ⴰⴷ ⴰⵎ ⵉⴼⴽ ⵕⴱⴱⵉ ⴰⵏⵏⴰⵣ ⵏ ⵜⵖⵉⴱⵔⵉⵜ ⴰ ⵜⴰⵎⴰⵣⵉⵖⵜ (2/2)
ⵎⵇⵇⴰⵔ ⵜⵜ ⵏⵏ ⵉⴽⴽⴰ ⵡⴰⵍⴰⵢ (ⵜⵜⴰⵇⴷⴷⵓⵎ) ⴰⴷ ⵉⵥⵥⴰⵢ, ⵉⵍⵉⵏ ⵉⵎⴰⵔⴰⵡⵏ (ⵍⵡⴰⵍⵉⴷⵉⵏ) ⵓⴳⵉⵏⵉⵏ ⴰⴷ ⵍⵎⴷⵏ ⵡⴰⵔⵔⴰⵡⵏ ⵏⵏⵙⵏ ⵢⴰⵜ ⵜⵓⵜⵍⴰⵢⵜ ⵏⵏⴰ ⵔⴰⴷ ⴰⵙⵏ ⵓⵔ ⵢⴰⵡⵙⵏ ⴳ ⵓⵙⵙⵍⵎⴷ ⴰⵏⴰⴼⵍⵍⴰ; ⵡⴰⵅⵅⴰ ⵎⴽⴰⵏⵏ, ⵉⵙⵎⴷ ⵙⵓⵍ ⴱⵏ ⵢⴰⵀⵓⴷⴰ ⵜⴰⵏⴰⵖⴰ ⵏⵏⵙ, ⵍⵍⵉ ⴷ ⵉⵙⵙⵏⵜⴰⵏ ⵉⵍⵎⵎⴰ ⴰⵔ ⵜⴰⴽⴽⴰ ⵜⴰⵢⴰⴼⵓⵜ: ⴳ ⵓⵙⴳⴳⵯⴰⵙ ⵏ 1902, ⵉⵍⴽⵎ ⵡⵓⵟⵟⵓⵏ ⵏ ⵜⴰⵡⵊⵉⵡⵉⵏ ⵏⵏⴰ ⵉⵙⵙⵎⵔⴰⵙⵏ ⵖⴰⵙ ⵜⴰⵄⵉⴱⵔⵉⵜ -ⵉⵍⴽⵎ- 10 (ⵏ ⵜⵡⴰⵛⵓⵏⵉⵏ); ⵉⵎⴰ ⴳ ⵓⵙⴳⴳⵯⴰⵙ ⵏ 1903, ⵉ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ, ⴳ ⵓⵎⵙⴰⵙⴰ ⴳⵔ ⵡⵓⴷⴰⵢⵏ ⵏ ⵉⵙⵔⴰⵢⵉⵍ, ⵔⴰⴷ ⵢⵉⵍⵉ ⵓⵎⵔⴰⵔⴰ ⵏ ⵡⴰⵡⴰⵍ ⵙ ⵜⵄⵉⴱⵔⵉⵜ!
ⵎⴰⵛⴰ, ⵉⵙ ⵜⵜ ⵏⵏ ⵣⵄⵎⴰ ⵓⵔ ⴽⴽⵉⵏ ⵉⵛⵏⴳⴰ (ⵉⵄⴷⴰⵡⵏ) ⴷⴰⵔ ⵜⵡⵏⴳⵉⵎⵜ ⴰⴷ ⵏ ⵓⵙⵙⵓⴷⵔ ⵏ ⵜⵄⵉⴱⵔⵉⵜ?
ⵄⴰⴷ! ⵏⴻⵏⵏⴰ ⵢⴰⴷ ⵙ ⵉⵣⵡⴰⵔ ⵎⴰⵙ ⴱⴷⴷⵏ ⵡⵓⴷⴰⵢⵏ ⵉⵔⴰⴷⵉⴽⴰⵍⵉⵢⵏ ⵏ ⵓⵕⵓⴱⴱⴰ ⵎⴳⴰⵍ ⵓⵙⵙⵎⵔⵙ ⵏ ⵜⵄⵉⴱⵔⵉⵜ ⴳ ⵓⵢⵏⵏⴰ ⵓⵔ ⵉⵣⴷⵉⵏ ⵙ ⵜⵥⴰⵍⵍⵉⵜ ⴷ ⵓⵙⴳⴷ, ⵉⵡⴰ ⵀⴰⵜ ⵓⵍⴰ ⵓⴷⴰⵢⵏ ⵉⵔⴰⴷⵉⴽⴰⵍⵉⵢⵏ ⵏ ⵉⵙⵔⴰⵢⵉⵍ (ⵙⵍⴰⵡⴰⵏ ⴰⴽⴽⵯ ⵉⵎⵣⴷⴰⵖⵏ ⵉⵏⵚⵍⵉⵢⵏ ⴷⴰ ⵓⵔ ⴳⵉⵏⵉⵏ ⵉⵚⵀⵢⵓⵏⵉⵢⵏ) ⴱⴷⴷⵏ ⵙ ⵡⵓⵣⵣⴰⵍ ⴷ ⵜⵎⵙⵙⵉ ⵎⴳⴰⵍ ⵓⵙⵏⴼⴰⵔ (ⵍⵎⵛⵕⵓⵄ) ⵏ ⵉⵍⵉⵄⵉⵥⴰⵕ, ⵚⵕⴹⵏ (ⴰⵛⵜⴽⴰⵏ) ⵙⵉⵙ ⵖⵓⵔ ⵓⵏⴱⴱⴰⴹ (ⵍⵃⴰⴽⵎ) ⴰⵄⵓⵜⵎⴰⵏⵉ (ⴰⵜⵓⵔⴽⵉⵢ) ⵍⵍⵉ ⵜ ⵉⵇⵇⵏⵏ ⴳ ⵓⴱⵏⵉⵇ ⴳ ⵓⵙⴳⴳⵯⴰⵙ ⵏ 1894, ⵉⴽⴽ ⵏⵏ ⴳⵉⵙ ⵢⴰⵏ ⵎⵏⵏⴰⵡ ⵡⴰⵢⵢⵓⵔⵏ, ⵉⵍⵎⵎⴰ ⵙⵙⵓⴼⵖⵏ ⵜ ⵉⴷ ⵉⵎⴷⴷⵓⴽⴽⴰⵍ ⵏⵏⵙ. ⵉⵜⵜⵓⵔⴳⵍ ⴰⵙ ⵓⵍⴰ ⵓⵖⵎⵉⵙ (ⵍⵊⴰⵔⵉⴷⴰ) ⵏⵏⵙ, ⵓⴳⴳⴰⵔ ⵏ ⵓⵙⴳⴳⵯⴰⵙ, ⵢⴰⴼ ⵏⵏ ⵉⵎⴰⵏ ⵏⵏⵙ ⵉⴼⵔⴷ ⵖⴰⵙ ⵏⵜⵜⴰ ⴷ ⵢⴰⵏ ⵎⵏⵏⴰⵡ ⵉⵎⴷⴷⵓⴽⴽⴰⵍ, ⴰⵢⴰⴷ ⴰⴷ ⵜ ⵢⵓⵊⵊⴰⵏ ⴰⴷ ⵉⴳ ⴰⴼⵓⵙ ⵏⵏⵙ ⴳ ⵓⴼⵓⵙ ⵏ ⵀⵉⵔⵜⵣⵉⵍ (ⴱⴰⴱⴰⵙ ⵏ ⵜⵚⵀⵢⵓⵏⵉⵜ) ⴰⴼⴰⴷ ⴰⴷ ⵢⴰⴼ ⵡⵉ ⵜ ⵉⵙⵏⴰⵍⵏ ⴳ ⵜⵡⵓⵔⵉ.
ⵉⵎⵉⴽⴽ ⵙ ⵉⵎⵉⴽⴽ, ⵙⵙⵏⵜⴰⵏ ⵉⵡⴷⴰⵏ (ⵎⵉⴷⴷⵏ) ⴰⵔ ⵜⵜⴼⵔⴰⴽⵏ ⵙ ⵡⴰⵜⵉⴳ ⵏ ⵜⵓⵜⵍⴰⵢⵜ ⵏⵏⵙⵏ (ⵎⵇⵇⴰⵔ ⴰⴽⴽⵯ ⵓⵔ ⵜⴳⵉ ⵜⵓⵜⵍⴰⵢⵜ ⵏⵏⵙⵏ ⵜⴰⵢⵎⵎⴰⵜ), ⴰⵔ ⴷ ⵉⵍⵎⵎⴰ ⵙⴽⴰⵔⵏ ⴰⵎⵣⴳⵓⵏ (ⵍⵎⵚⵕⵃ), ⴰⵥⴰⵡⴰⵏ, ⴰⵏⵣⵡⴰⵢ (ⴰⵕⴰⴷⵢⵓ), ⵉⵖⵎⵉⵙⵏ, ⵜⵓⵔⵜⵉⵜⵉⵏ ⵜⵉⵄⵉⴱⵔⵉⵢⵉⵏ ⵏ ⵉⵎⵥⵢⴰⵏⵏ; ⴰⵔ ⴰⴽⴽⴰⵏ ⵎⴷⴷⵏ ⵉ ⵜⴰⵔⵡⴰ ⵏⵏⵙⵏ ⵉⵙⵎⴰⵡⵏ ⵉⵄⵉⴱⵔⵉⵢⵏ, ⴰⵔ ⵇⵇⴰⵔⵏ ⵡⴰⵕⵕⴰⴹⵏ ⵜⴰⵙⴽⵍⴰ, ⵜⵉⵎⴰⵙⵙⴰⵏⵉⵏ, ⵜⵓⵙⵏⴰⴽⵜ ⴷ ⵜⴻⵜⵉⴽⵏⵓⵍⵓⵊⵉⵢⵜ ⵙ ⵜⵄⵉⴱⵔⵉⵜ. ⴳ 1916, ⴽⴽⴰⵏ ⵜⵜ ⵏⵏ 40% ⴳ ⵡⵓⴷⴰⵢⵏ ⵏ ⵉⵙⵔⴰⵢⵉⵍ ⴰⵔ ⵜⵜⵉⵏⵉⵏ ⵎⴰⵙ ⴷⴰⵔⵙⵏ ⵜⴳⴰ ⵜⵄⵉⴱⵔⵉⵜ ⵜⵓⵜⵍⴰⵢⵜ ⵜⴰⵎⵣⵡⴰⵔⵓⵜ, ⵜⵉⴳⵎⵉⴹⵉ ⴰⴷ ⴰⵔ ⵜⴻⵜⵜⴰⵡⴹ (ⵜⵍⴽⴽⵎ) 75% ⴳ ⵜⴰⵍ ⴰⴱⵉⴱ ⴷ ⵉⴷⵖⴰⵔⵏ ⵢⴰⴹⵏⵉⵏ ⵏⵏⴰ ⴳ ⴷⵔⵓⵙⵏ ⵡⵓⴷⴰⵢⵏ ⵉⵔⴰⴷⵉⴽⴰⵍⵉⵢⵏ (ⵜⵇⵇⵉⵎ ⵜⵎⴷⵉⵏⵜ ⵏ ⵢⵉⵔⵓⵛⴰⵍⴰⵢⵉⵎ ⴷ ⵉⵖⵔⵎ ⴰⵔⴰⴷⵉⴽⴰⵍⵉ ⵏⵏⴰ ⴳ ⴱⴰⵀⵔⴰ ⵉⴷⵔⵓⵙ ⵡⴰⵡⴰⵍ ⵙ ⵜⵄⵉⴱⵔⵉⵜ).
ⵓⵔ ⵜⵜ ⵏⵏ ⵉⴽⴽⵉ ⵓⵙⵙⵍⵎⴷ ⵏ ⵜⵄⵉⴱⵔⵉⵜ ⵉⵥⵍⵉ ⵖⴰⵙ ⵙ ⵉⵎⵥⵢⴰⵏⵏ ⵏⵏⴰ ⵎⵉ ⵔⴰⴷ ⵜⴳ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵎⴰⵛⴰ ⵓⵍⴰ ⵎⵉⴷⴷⵏ ⵎⵇⵇⵓⵔⵏⵉⵏ, ⵙⵍⴰⵡⴰⵏ ⴰⴽⴽⵯ ⵡⵉⴷⴰ ⴷ ⵓⵙⴰⵏⵉⵏ ⵙⴳ ⴱⵕⵕⴰ ⵏ ⵉⵙⵔⴰⵢⵉⵍ; ⴰⵛⴽⵓ, ⴰⴷ ⵓⵔ ⵏⵜⵜⵓ ⵎⴰⵙ ⵜⵜ ⵏⵏ ⵜⴽⴽⴰ ⵢⴰⵜ ⵜⵖⵏⵏⴰⵏⵜ ⵉⵇⵙⵃⵏ ⴳⵔ ⵜⵄⵉⴱⵔⵉⵜ ⵙⴳ ⵢⴰⵜ ⵜⵙⴳⴰ ⴷ ⵜⴼⵕⴰⵏⵚⵉⵚⵜ, ⵜⴰⵏⴳⵍⵉⵣⵉⵜ ⴷ ⵜⴰⵍⵉⵎⴰⵏⵜ ⵙⴳ ⵜⵙⴳⴰ ⵢⴰⴹⵏ; ⴰⵢⴰⴷ ⵔⴰⴷ ⵢⴰⵡⴹ ⴰⵢⴷⴰ ⵎⵉ ⵏⵜⵜⵉⵏⵉ ⴳ ⵓⵎⵣⵔⵓⵢ ⵏ ⵉⵙⵔⴰⵢⵉⵍ: “ⵉⵎⵏⵖⵉ ⵏ ⵜⵓⵜⵍⴰⵢⵉⵏ”, ⵙⵍⴰⵡⴰⵏ ⴰⴽⴽⵯ ⴳⵔ ⵜⵄⵉⴱⵔⵉⵜ ⴷ ⵜⴰⵍⵉⵎⴰⵏⵜ, ⵣⵓⵏ ⴷ ⵍⵍⵉⴳ ⵜⵜ ⵏⵏ ⵜⴽⴽⴰ ⵔⴰⴷ ⵜⴻⵜⵜⵓⵕⵥⵎ ⵜⵙⴷⴰⵡⵉⵜ ⵜⴰⵜⵉⴽⵏⵉⵜ ⵏ ⵃⴰⵢⴼⴰ ⴳ ⵓⵙⴳⴳⵯⴰⵙ ⵏ 1913 (ⵜⴰⵍⵍⵉ ⵉⵜⵜⵡⴰⵙⵙⵏⵏ ⵖⵉⵍⴰⴷ ⴳ ⵓⵎⴰⴹⴰⵍ ⵙ ⵢⵉⵙⵎ ⵏ ⵜⵉⵅⵏⵢⵓⵏ), ⵜⵎⵓⵏ ⵜⵎⵀⵍⴰ (ⵍⵉⴹⴰⵕⴰ) ⵏ ⵜⵙⴷⴰⵡⵉⵜ ⴳ ⴱⵉⵔⵍⵉⵏ, ⵜⵉⵏⵉ ⵎⴰⵙ ⵔⴰⴷ ⵜⵜⵡⴰⵙⵍⵎⴷⵏⵜ ⵜⵎⴰⵙⵙⴰⵏⵉⵏ ⵜⵉⵜⵉⴽⵏⵉⵢⵉⵏ ⵙ ⵜⴰⵍⵉⵎⴰⵏⵜ; ⵏⴽⵔⵏ ⵎⴷⴷⵏ ⴰⵔ ⵙⵖⵓⵢⵢⵓⵏ ⴼ ⵜⵖⵜⴰⵙⵜ (ⵍⵇⴰⵔⴰⵔ) ⴰⴷ: ⵙⵍⴳⵏ ⵉⵏⵍⵎⴰⴷⵏ ⴷ ⵉⵙⵍⵎⴰⴷⵏ ⵏ ⵃⴰⵢⴼⴰ ⴷ ⵜⴰⵍ ⴰⴱⵉⴱ ⵜⵉⵖⵔⵉ (ⵙⴽⵔⵏ ⵍⵉⴹⵕⴰⴱ), ⵙⵙⵓⵜⵔⵏ ⴰⴷ ⵜⴳ ⵜⵄⵉⴱⵔⵉⵜ ⵜⵓⵜⵍⴰⵢⵜ ⵜⴰⵎⵢⵉⵡⵏⵜ (ⵍⵡⴰⵃⵉⴷⴰ) ⵏ ⵓⵙⵙⵍⵎⴷ ⴷ ⵜⵖⵔⵉ. ⴳ ⵓⵎⴳⴳⴰⵔⵓ, ⴷⴼⴼⵉⵔ ⴽⵉⴳⴰⵏ ⵏ ⵜⵖⵏⵏⴰⵏⵜ, ⵜⴻⵏⵏⵓⵕⵥⵎ ⵜⵙⴷⴰⵡⵉⵜ, ⵙ ⵜⵄⵉⴱⵔⵉⵜ ⴽⴰ. ⵙ ⵜⵔⵏⵏⴰⵡⵜ ⴰⴷ, ⵔⴰⴷ ⵜⵙⵙⴷⵓⵙ ⵜⵄⵉⴱⵔⵉⵜ ⵉⵎⴰⵏ ⵏⵏⵙ, ⵜⵙⵔⵙ ⵢⴰⵏ ⵓⴹⴰⵕ ⴳ ⵓⵎⴰⴹⴰⵍ ⵏ ⵜⴷⵍⵙⴰ ⵜⴰⵜⵔⴰⵔⵜ, ⴷ ⵜⴻⵜⵉⴽⵏⵓⵍⵓⵊⵉⵢⵜ.
10 ⵏ ⵉⵙⴳⴳⵯⴰⵙⵏ ⴷⴼⴼⵉⵔ ⵓⵢⴰⴷ, ⴳ 1924, ⵜⵕⵥⵎ ⵜⵙⴷⴰⵡⵉⵜ ⵏ ⵢⵉⵔⵓⵛⴰⵍⴰⵢⵉⵎ ⵜⵉⵡⵡⵓⵔⴰ ⵏⵏⵙ, ⵜⴳ ⴳⵉⵙ ⵜⵄⵉⴱⵔⵉⵜ ⵜⵓⵜⵍⴰⵢⵜ ⵏ ⵓⵍⵎⴰⴷ ⴷ ⵓⵙⵙⵍⵎⴷ; ⵉⵎⴰ ⴰⵙⵉⵏⴰⴳ ⵏ ⵡⵉⵣⵎⴰⵏ ⵍⵍⵉⴳ ⵉⵙⵙⵏⵜⴰ ⴳ 1934, ⵓⵔ ⴰⴽⴽⵯ ⵙⵓⵍ ⵉⵍⵍⵉ ⵡⵉ ⵉⵙⵇⵙⴰⵏ ⵎⴰⵜⵜⴰ ⵜⵓⵜⵍⴰⵢⵜ ⴰ ⵙ ⵔⴰⴷ ⵜⵉⵍⵉ ⵜⵖⵔⵉ.
ⴳ ⵓⵙⴳⴳⵯⴰⵙ ⵏ 1922, ⵔⴰⴷ ⵜⵙⵙⵏⵚⴱ (ⵜⵕⵚⵚⵎ) ⵜⵏⴱⴰⴹⵜ ⵜⴰⴱⵕⵉⵟⴰⵏⵉⵢⵜ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ (ⵜⴰⵎⴰ ⵏ ⵜⵏⴳⵍⵉⵣⵉⵜ ⴷ ⵜⴰⵄⵕⴰⴱⵜ) ⴰⵎⵎ ⵜⵓⵜⵍⴰⵢⵜ ⵏ ⵜⵎⵙⵙⵓⴳⵓⵔⵜ (ⵍⵉⴷⴰⵕⴰ), ⴰⵢⵍⵍⵉ ⵔⴰⴷ ⴷⴰⵖ ⵉⴼⴽ ⵉ ⵜⵓⵜⵍⴰⵢⵜ ⴰⴷ ⵢⴰⵏ ⵡⴰⵣⴰⵍ ⵉⵅⴰⵜⵔⵏ, ⴰⵛⴽⵓ ⵜⴰⵣⵎⵔⵜ ⵏ ⵓⵡⴰⵏⴽ (ⴷⴷⵓⵍⴰ) ⵓⵔ ⵜⵜ ⵙⴰⵙⵡⴰ ⴷ ⵜⵉⵏ ⵎⴷⴷⵏ.
ⴳ ⵜⵎⴷⵉⵏⵉⵏ ⴰⵎⵎ ⵜⴰⵍ ⴰⴱⵉⴱ (ⵜⴰⵎⴷⵉⵏⵜ ⵜⴰⵄⵉⴱⵔⵉⵜ ⵜⴰⵎⵣⵡⴰⵔⵓⵜ), ⵉⵙⴽⵔ ⴱⵏ ⵚⵀⵢⵓⵏ (ⵎⴻⵎⵎⵉⵙ ⵏ ⴱⵏ ⵢⴰⵀⵓⴷⴰ) ⵢⴰⵏ ⵓⵎⵣⵉⵣⵣⵍ (ⵍⵃⵎⵍⴰ): ⵡⴰⵏⵏⴰ ⵉⵙⵍⵍⴰⵏ ⵉ ⴽⵔⴰ ⵏ ⵢⴰⵏ ⴰⵔ ⵉⵙⴰⵡⴰⵍ ⵙ ⴽⵔⴰ ⵏ ⵜⵓⵜⵍⴰⵢⵜ ⵢⴰⴹⵏ, ⴰⵔ ⴰⵙ ⵉⵜⵜⵉⵏⵉ “ⵡⴰ ⴰⵄⵉⴱⵔⵉ, ⵙⴰⵡⵍ ⵜⴰⵄⵉⴱⵔⵉⵜ”.
ⴰⴷ ⴷⴰⵖ ⵏⵓⵔⵔⵉ ⵙ ⵉⵍⵉⵄⵉⵥⴰⵕ, ⵏⵙⵙⴽⵜⵉ ⴷ ⵎⴰⵙ ⵉⵙⵙⵏⵜⴰ ⵢⴰⵏ ⵓⵙⵏⴼⴰⵔ ⵙⴳ 1901 ⴰⵢⵍⵍⵉⴳ ⵉⵎⵎⵓⵜ (ⵙ ⵡⴰⵟⵟⴰⵏ ⵏ ⵜⵓⵔⵉⵏ) ⴳ ⵢⵉⵔⵓⵛⴰⵍⴰⵢⵉⵎ ⴳ ⵜⴳⵉⵔⴰ ⵏ 1922: “ⵎⵉⵍⵓⵏ ⵀⴰⵍⴰⵛⵓⵏ ⵀⴰⵄⵉⴱⵔⵉⵜ ⵀⴰⵄⵉⵛⴰⵏⴰ ⴱⵉⵀⴰⵅⴰⴷⴰⵛⴰ” (ⴰⵎⴰⵡⴰⵍ ⵏ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ ⵜⴰⵇⴱⵓⵔⵜ ⴷ ⵜⴻⵜⵔⴰⵔⵜ); ⴰⵎⴰⵡⴰⵍ ⴰⴷ ⵔⴰⴷ ⵙⵉⴳⵙ ⵉⵙⵙⵓⴼⵖ 7 ⵉⵙⵓⵏⴰⴹ (ⵉⴳⵯⵣⵎⴰⵏ) ⵙ ⴷⴰⵜ ⵜⵎⵜⵜⴰⵏⵜ ⵏⵏⵙ, ⵜⵙⵙⵓⴼⵖ ⵜⵎⵟⵟⵓⴹⵜ ⵏⵏⵙ ⴷ ⵎⴻⵎⵎⵉⵙ ⵉⵀⵓⴷ 9 ⵉⵙⵓⵏⴰⴹ ⵏⵏⵉ ⵇⵇⵉⵎⵏⵉⵏ ⴳ ⵓⵙⴳⴳⵯⴰⵙ ⵏ 1959. ⴰⵎⴰⵡⴰⵍ ⴰⴷ ⵉⵔⵏⴰ ⴷⵉⴳⵙ ⴽⵉⴳⴰⵏ ⵏ ⵉⵔⵎⴰⵡⵏ ⴷ ⵜⴳⵓⵔⵉⵡⵉⵏ ⵜⵉⵏⵓⵍⴼⴰ (Néologismes) ⴷⴰ ⵉⵕⴹⵍ ⵙⴳ ⵜⴰⵄⵕⴰⴱⵜ (ⵙ ⵡⴰⵟⵟⴰⵚ), ⵜⴰⵕⴰⵎⵉⵜ ⵜⴰⵇⴱⵓⵔⵜ, ⵜⴰⵍⴰⵜⵉⵏⵉⵜ ⵜⴰⵇⴱⵓⵔⵜ, ⵜⴰⵏⴳⵍⵉⵣⵉⵜ, ⵜⴰⵔⵓⵙⵉⵢⵜ, ⵜⴰⵍⵉⵎⴰⵏⵜ, ⵜⴰⴼⵕⴰⵏⵚⵉⵚⵜ, ⴰⵜⴳ.
ⵉⵎⵎⵓⵜ ⴱⵏ ⵢⴰⵀⵓⴷⴰ, ⵜⵖⴰⵎⴰ ⴷ ⵜⵄⵉⴱⵔⵉⵜ, ⵖⴰⵎⴰⵏ ⴷⵉⴷⵙ ⵡⴰⵔⵔⴰⵡⵏ ⵏⵏⵙ ⵢⴰⴹⵏⵉⵏ ⵍⵍⵉ ⵜⵜ ⵙⵡⵓⵔⵉⵏⵉⵏ (ⵅⴷⵎⵏⵉⵏ), ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴷ ⵉⵍⵓⵍⴰ ⵓⵡⴰⵏⴽ ⵏ ⵉⵙⵔⴰⵢⵉⵍ ⴳ 1949, ⵏⴱⴹⵏ ⵡⵓⴷⴰⵢⵏ ⵉⵖⴼⴰⵡⵏ ⵏⵏⵙⵏ, ⵙⴽⵔⵏ ⵙⴳ ⵜⵄⵉⴱⵔⵉⵜ ⵜⵓⵜⵍⴰⵢⵜ ⵜⴰⵎⵣⵡⴰⵔⵓⵜ ⵏ ⵉⵙⵔⴰⵢⵉⵍ (ⵏⵏⵉⴳ ⵜⴰⵄⵕⴰⴱⵜ ⴷ ⵜⵏⴳⵍⵉⵣⵉⵜ).
ⴷⵖⵉ, ⵜⴰⵄⵉⴱⵔⵉⵜ ⵜⴰⵜⵔⴰⵔⵜ ⴰⵔ ⵜⵜ ⵙⴰⵡⴰⵍⵏ ⵓⴳⴳⴰⵔ ⵏ 9 ⵉⴷ ⵎⵍⵢⵓⵏ ⵏ ⵎⴷⴷⵏ ⴳ ⵓⵎⴰⴹⴰⵍ: 5 ⵉⴷ ⵎⵍⵢⵓⵏ ⵙⵉⴳⵙⵏ ⵍⵍⴰⵏ ⴳ ⵉⵙⵔⴰⵢⵉⵍ ⴷ ⵉⴽⴰⵍⵍⵏ ⵉⴼⴰⵍⵉⵚⵟⵉⵏⵉⵢⵏ; ⴷ ⵓⵎⴹⴰⵏ (ⵍⵄⴰⴷⴰⴷ) ⵏ ⵜⵥⵕⵉⴳⵉⵏ ⵏⵏⴰ ⵜⵜⴼⴼⵓⵖⵏⵉⵏ ⴳ ⵜⵎⴰⵣⵉⵔⵜ ⵜⴰⵄⵉⴱⵔⵉⵜ ⵉⵙⴽⵔ ⵙⴳⵉⵙ ⵜⵉⵙⵙ 2 ⴳ ⵓⵙⵡⵉⵔ ⴰⴳⵔⴰⵖⵍⴰⵏ (ⴰⵎⴰⴹⵍⴰⵏ), ⵜⴰⵜⵢ (ⵜⵣⵔⵉ) ⵙⵉⵙ ⴰⵢⴷⴰ ⵉⵜⵜⴼⴼⵓⵖⵏ ⴳ ⵜⵎⵓⵔⴰ ⵜⵉⵎⵙⵍⴰⵄⵕⴰⴱⵉⵏ ⴰⴽⴽⵯ!
ⵉⵎⴰ ⴰⵙⴽⴽⵉⵍ ⴰⵄⵉⴱⵔⵉ? ⵓⵔ ⵜ ⴰⴽⴽⵯ ⵏⴱⴷⵉⵔ?
ⴰⵙⴽⴽⵉⵍ ⴰⴷ ⵉⵎⵙⴰⵔ ⴰⵙ ⵣⵓⵏ ⴷ ⴰⵢⴷⴰ ⵉⵜⵜⵎⵙⴰⵔⵏ ⵉ ⵜⴼⵉⵏⴰⵖ ⵖⵉⵍⴰⴷ: ⴽⵉⴳⴰⵏ ⵏ ⵉⵢⵙⵔⴰⵢⵉⵍⵉⵢⵏ ⵉⵢⵛⴽⵉⵏⴰⵣⵉⵢⵏ (ⵍⵍⵉ ⴷ ⴷⴷⴰⵏⵉⵏ ⵙⴳ ⵜⵎⵓⵔⴰ ⵏ ⵓⵕⵓⴱⴱⴰ, ⵔⵓⵙⵢⴰ ⴷ ⵎⵉⵔⵉⴽⴰⵏ) ⴰⴷ ⵜⵜ ⵏⵏ ⴽⴽⴰⵏⵉⵏ ⵔⴰⵏ ⴰⴷ ⴳⵏ ⴰⵙⴽⴽⵉⵍ ⴰⵍⴰⵜⵉⵏⵉ (ⵍⵍⵉ ⵎⵢⴰⵔⵏ) ⴳ ⵓⴷⵖⴰⵔ ⵏ ⵓⵙⴽⴽⵉⵍ ⴰⵄⵉⴱⵔⵉ, ⵎⴰⵛⴰ ⵎⵎⵉⴳⴳⵉⵔⵏ ⴰⴽⴷ ⵢⴰⵜ ⵜⵏⵣⴱⴰⵢⵜ ⵏⵏⴰ ⵉⴼⵔⵙⵏ ⴽⵉⴳⴰⵏ ⵙⴳ ⵖⵓⵔ ⵉⵎⵏⵄⴰⵕⵏ ⵏ ⵓⵙⴽⴽⵉⵍ ⴰⵄⵉⴱⵔⵉ.
ⵢⴰⴷⵍⵍⵉ! ⴰⵙⴽⴽⵉⵍ ⵓⵔ ⵖⵓⵔⵙ ⵎⴰ ⵙ ⵔⴰⴷ ⵉⵙⴱⵉⴹⵕ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ, ⴷ ⵉⴳ ⴷⴷⴰⴷ ⵏⵙⵙⵓⴷⵔ ⵢⴰⵜ ⵜⵓⵜⵍⴰⵢⵜ ⵉⵎⵎⵓⵜⵏ, ⴰⴷ ⵏⵉⵜ ⴷⵉⴷⵙ ⵏⵙⵙⵓⴷⵔ ⵓⵍⴰ ⴰⵙⴽⴽⵉⵍ ⵏⵏⵙ, ⵃⵓⵎⴰ ⴰⴷ ⵏⴳ ⵜⵉⴼⵉⴼⵍⵜ ⵉ ⵜⴰⵟⵟⴰⵊⵉⵏⵜ, ⵏⵙⴼⴰⵍⴽⵉ ⵜⵜ ⵙⵉⵙ ⵓⴳⴳⴰⵔ.
ⵉⵎⴰ ⵓⴷⴰⵢⵏ ⵉⵔⴰⴷⵉⴽⴰⵍⵉⵢⵏ? ⵎⴰ ⴰⴷ ⵙⵓⵍ ⵜⵜⵉⵏⵉⵏ?
ⵡⵉⴷ ⵙⵓⵍⵏⵜ ⵓⴽⴰⵏ ⴳⵉⵙⵏ ⵢⴰⵏ ⵎⵏⵏⴰⵡⵜ ⵜⵔⵓⴱⴱⴰ ⵎⵥⵥⵉⵢⵏⵉⵏ ⵓⴳⵉⵏⵉⵏ -ⴰⵔ ⵡⴰⵙⵙ ⵓ- ⴰⴷ ⵙⵙⵎⵔⵙⵏ ⵜⴰⵄⵉⴱⵔⵉⵜ ⴳ ⴽⵔⴰ ⵏ ⵜⵖⴰⵡⵙⴰ ⵢⴰⴹⵏ ⵏⵏⴰ ⵓⵔ ⵉⴳⵉⵏ ⵜⴰⵥⴰⵍⵍⵉⵜ ⵏⵖ ⴷ ⵜⵉⵔⵔⴰ ⵜⴰⵙⴳⴷⴰⵏⵜ.
ⵉⵡⴰ ⵎⴰ ⵔⴰⴷ ⴰⵎ ⵉⵏⵉⵖ ⴰ ⵜⴰⵎⴰⵣⵉⵖⵜ? ⴰⴷ ⴰⵎ ⵉⴼⴽ ⵕⴱⴱⵉ ⴽⵔⴰ ⵏ ⵜⴰⵔⵡⴰ ⵣⵓⵏ ⴷ ⵜⴰⵔⵡⴰ ⵍⵍⵉ ⵉⴼⴽⴰ ⵉ ⵜⵄⵉⴱⵔⵉⵜ! ⵉⵎⴰ ⴰⵏⵏⴰⵣ, ⵀⴰⵜ ⵓⵔ ⴷⴰⵔⵎ ⵎⴰ ⴰⴷ ⵙⵉⵙ ⵜⵙⴽⴰⵔⴷ ⵉⴳ ⵓⵔ ⵉⵎⵓⵏ ⴷ ⵜⵡⵓⵔⵉ ⵏ ⵎⴷⴷⵏ ⵏⵏⴰ ⵔⴰⴷ ⵓⵙⵉⵏⵉⵏ ⴰⵏⵣⴳⵓⵎ ⴷ ⵙⵙⵉⵄⵔ ⵏⵏⵎ.
ⵢⵓⵔⴰ ⵜ ⵢⴰⵙⵉⵏ ⴰⵢⵜ ⵍⵎⵓⴷⴷⵏ, 2017
