ⵜⵓⵍⵍⵉⵙⵜ ⵏ ⵜⵔⴱⴰⵜ ⴷ ⵜⵎⵜⵜⴰⵏⵜ ⵙⴳ ⵜⴰⵢⵙⵉ ⵜⴰⵚⴱⴱⴰⵏⵢⵓⵜ
ⵜⵓⵍⵍⵉⵙⵜ ⵏ ⵜⵔⴱⴰⵜ ⴷ ⵜⵎⵜⵜⴰⵏⵜ ⵙⴳ ⵜⴰⵢⵙⵉ ⵜⴰⵚⴱⴱⴰⵏⵢⵓⵜ
ⵢⴰⵏ ⵡⴰⵙⵙ ⴳ ⵡⵓⵙⵙⴰⵏ, ⵜⵣⵔⵢ ⵜⵎⵜⵜⴰⵏⵜ ⴳ ⵜⴰⴳⴰⵏⵜ, ⵜⵎⵎⵉⵇⵇⵉⵔ ⴰⴽⵉⴷⵙ ⵢⴰⵜ ⵜⵔⴱⴰⵜ ⵜⴰⵎⵥⵥⵢⴰⵏⵜ ⴳ ⵓⴱⵔⵉⴷ ⵏⵏⵙ, ⴰⵍⵍⵉⴳ ⵜⵜ ⵜⵥⵕⴰ ⵜⵔⴱⴰⵜ ⵉⴳⴳⵉ ⵏ ⵡⴰⵢⵢⵉⵙ ⵏⵏⵙ ⴰⵙⴳⴳⴰⵏ ⵉⵙⵎⵔⵖⴰⵏ ⵙ ⵜⴰⵥⵉⵍⵜ, ⵜⵙⵇⵙⴰ ⵜⵜ ⵙ ⵜⵣⵣⵉⴷⴳⴰ: «ⵉⵙ ⴷ ⴰⵡⴷ ⴽⵎⵎ ⵜⵊⵍⵉⵜ?»
ⵜⵔⵓⵔ ⴰⵙ ⵜⵎⵜⵜⴰⵏⵜ ⵙ ⵓⵣⵎⵓⵎⵎⴳ, ⵜⵉⵏⵉ ⴰⵙ: «ⵢⴰⵀ, ⵊⵍⵉⵖ, ⵉⵎⵎⴰ ⴽⵎⵎ? ⵉⵙ ⵜⵙⵙⵏⴷ ⴰⴱⵔⵉⴷ ⵏ ⵡⵓⵖⵓⵍ ⵖⵔ ⵜⴰⴷⴷⴰⵔⵜ?»
ⵜⵔⵓⵔ ⴰⵙ ⵜⵔⴱⴰⵜ: «ⵓⵀⵓ, ⵎⴰⵛⵛ ⵖⵉⵍⴰ ⵓⵔ ⵙⵓⵍ ⵙⵢⴰⴼⴰⵖ ⵙ ⵓⵡⵍⵉⵡⵍ, ⵖⵉⵍⴰⴷ ⵓⵔ ⵙⵓⵍ ⴽⵚⵓⴹⵖ, ⴰⵛⴽⵓ ⵜⵍⵍⵉⴷ ⴰⴽⵉⴷⵉ.»
ⵜⴱⴰⵢⵍⴰⵍⴰ ⵜⵎⵜⵜⴰⵏⵜ, ⵜⵙⵇⵙⴰ ⵜⴰⵔⴱⴰⵜ: «ⵜⵏⵏⵉⴷ ⵓⵔ ⵜⴽⵚⵓⴹⵜ! ⵉⵙ ⵜⵙⵙⵏⴷ ⵎⴰ ⴰⴷ ⴳⵉⵖ?»
ⵜⵔⵓⵔ ⵜⵔⴱⴰⵜ ⵖⴼ ⵜⵎⵜⵜⴰⵏⵜ ⵙ ⵜⵎⵣⴳⵉⵡⵜ: «ⵢⴰⵀ ⵙⵙⵏⵖ ⴽⵎ, ⵎⴽ ⴷ ⵏⴽⴽ ⴰⵙ ⴷ ⵜⵓⵛⴽⵉⴷ ⵀⴰⵏⵏ ⴰⵡⴰⵍ ⵉⴼⵓⵍⴽⵉ, ⵎⴰⵛⵛ ⵔⴰⴷ ⴰⵎ ⵜⵜⵔⵖ ⵖⴰⵙ ⵢⴰⵏ ⵓⵊⵎⵉⵍ.»
ⵜⵏⵏⴰ ⴰⵙ ⵜⵎⵜⵜⴰⵏⵜ: «ⵢⴰⵀ, ⴽⵎⵎ ⴰⵙ ⴷ ⵓⵛⴽⵉⵖ. ⵎⴰⵛⵛ ⵎⴰⵏ ⴰⵊⵎⵉⵍ ⴰⴷ ⵔⴰⴷ ⵜⴻⵜⵜⵔⴷ ⵙⴳ ⵜⵎⵜⵜⴰⵏⵜ!?»
ⵜⵔⵓⵔ ⵜⵔⴱⴰⵜ ⵖⴼ ⵜⵎⵜⵜⴰⵏⵜ ⵙ ⵢⴰⵏ ⵡⵓⴷⵎ ⵉⴷⵍ ⵓⵖⵉⵍⵓⴼ: «ⵙⵙⵏⵊⵎ ⵢⵉⵎⵎⵉ ⴰⵜⵉ ⵜⵓⴹⵏ ⴱⴰⵀⵔⴰ, ⵀⴰⵜ ⵏⵜⵜⴰⵜ ⴰ ⵖⴼ ⴼⴼⵖ ⵃⵎⴰ ⴰⴷ ⴰⴼⵖ ⴽⵔⴰ ⵏ ⵉⵙⴰⴼⴰⵔⵏ ⴳ ⵜⴰⴳⴰⵏⵜ ⵉⵎⵉⵍ ⵊⵍⵓⵖ. ⴰⴷ ⵉⵢⵉ ⴱⴰⵀⵔⴰ ⵉⵀⵓⵍⵖ ⴷ ⵉⴳ ⵓⵔ ⴰⵖⵓⵍⵖ ⴷⴰⵔ ⵢⵉⵎⵎⵉ, ⵔⴰⴷ ⵜⵎⵎⵜ ⵙ ⵜⵎⴰⴹⵓⵏⵜ ⴷ ⵓⵖⵉⵍⵓⴼ ⵍⵍⵉⴳ ⵓⵔ ⵍⵍⵉⵖ ⵜⴰⵎⴰ ⵏⵏⵙ, ⴰⵛⴽⵓ ⵏⴽⴽⵏⵜⵉ ⴽⴰ ⴰⴷ ⵉⵍⵍⴰⵏ ⴳ ⵜⴰⴷⴷⴰⵔⵜ, ⵉⵎⵎⵓⴷ ⴱⴰⴱⴰ ⵢⴰⵏ ⵓⵙⴳⴳⵯⴰⵙ ⴰⵢⴰ, ⵙⴳ ⵡⴰⴽⵓⴷ ⴰⵏⵏ ⵢⵉⵎⵎⵉ ⴰⴷ ⵖⵉⴼⵉ ⵉⴳⴰⵏ ⵜⴰⵎⴰⵙⴰⵢⵜ ⴷ ⴰⵡⴷ ⵅⴼ ⵜⴳⵎⵎⵉ...»
ⵜⵙⵢⴰⴼⴰ ⵜⵎⵜⵜⴰⵏⵜ ⵙ ⵓⴽⵔⵓⴽⴹ, ⵉⴷⵍ ⵓⵖⵉⵍⵓⴼ ⵓⴷⵎ ⵏⵏⵙ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ, ⴰⵛⴽⵓ ⵜⵎⵎⵍ ⵢⴰⴷⵍⵍⵉ ⴰⴽⵉⴷⵙ ⵜⴰⵡⵉ ⵜⴰⵔⴱⴰⵜ ⵙ ⵡⴰⵔ ⵓⵖⵓⵍ.»
ⵜⴹⴼⴰⵕ ⵜⵔⴱⴰⵜ ⴷ ⵜⵎⵜⵜⴰⵏⵜ ⵜⴰⵡⴰⴷⴰ ⵏⵏⵙⵏⵜ, ⴰⵔ ⵜⵙⴱⵉⴹⵉⵕ ⵜⵔⴱⴰⵜ ⵙ ⵓⵙⵔⴰⴳ ⵏ ⵡⴰⵟⵟⴰⵏ ⴳ ⵜⴹⴰⵕⵉⵏ ⵏⵏⵙ ⵜⵉⵍⴳⴳⵯⴰⵖⵉⵏ, ⵜⴰⵎⵜⵜⴰⵏⵜ ⵏⵜⵜⴰⵜ ⵜⵙⵙⵓⴷⴰ ⴰⵢⵢⵉⵙ ⵏⵏⵙ ⵉⴷⵓⵙⵏ. ⴰⵍⵍⵉⴳ ⵍⴽⵎⵏⵜ ⴰⴱⵔⵉⴷ ⵍⵍⵉ ⵉⵜⵜⴰⵡⵉⵏ ⵖⵔ ⵜⴰⴷⴷⴰⵔⵜ ⵍⵍⵉ ⴷ ⵉⵜⵜⵓⵎⴰⵏⵏ ⵙⴳ ⵜⵓⴳⴳⵓⴳⵜ. ⵜⴱⴷⴷ ⵜⵎⵜⵜⴰⵏⵜ ⵓⵔ ⵜⴰ ⵜⴼⴼⵉⵖ ⵙⴳ ⵜⴰⴳⴰⵏⵜ, ⵜⴹⴼⵕ ⵜⵔⴱⴰⵜ ⵜⴰⵡⴰⴷⴰ, ⵜⵡⴰⵜⵙ ⵜⵉⴳⵎⵎⵉ ⵏⵏⵙ, ⵜⵙⵎⵓⵇⵇⵍ ⴷ ⵙ ⵜⵎⵜⵜⴰⵏⵜ ⵍⵍⵉ ⵉⴱⴷⴷⵏ, ⵜⵙⵇⵙⴰ ⵜⵜ: «ⵎⴰ ⴰⴷ ⵜⵙⴽⴰⵔⴷ!? ⵎⴰⵖⴼ ⵓⵔ ⴰⵔ ⵜⵣⵣⵉⴳⵉⵣⴷ!?»
ⵜⵔⵓⵔ ⴰⵙ ⵜⵎⵜⵜⴰⵏⵜ: «ⵓⵔ ⵙⵓⵍ ⵣⵎⵉⵔⵖ ⴰⴷ ⵙⵎⴷⵖ ⵓⴳⴳⴰⵔ.»
ⵜⵉⵏⵉ ⴰⵙ ⵜⵔⴱⴰⵜ: «ⵀⵢⵢⴰ ⵓⵔ ⴰⴷ ⵉⵢⵉ ⵙⵓⵍ ⵜⴰⵡⵉⵜ!?»
ⵜⵙⵎⴰⵇⵇⵍ ⵏⵏ ⵜⵎⵜⵜⴰⵏⵜ ⴳ ⵜⵉⵟⵟⴰⵡⵉⵏ ⵜⵉⵎⵥⵥⴰⵏⵉⵏ ⵏ ⵜⵔⴱⴰⵜ, ⵜⵔⴰⵔ ⴰⵙ: «ⵓⵀⵓ, ⵓⵔ ⴰⴷ ⴽⵎ ⴰⵡⵉⵖ, ⴷ ⵓⵔ ⴰⴷ ⴰⵡⵉⵖ ⴰⵡⴷ ⵢⵉⵎⵎⵉⵎ. ⵖⴰⵙ ⴷⴷⵓ ⴰⵡⴷ ⵜⵜ ⵉ ⵢⵉⵎⵎⵉⵎ, ⵔⴰⴷ ⴷ ⵙⵉⵙ ⴰⵖⵓⵍⵖ ⴳ ⵜⵉⵣⵉ ⴷ ⵢⵓⵙⴰⵏ, ⴰⵡⴷ ⴽⵎⵎ ⵔⴰⴷ ⴽⵎ ⴰⵡⵉⵖ.
ⵜⵎⵎⵔ ⵜⵔⴱⴰⵜ ⴽⵉⴳⴰⵏ ⴰⵎⵎ ⵜⵥⵕⴰ ⴽⵔⴰ ⵏ ⵡⴰⵢⵍⴰⵍ ⴰⴼⴰⵍⴽⴰⵢ, ⵜⵉⵏⵉ ⵉ ⵜⵎⵜⵜⴰⵏⵜ ⵙ ⵜⵓⵎⵔⵜ ⵉⴳⴳⵓⵜⵏ: «ⵜⴰⵏⵎⵎⵉⵔⵜ, ⵔⴰⴷ ⵙⵉⵎ ⵇⵇⵍⵖ, ⴰⵛⴽⵓ ⵙⵙⵏⵖ ⵉⵙ ⵓⵔ ⵜⵅⵛⵉⵏⵜ.»
ⵜⵓⵜ ⵜⵎⵜⵜⴰⵏⵜ ⴰⵢⵢⵉⵙ ⵏⵏⵙ, ⴰⵔ ⵉⵇⵇⴰⵣ ⴰⴽⴰⵍ ⵙ ⵜⴱⵉⵛⴰⵍ ⵏⵏⵙ, ⴰⵔ ⵏⵏ ⵉⵏⵜⵜⵍ ⴳ ⵜⵉⵍⵍⴰⵙ ⵏ ⵜⴰⴳⴰⵏⵜ ⴰⵎⵎ ⴽⵔⴰ ⵏ ⵓⵎⴰⵍⵓ
ⵜⴰⵎⵜⵜⴰⵏⵜ ⵓⵔ ⵜⵅⵛⵉⵏ, ⵉⵙ ⴰⴽⴽⵯ ⵜⴼⵓⵍⴽⵉ ⴽⵔⴰ ⵏ ⵜⵉⴽⴽⴰⵍ ⵉⴳ ⴷ ⵜⴷⴷⴰ ⴳ ⵜⵉⵣⵉ ⴷ ⵢⵓⵙⴰⵏ.
