉⵏ ⵙ ⵜⵎⵙⵎⵓⵏⵉⵏ ⴷ ⵜⵎⵢⴰⵡⴰⵙⵉⵏ ⵏⵏⴰ ⴼⵙⵙⵔⵏⵉⵏ ⴰⵔ ⵣⵣⵏⵣⴰⵏⵜ ⴰⴼⴰⵔⵙ ⵏⵏⵙⵏⵜ ⴰⴷⵖⴰⵔⴰⵏ, ⴰⵡⵙⵏⵜ ⴳ ⵜⵏⴼⵍⵉⵜ ⵜⴰⴷⴰⵎⵙⴰⵏⵜ ⵏ ⵜⵎⵏⴰⴹⵜ ⵏⵏⵙⵏⵜ. ⵎⴰⵛⵛ ⵉⵎⵓⵙⵙⵓⵜⵏ ⵍⵍⵉ ⵜⵜⵓⵙⴽⵉⵔⵏⵉⵏ ⴳ ⴽⵕⴰⴹ ⵡⵓⵙⵙⴰⵏ ⵉⵎⴰⴷⴷⵓⴷⵏ ⵏ ⵓⵏⵎⵓⴳⴳⴰⵔ ⴰⴷ ⴱⴰⵀⵔⴰ ⵉⵅⴰⵜⵔⵏ, ⴰⵔ ⵜⵜⴰⵡⵉⵏ ⵜⵉⵟ ⵏ ⵓⴳⴷⵓⴷ.

ⴰⵔ ⵢⴰⴷⴷⴰ ⵡⴰⵙⵙ ⴰⵎⵣⵡⴰⵔⵓ ⵏ ⵓⵏⵎⵓⴳⴳⴰⵔ ⵙ ⵓⵙⵜⴰⵢ ⵏ ⵜⴳⵍⵍⵉⴷⵜ ⵏ ⵓⵔⴷⵍⵉⵎ, ⴷ ⵜⵎⵙⵏⴰⵢⵉⵏ ⵏⵏⵙ, ⴷ ⵙⵏⴰⵜ ⵜⵙⵍⴰⵜⵉⵏ; ⵢⴰⵜ ⵉⵙⴰⵡⴰⵍⵏ ⵜⴰⵄⵕⴰⴱⵜ ⴷ ⵢⴰⵜ ⵉⵙⴰⵡⴰⵍⵏ ⵜⴰⵎⴰⵣⵉⵖⵜ, ⵉⴱⴷⵓ ⵡⵉⵙ ⵙⵉⵏ ⵡⵓⵙⵙⴰⵏ ⵙ ⵓⵃⴰⵔⵔⴰⴼ ⵏ ⵉⵙⴼⴹⴰⵡⵏ, ⵉⵍⵎⵎⴰ ⴳ ⵡⵉⵙ ⴽⵕⴰⴹ ⵡⵓⵙⵙⴰⵏ ⴰⵔ ⵜⵍⵙⵙⴰ ⵜⴳⵍⵍⵉⴷⵜ ⵏ ⵓⵔⴷⵍⵉⵎ ⵉⵙⵏⵉ ⵏⵏⵙ, ⵙⵙⵓⵜⵍⵏⵜ ⴰⵙ ⵜⵎⵙⵏⴰⵢⵉⵏ ⵏⵏⵙ, ⵜⵙⵙⵓⴷⵓ ⵢⴰⵜ ⵜⵎⵙⵙⵓⴷⵓⵜ ⵉⵕⵥⵎⵏ ⴳ ⵉⴳⴳⵉ, ⴰⵔ ⵜⵣⵣⵉⴳⵉⵣ ⴳ ⵓⵃⴰⵔⵔⴰⴼ.

ⵜⴰⴳⵍⵍⵉⴷⵜ ⵏ ⵡⴰⴼⵓⵍⴽⵉ ⵏ ⵓⵔⴷⵍⵉⵎ

ⵙⴳ ⵜⴼⴰⴷⵉⵡⵉⵏ ⵍⵍⵉ ⴷ ⵉⵇⵇⴰⵏ ⴰⴷ ⵉⵍⵉⵏⵜ ⴳ ⵜⴰⵏⵏⴰ ⵉⵔⴰⵏ ⴰⴷ ⵜⴰⵎⵓ ⴳ ⵓⵎⵃⵉⵣⵡⴰⵔ ⵏ ⵜⴳⵍⵍⵉⴷⵜ ⵏ ⵡⴰⴼⵓⵍⴽⵉ ⵏ ⵓⵔⴷⵍⵉⵎ, ⴰⴷ ⵜⴳ ⵜⴰⵎⵖⵔⵉⴱⵉⵜ, ⴰⴷ ⵢⵉⵍⵉ ⵡⴰⵡⵜⴰⵢ ⵏⵏⵙ ⴳⵔ 18 ⴰⵔ 26 ⵏ ⵉⵙⴳⴳⵯⴰⵙⵏ, ⴰⴷ ⴷⴰⵔⵙ ⵓⵔ ⵉⵍⵉⵏ ⵉⵎⵓⴽⵔⵉⵙⵏ ⵏ ⵜⵖⴷⵎⵜ, ⴰⴷ ⵓⵔ ⵜⵉⴷⵔⵓⵙ ⵜⵖⵣⵉ ⵏⵏⵙ ⵉ 1 ⵎⵉⵜⵔⵓ ⴷ 65 ⵙⴰⵏⵜⵉⵎ, ⴰⴷ ⵉⴼⴰⵍⴽⵉ ⵓⵙⵡⵉⵔ ⵏⵏⵙ ⴳ ⵜⵓⵙⵙⵏⴰ ⵜⴰⵎⴰⵜⴰⵢⵜ, ⴰⴷ ⵜⵙⵙⵏ ⵎⵏⵏⴰⵡⵜ ⵜⵓⵜⵍⴰⵢⵉⵏ, ⴰⴷ ⵜⵉⵥⴹⵉⵕ ⵉ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ, ⴷ ⴽⵔⴰ ⵏ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ.

ⴰⵏⵎⵓⴳⴳⴰⵔ ⴳ ⵜⴼⵓⴳⵍⵉⵡⵉⵏ ⵢⴰⴹⵏⵉⵏ

ⵉⴷⵔⵓ ⵓⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵎⵏⵏⴰⵡⵜ ⵜⴼⵓⴳⵍⵉⵡⵉⵏ ⴳ ⵓⴳⵏⵙ ⵏ ⵎⵓⵔⴰⴽⵓⵛ ⴷ ⴱⵕⵕⴰ ⵏⵏⵙ:
- ⵜⴰⴷⵔⴰⵡⵜ ⵏ ⵓⵏⵎⵓⴳⴳⴰⵔ ⴳ ⵜⵎⴷⵉⵏⵜ ⵏ ⴼⵉⵏⵢⵓⵍⴰ ⴳ ⵟⴰⵍⵢⴰⵏ.
- ⵜⴰⴷⵔⴰⵡⵜ ⵏ ⵓⵏⵎⵓⴳⴳⴰⵔ ⴳ ⵓⵏⵎⵓⴳⴳⴰⵔ ⵏ ⵟⴰⵏⵟⴰⵏ.
- ⵜⴰⴷⵔⴰⵡⵜ ⵏ ⵓⵏⵎⵓⴳⴳⴰⵔ ⴳ ⵉⵎⴰⵕⴰⵜ ⵛⵛⴰⵔⵉⵇⵇⴰ.

ⵉⵡⵉⵣ ⴰⴳⵍⴷⴰⵏ ⵅⴼ ⵓⵏⵎⵓⴳⴳⴰⵔ

ⴰⵔ ⵉⵜⵜⵓⵙⴽⵉⵔ ⵓⵏⵎⵓⴳⴳⴰⵔ ⴳ ⴷⴷⵓ ⵢⵉⵡⵉⵣ ⵏ ⵓⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵙⴳ ⵓⵙⴳⴳⵯⴰⵙ ⵏ 2010, ⴰⵢⵍⵍⵉ ⴰⵙ ⵉⴼⴽⴰⵏ ⵢⴰⵏ ⵡⴰⵏⵏⴰⵍ ⴱⴰⵀⵔⴰ ⵉⴷⵓⵙⵏ, ⵉⵙⵙⵉⵎⵖⵓⵔ ⴰⴷⴷⵓⵔ ⵏⵏⵙ ⴳⵔ ⵓⴳⴷⵓⴷ ⴰⵎⵖⵔⵉⴱⵉ ⴷ ⵉⵎⴰⵍⵍⴰⵢⵏ.

ⴰⵙⵎⵉⵍ ⵏ ⵓⵏⵎⵓⴳⴳⴰⵔ ⴳ ⵢⵓⵏⵉⵙⴽⵓ

ⵙ ⵜⵓⵜⵜⵔⴰ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ ⵏⵏⴰ ⵉⵚⴽⴰⵏ ⵅⴼ ⵓⵙⴷⴰⵡ ⵏⵏⴰ ⵜⵃⵢⵢⵍ ⵜⴳⵔⴰⵡⵜ ⵏ ⵚⴼⵕⵓ ⴷ ⵡⴰⵎⵓⵏ ⴰⵎⴰⴷⴰⵏ, ⵜⵖⵜⵙ ⵜⵙⵇⵇⵉⵎⵜ ⵉⵎⵎⴰⴳⵍⵏ ⵙ ⵓⵃⵟⵟⵓ ⵏ ⵜⴰⵢⵙⵉ ⵜⴰⵔⴽⵎⴰⵎⵜ ⴳ ⵜⵙⵓⵜⵍⵜ ⵏⵏⵙ ⵜⵉⵙⵙ ⵙⴰⵜ, ⵏⵏⴰ ⵉⵜⵜⵓⵙⵖⵉⵎⵏ ⴳ ⵜⵎⴰⵥⵓⵏⵜ ⵏ ⴼⵕⴰⵏⵚⴰ, ⴱⴰⵔⵉⵣ, ⵙⴳ 3 ⴰⵔ 7 ⵢⵓⵏⵢⵓ ⴳ ⵓⵙⴳⴳⵯⴰⵙ ⵏ 2012, ⴰⴷ ⵜⵙⵎⵉⵍ ⴰⵏⵎⵓⴳⴳⴰⵔ ⵏ ⵓⵔⴷⵍⵉⵎ ⴳ ⵜⵍⴳⴰⵎⵜ ⵏ ⵜⵎⴰⴷⴷⴰⵙⵜ ⵏ ⵜⵎⵜⵜⵉⵡⵉⵏ ⵉⵎⵓⵏⵏ ⵉ ⵓⵙⴳⵎⵉ ⴷ ⵜⵎⴰⵙⵙⴰⵏⵜ ⴷ ⵜⴷⵍⵙⴰ (ⵢⵓⵏⵉⵙⴽⵓ), ⵏⵏⴰ ⵉⵥⵍⵉⵏ ⵙ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵔⴽⵎⴰⵎⵜ ⵏ ⵜⴼⴼⵓⴳⵏⴰ.

ⵜⵓⵙⵙⵔⴰ ⵏ ⵓⵏⵎⵓⴳⴳⴰⵔ

ⵙⴳ ⵎⴰ ⴰⴷ ⵉⵏⵜⴰ ⵓⵏⵎⵓⴳⴳⴰⵔ ⵏ ⵓⵔⴷⵍⵉⵎ, ⴰⵔ ⴱⴷⴷⴰ ⵉⵜⵜⵉⵍⵉ ⴽⵔⴰⵢⴳⴰⵜ ⴰⵙⴳⴳⵯⴰⵙ, ⵓⵔ ⵊⵊⵓⵏ ⵉⴱⴱⵉⵢ ⴰⵎⵔ ⴽⵕⴰⴹ ⵉⵙⴳⴳⵯⴰⵙⵏ ⴰⴷ ⴳⴳⵯⵔⴰⵏⵉⵏ 2020, 2021 ⴷ 2022 ⵙ ⵓⵙⵔⴰⴳ ⵏ ⵉⵎⵓⴽⵔⵉⵙⵏ ⵉⵙⵔⵜⴰⵏ ⴳⵔ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⴳⵔⴰⵡⴰⵏ ⵏ ⵚⴼⵕⵓ ⴷ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.