ⴰⴷ ⴰⵎ ⵉⴼⴽ ⵕⴱⴱⵉ ⴰⵏⵏⴰⵣ ⵏ ⵜⵖⵉⴱⵔⵉⵜ ⴰ ⵜⴰⵎⴰⵣⵉⵖⵜ (1/2)
ⵜⵙⵙⵏⵎ ⴰⴽⴽⵯ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ, ⵜⵓⵜⵍⴰⵢⵜ ⵏ ⵡⵓⴷⴰⵢⵏ, ⵜⵓⵜⵍⴰⵢⵜ ⵏ ⵜⵎⵓⵔⵜ ⵏ ⵉⵙⵔⴰⵢⵉⵍ; ⵜⵉⵙⵉⵏⵎ ⵓⵍⴰ ⵉⵙⴽⴽⵉⵍⵏ ⵏⵏⵙ, ⵎⴰⵛⴰ ⵉⴷⵔⵓⵙ ⴳⵉⵡⵏ ⵡⵉ ⵉⵙⵙⵏⵏ ⴰⵎⵣⵔⵓⵢ ⵏⵏⵙ.
ⵜⴰⵏⴼⵓⵙⵜ (ⵜⴰⵏⵇⵇⵉⵙⵜ) ⵏ ⵜⵄⵉⴱⵔⵉⵜ ⵓⵔ ⵜⵍⵉ ⴰⵏⴰⵡ, ⴷ ⵉⴳ ⵏⵔⴰ ⴰⴷ ⵜⵜ ⵏⵉⵏⵉ ⴳ ⵢⴰⵜ ⵜⴳⵓⵔⵉ, ⵜⴰⵎⴳⴳⴰⵔⵓⵜ ⴰⴷ ⵓⵔ ⵔⴰⴷ ⵜⴳ ⴰⵎⵔ: ⵜⵓⵣⵣⴰⵏⵜ! (ⵜⴰⵎⴽⵔⵔⴰ/ⵍⵎⵓⵄⵊⵉⵣⴰ).
ⵎⴰⴼ ⵣⵄⵎⴰ ⵜⴳⴰ ⵜⵓⵣⵣⴰⵏⵜ?
ⵔⴰⴷ ⵙⴽⵔⵖ ⴰⵢⵏⵏⴰ ⵎⵉ ⵓⴼⵉⵖ ⴰⴼⴰⴷ ⴰⴷ ⵙⴳⵣⵍⵖ ⴰⵍⵍⴰⵙ ⵉⵏⵓ, ⴰⵛⴽⵓ ⵙⵙⵏⵖ ⵎⴰⵙ ⵓⵔ ⵃⵎⵉⵍⵏ ⴰⵢⵜ ⴷⴰⵔⵉ ⴰⴷ ⵖⵔⵏ ⴰⵢⵏⵏⴰ ⵉⵖⵣⵣⵉⴼⵏ...
ⴰⵔ ⵜⵜⵉⵏⵉⵏ ⵉⵎⵙⵏⵉⵍⵙⵏ ⵎⴰⵙ ⴷ ⵜⵓⵜⵍⴰⵢⵜ ⵜⴳⴰ ⵣⵓⵏ ⴷ ⴰⴼⴳⴰⵏ, ⴰⵔ ⴷ ⵜⴻⵜⵜⵍⴰⵍ, ⵜⵉⵎⵖⵓⵔ, ⵜⵡⵙⵙⵔ, ⵜⵎⵎⵜ.
ⵓⵔ ⵊⵊⵉⵏ ⴷ ⵢⴰⵖⵓⵍ ⴽⵔⴰ ⵏ ⵓⴼⴳⴰⵏ ⵙⴳ ⵜⵎⵜⵜⴰⵏⵜ ⵙ ⵜⵓⴷⵔⵜ! ⵢⴰⵡⵏ?
ⵉⵡⴰ ⵀⴰⵜ ⵜⴰⵄⵉⴱⵔⵉⵜ ⵜⴷⵡⵍ ⴷ ⵙⴳ ⵜⵎⵜⵜⴰⵏⵜ ⵙ ⵜⵓⴷⵔⵜ!
ⵎⴰⵏⵎⴽ?
ⵉⵡⴰ ⵉⵏⵢⴰⵜ “ⴱⴰⵥⵥ”!!!
ⵓⵡⵉⵏ ⴷ ⵉⵎⴰⵙⵙⴰⵏⵏ ⵏ ⵓⵎⵣⵔⵓⵢ ⵎⴰⵙ ⵜⵜ ⵏⵏ ⵜⴽⴽⴰ ⵜⵓⵜⵍⴰⵢⵜ ⴰⴷ ⴳ ⵜⵎⴰⵣⵉⵔⵜ ⵏ ⴽⵏⵄⴰⵏ ⵙ ⴷⴰⵜ ⴰⴷ ⵜⵉⵍⵉ ⵜⴳⵍⴷⵉⵜ ⵏ ⴷⴰⵡⴷ ⴷ ⵙⵍⵉⵎⴰⵏ, ⴰⵔ ⵙⴰⵡⴰⵍⵏ ⵎⴷⴷⵏ ⵙ ⵜⵏⵜⴰⵍⵉⵡⵉⵏ ⵏⵏⵙ ⴳ ⵜⵓⴷⵔⵜ ⵏⵏⵙⵏ ⵜⴰⴽⵓⵢⴰⵙⵜ; ⵜⴰⵏⵜⴰⵍⵉⵡⵉⵏ ⴰⴷ ⴰ ⵙ ⵜⴻⵜⵜⵢⴰⵔⴰ ⵜⵜⴰⵡⵔⴰⵜ (ⴰⴷⵍⵉⵙ ⵍⵍⵉ ⴰⴽⴽⵯ ⵉⵍⴰⵏ ⴰⵜⵉⴳ ⴷⴰⵔ ⵡⵓⴷⴰⵢⵏ); ⵇⵇⵉⵎⵏ ⵉⵄⵉⴱⵔⵉⵢⵏ ⴰⵔ ⵙⴰⵡⴰⵍⵏ ⵜⵓⵜⵍⴰⵢⵜ ⵏⵏⵙⵏ, ⴰⵢⵍⵍⵉⴳ ⵜⵍⴽⵎ ⵜⴰⵙⵓⵜ ⵜⵉⵙⵙ 2 ⴷⴼⴼⵉⵔ ⵜⵍⴰⵍⵉⵜ ⵏ ⵄⵉⵙⴰ: ⵓⵔ ⵙⵓⵍ ⵜⴳⵉ ⵜⵄⵉⴱⵔⵉⵜ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵏ ⵡⵓⴷⴰⵢⵏ, ⵜⴰⵖⵓⵍ ⴷ ⵜⵓⵜⵍⴰⵢⵜ ⵜⴰⵙⴳⴷⴰⵏⵜ ⴽⴰ (ⵜⵉⵏ ⵜⵥⴰⵍⵍⵉⵜ ⴷ ⵡⴰⵔⵔⴰⵜⵏ ⵏ ⵉⵃⵣⵣⴰⵏⵏ); ⵜⵎⵎⵜ! ⵜⴰⵎⵥ ⵜⴰⵕⴰⵎⵉⵜ ⴰⴷⵖⴰⵔ ⵏⵏⵙ ⴷⴰⵔ ⵉⵄⵉⴱⵔⵉⵢⵏ.
ⵜⵇⵇⵉⵎ ⵜⵄⵉⴱⵔⵉⵜ ⴳ ⵓⵥⴽⴽⴰ (ⵜⵉⵎⴹⵍⵜ) ⵏⵏⵙ, ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ, ⵇⵇⵉⵎⵏ ⵜⴰⵔⵡⴰ ⵏⵏⵙ ⴰⵔ ⵙⴰⵡⴰⵍⵏ ⵜⵓⵜⵍⴰⵢⵉⵏ ⵏ ⵜⵎⵉⵣⴰⵔ ⴳ ⵣⴷⴷⵖⵏ, ⵏⵖ ⴷ ⴽⵔⴰ ⵏ ⵜⵏⵜⴰⵍⵉⵡⵉⵏ ⴰⵎⵎ ⵜⵄⵉⴱⵔⵎⴰⵣⵉⵖⵜ, ⵜⴰⵄⵉⴱⵔⴰⵄⵕⴰⴱⵜ, ⵜⴰⵄⵉⴱⵔⵚⴱⵏⵢⵓⵍⵜ, ⵜⴰⵢⴷⴷⵉⵛⵜ, ⴰⵜⴳ.; ⴰⵢⵍⵍⵉⴳ ⴷ ⵢⵓⵎⴰⵏ (ⵉⴱⴰⵏ), ⴳⵔ ⵜⴰⵙⵓⵜ ⵜⵉⵙⵙ 18 ⴷ ⵜⵉⵙⵙ 19, ⵢⴰⵏ ⵓⵎⵓⵙⵙⵓ ⵏ ⵓⵙⵡⵉⵏⴳⵎ ⵓⴷⴰⵢ, ⵙ ⵢⵉⵙⵎ ⵏ “ⵀⴰⵙⴽⴰⵍⴰ” (ⴰⵙⴳⵎⵉ ⵙ ⵜⵄⵉⴱⵔⵉⵜ), ⵍⵍⵉ ⴷ ⵢⵓⴳⵎⵏ ⵙⴳ ⵓⵎⵓⵙⵙⵓ ⵏ ⵜⴰⴼⴰⵜⵉⵏ/ⵉⵙⴼⴰⵡⵏ; ⴳ ⵓⵎⵣⵡⴰⵔⵓ, ⵜⵜⵡⴰⵙⵙⵏⵏⵜ ⵜⵡⵏⴳⵉⵎⵉⵏ ⵏ ⵓⵎⵓⵙⵙⵓ ⵏ ⵀⴰⵙⴽⴰⵍⴰ ⴳⵔ ⵡⵓⴷⴰⵢⵏ ⵏ ⵜⵎⵓⵔⵜ ⵏ ⴰⵍⵉⵎⴰⵏ, ⵍⵇⵇⴼⵏ ⵜⵏⵜ ⵉⵍⵎⵎⴰ ⴰⵢⵜⵎⴰⵜⵏ ⵏⵏⵙⵏ ⴳ ⵜⵎⵓⵔⴰ ⵢⴰⴹⵏⵉⵏ ⵏ ⵓⵕⵓⴱⴱⴰ, ⴹⴼⵕⵏ ⵜⵏ ⵓⵍⴰ ⵓⴷⴰⵢⵏ ⵏ ⵜⵎⴰⵣⵖⴰ ⴷ ⵡⵉⵏ ⵜⵎⵉⵣⴰⵔ ⵏ ⵉⵎⵓⵙⵍⵎⵏ.
ⵎⵉⵏ (ⴱⵍⴰ) ⴰⴷ ⵏⴽⵛⵎ ⴳ ⵓⵢⵍⵍⵉ ⴷ ⵢⵓⵙⴰⵏ ⴳ ⵜⵡⵏⴳⵉⵎⵉⵏ ⵙ ⵓⴼⵔⵓⵔⵉ, ⵢⵓⴷⴰ ⴰⵖ ⵓⵢⵏⵏⵉ ⵉⵣⴷⵉⵏ ⴷ ⵜⵓⵜⵍⴰⵢⵜ: ⵉⵇⵇⴰⵏ ⴰⵖ ⴷ ⴳ ⵓⵎⵣⵡⴰⵔⵓ ⴰⴷ ⵏⵉⵏⵉ ⵎⴰⵙ ⵜⵜ ⵏⵏ ⴽⴽⴰⵏ ⵡⵓⴷⴰⵢⵏ ⵉⵔⴰⴷⵉⴽⴰⵍⵉⵢⵏ ⵍⵍⴰⵏ ⵎⴳⴰⵍ ⵏ ⵓⵙⵙⵎⵔⵙ (ⵍⵉⵙⵜⵉⵄⵎⴰⵍ) ⵏ ⵜⵄⵉⴱⵔⵉⵜ ⴳ ⵜⵉⵔⵔⴰ ⵏⵏⴰ ⵓⵔ ⵉⴳⵉⵏ ⵜⴰⵙⴳⴷⴰⵏⵜ, ⵎⴰⵛⴰ ⵎⵇⵇⴰⵔ ⵓⵢⴰ, ⵙⵙⵏⵜⴰⵏ ⵉⵎⴰⵔⴰⵜⵏ ⵏ ⵓⵎⵓⵙⵙⵓ ⵏ ⵀⴰⵙⴽⴰⵍⴰ ⴰⵔ ⵜⵜⴰⵔⴰⵏ ⵙ ⵜⵄⵉⴱⵔⵉⵜ ⴽⵔⴰ ⵏ ⵜⵏⴼⴰⵙ ⵜⵉⵇⴱⵓⵔⵉⵏ ⵙⴳ ⵓⵣⵎⵣ ⵏ ⵜⵜⴰⵡⵔⴰⵜ, ⵓⴽⴰⵏ ⵓⵔ ⵓⴼⵉⵏ ⵓⵍⴰ ⴽⵔⴰ ⵏ ⵓⵎⵓⴽⵔⵉⵙ; ⵎⴰⵛⴰ, ⵖⴰⵙ ⵙⵙⵏⵜⴰⵏ ⵜⵉⵔⵔⴰ ⴼ ⵉⵙⵏⵜⵍⵏ (ⵍⵎⴰⵡⴰⴹⵉⵄ) ⵉⵎⵉⵔⴰⵏⵏ (ⵏ ⵜⵉⵣⵉ ⴰⵏⵏ ⴳ ⴷⴷⵔⵏ), ⵢⵉⵛⵇⵇⵓ ⵏⵉⵜ ⴼⵍⵍⴰⵙⵏ ⴰⴷ ⵙⵎⴷⵏ, ⴰⵛⴽⵓ ⵜⵜⴰⵡⵔⴰⵜ ⵓⵔ ⴳⵉⵙ ⵓⵜⵉⵏⵜ ⵜⴳⵓⵔⵉⵡⵉⵏ 8000 ⵏ ⵢⴰⵜ (2000 ⵙⵉⴳⵙⵏⵜ ⵜⵜⵓⵏⵏⴰⵏⵜ 1 ⵜⵉⴽⴽⵍⵜ ⴳ ⵜⵜⴰⵡⵔⴰⵜ, ⴷ ⵉⵥⵓⵕⴰⵏ ⵏ ⵜⴳⵓⵔⵉⵡⵉⵏ ⵓⵔ ⵓⵜⵉⵏ 500 ⵏ ⵢⴰⵏ), ⴷ ⵓⵔ ⵜⵜ ⵏⵏ ⴽⴽⵉⵏ ⵉⵎⴰⵡⴰⵍⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵓⵖⵍ ⵏ ⵉⴷⵍⵉⵙⵏ ⵏ ⵜⵎⴰⵙⵙⴰⵏⵜ ⴷ ⵜⵓⵙⵏⴰⴽⵜ. ⵓⴼⴰⵏ ⵉⵎⴰⵔⴰⵜⵏ ⵢⴰⵏ ⵓⵎⵓⴽⵔⵉⵙ ⵢⴰⴹⵏ: ⴽⴽⴰⵏ ⵜⵜ ⵏⵏ ⴰⵔ ⴰⵙⵏ ⵇⵇⴰⵔⵏ ⵖⴰⵙ ⴽⵔⴰ ⵏ ⵎⴷⴷⵏ ⴷⵔⵓⵙⵏⵉⵏ, ⴳⵏ ⴰⴽⴽⵯ ⵉⵔⴳⴰⵣⵏ (ⵉⵡⵜⵎⴰⵏ) ⵎⵉ ⵉⴽⵜⵓⵔ ⵢⵉⵖⴼ; ⵉⵎⴰ ⵜⵉⵎⵖⴰⵔⵉⵏ (ⵜⵉⵡⵜⵎⵉⵏ) ⴷ ⵉⵔⴳⴰⵣⵏ ⵏⵏⴰ ⵓⵔ ⴱⴰⵀⵔⴰ ⵖⵔⵉⵏⵉⵏ, ⴽⴽⴰⵏ ⵜⵜ ⵏⵏ ⴰⵔ ⵇⵇⴰⵔⵏ ⵜⴰⵙⴽⵍⴰ ⵜⴰⵢⴷⴷⵉⵛⵜ, ⴰⵢⵍⵍⵉ ⵢⵓⵊⵊⴰⵏ ⵜⵓⴳⵜⵜ ⵏ ⵉⵎⴰⵔⴰⵜⵏ ⴰⴷ ⴰⵔⴰⵏ ⵙ ⵜⵢⴷⴷⵉⵛⵜ ⴰⴼⴰⴷ ⴰⴷ ⵖⵓⵔⵙⵏ ⵢⵉⵍⵉ ⵓⴳⴷⵓⴷ ⵉⴳⴳⵓⵜⵏ. (ⵣⵓⵏ ⴷ ⵏⵉⵜ ⴽⵔⴰ ⵏ ⵉⵎⴰⵣⵉⵖⵏ ⵖⵉⵍⴰⴷ).
ⵙⴽⵔⵏ ⵉⵎⴰⵙⵙⴰⵏⵏ ⵏ ⵀⴰⵙⴽⴰⵍⴰ ⵜⴰⵡⵓⵔⵉ ⵏⵏⵙⵏ, ⵙⵙⵓⴷⵔⵏ ⴷ ⵜⴰⵙⴽⵍⴰ ⵜⴰⵄⵉⴱⵔⵉⵜ, ⵍⴷⵉⵏ ⴷ ⵙⵉⵙ ⵜⵓⵜⵍⴰⵢⵜ ⵙⴳ ⵓⵥⴽⴽⴰ ⵏⵏⵙ, ⵎⵇⵇⴰⵔ ⵓⴽⴰⵏ ⵙⵓⵍ ⵜⵎⵎⵓⵜ; ⴰⵢⵍⵍⵉⴳ ⴷ ⵉⴷⴷⴰ ⵓⵎⵙⵙⵓⴷⵔ ⵍⵍⵉ ⵜⵜ ⵉⴷ ⵉⵙⵙⵏⴽⵔⵏ ⵙⴳ ⵜⵎⵜⵜⴰⵏⵜ: ⵉⵍⵉⵄⵉⵥⴰⵕ ⴱⵏ ⵢⴰⵀⵓⴷⴰ.
ⵉⵍⵓⵍ ⴷ ⵉⵍⵉⵄⵉⵥⴰⵕ ⴱⵏ ⵢⴰⵀⵓⴷⴰ ⵙ ⵢⵉⵙⵎ ⵏ ⵉⵍⵉⵄⵉⵥⴰⵕ ⵉⵙⵃⴰⵇ ⴱⵉⵔⵍⵎⴰⵏ ⵉⵍⵢⴰⵏⵓⴼ ⴳ ⵜⴳⵍⴷⵉⵜ ⵏ ⵔⵓⵙⵢⴰ (ⴱⵉⵍⴰⵔⵓⵙⵢⴰ ⴷⵖⵉ), ⴰⵙⴳⴳⵯⴰⵙ ⵏ 1858, ⴳ ⵓⴳⵏⵙⵓ ⵏ ⵢⴰⵜ ⵜⵡⴰⵛⵓⵏⵜ (ⵜⴰⵡⵊⴰ) ⵜⵓⴷⴰⵢⵜ ⵜⴰⵃⴰⵙⵉⴷⵉⵜ (ⵜⴰⵔⴰⴷⵉⴽⴰⵍⵉⵜ) ⵉⵙⴰⵡⴰⵍⵏ ⵙ ⵜⵢⴷⴷⵉⵛⵜ; ⵉⴳⵓⴳⵍ (ⵙⴳ ⴱⴰⴱⴰⵙ) ⵍⵍⵉⵖ ⵉⵟⵟⴼ 5 ⵉⵙⴳⴳⵯⴰⵙⵏ, ⵜⴰⵊⵊ ⵜ ⵉⵏⵏⴰⵙ ⴰⴽⴷ ⵅⴰⵍⵉⵙ; ⵉⵣⵣⵔⵉ ⵜⴰⵎⵥⵉⵜ ⵏⵏⵙ ⵣⵓⵏ ⴷ ⴰⴽⴽⵯ ⵉⵏⴳⴳⵯⴰ ⵏⵏⵙ ⵓⴷⴰⵢⵏ ⴳ ⵜⵖⵔⵉ ⴷ ⵓⵍⵎⴰⴷ ⵏ ⵉⴷⵍⵉⵙⵏ ⵏ ⵓⵙⴳⴷ ⵓⴷⴰⵢ (ⵜⵜⴰⵡⵔⴰⵜ, ⵎⵉⵛⵏⴰ ⴷ ⵓⵜⵍⵎⵓⴷ), ⵉⵍⵎⵎⴰ ⵉⵍⵎⴷ ⵜⴰⴼⵕⴰⵏⵚⵉⵚⵜ, ⵜⴰⵍⵉⵎⴰⵏⵜ ⴷ ⵜⵔⵓⵙⵉⵢⵜ, ⴰⵢⵍⵍⵉ ⵜ ⵢⵓⵊⵊⴰⵏ ⴰⴷ ⵉⴽⵛⵎ ⴷ ⵓⵎⵓⵙⵙⵓ ⴰⵚⵀⵢⵓⵏⵉ, ⵢⴰⴼ ⵏⵏ ⴷⵉⴳⵙ ⵎⴰⵙ ⴷ ⴰⵙⵙⵓⴷⵔ ⵏ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ ⴳ ⵡⴰⴽⴰⵍ ⵏ ⵉⵙⵔⴰⵢⵉⵍ ⴰ ⵔⴰⴷ ⵉⵙⵎⵓⵏ ⵇⴰⵃ ⵓⴷⴰⵢⵏ ⵏ ⵓⵎⴰⴹⴰⵍ.
ⵉⵣⵣⵔⵉ ⴱⵏ ⵢⴰⵀⵓⴷⴰ 4 ⵉⵙⴳⴳⵯⴰⵙⵏ ⴳ ⴱⴰⵔⵉⵣ (ⴼⵕⴰⵏⵚⴰ), ⵉⵖⵔ ⵜⴰⵙⵏⵉⵊⵊⵉⵜ (ⵜⴰⵙⵏⴹⴱⵉⴱⵜ) ⴳ ⵜⵙⴷⴰⵡⵉⵜ ⵏ ⵚⵓⵔⴱⵓⵏ, ⵉⵖⵔ ⵓⵍⴰ ⴰⵎⵣⵔⵓⵢ ⴷ ⵜⵙⵔⵜⵉⵜ ⵏ ⵓⴳⵎⵎⵓⴹ ⴰⵏⴰⵎⵎⴰⵙ (ⵍⵇⴱⵍⵜ ⵏ ⵜⵓⵥⵥⵓⵏⵜ); ⵢⴰⵏ ⵡⴰⵙⵙ, ⵉⵎⵎⵉⴳⴳⵉⵔ ⴷ ⵢⴰⵏ ⵡⵓⴷⴰⵢ ⴳⴳⵯ ⵢⵉⵔⵓⵛⴰⵍⴰⵢⵉⵎ (ⵍⵇⵓⴷⵙ), ⵉⵙⴰⵡⵍ ⴷⵉⴷⵙ ⵙ ⵜⵄⵉⴱⵔⵉⵜ; ⴰⵙⵙⵎⵔⵙ ⴰⴷ ⵏ ⵜⵄⵉⴱⵔⵉⵜ ⴳ ⵡⴰⵡⴰⵍ, ⴰⴷ ⵜ ⵉⵙⵙⵏⵥⴰⵏ (ⵉⵇⵏⵄⵏ) ⵎⴰⵙ ⵜⵣⵎⵔ ⵜⵓⵜⵍⴰⵢⵜ ⴰⴷ ⴰⴷ ⴷ ⵜⴷⵡⵍ ⵙ ⵜⵓⴷⵔⵜ, ⵜⴳ ⵜⵓⵜⵍⴰⵢⵜ ⵏ ⵓⵖⵔⴼ (ⵛⵛⵄⴱ) ⴰⵢⵙⵔⴰⵢⵉⵍⵉ.
ⴳ ⵓⵙⴳⴳⵯⴰⵙ ⵏ 1881, ⵔⴰⴷ ⵉⵣⵓⴳ ⴱⵏ ⵢⴰⵀⵓⴷⴰ ⵏⵜⵜⴰ ⴷ ⵜⵎⵟⵟⵓⴹⵜ ⵏⵏⵙ ⵜⴰⵎⵣⵡⴰⵔⵓⵜ (ⵉⴳⴰⵏ ⵜⴰⵙⵍⵎⴰⴷⵜ ⵏ ⵜⵔⵓⵙⵉⵢⵜ) ⵙ ⵢⵉⵔⵓⵛⴰⵍⴰⵢⵉⵎ ⴳ ⴼⴰⵍⵉⵚⵟⵉⵏ ⵜⴰⵄⵓⵜⵎⴰⵏⵉⵜ; ⵔⴰⴷ ⴷⵉⵏⵏ ⵉⴼⵙⵔ ⵢⴰⵏ ⵓⵍⵖⵓ (ⵍⵉⵄⵍⴰⵏ) ⵏⵏⴰ ⴳ ⴷⴰ ⵉⵜⵜⵉⵏⵉ ⵎⴰⵙ ⴷ ⵉⵇⵇⴰⵏ ⵜⴰⵄⵉⴱⵔⵉⵜ ⴰⴷ ⵜⴳ ⵜⵓⵜⵍⴰⵢⵜ ⵏ ⵜⵉⵏⵎⴰⵍ ⵏ ⵜⵎⴰⵣⵉⵔⵜ; ⵉⵎⵉⴽⴽ, ⵔⴰⴷ ⵉⵍⵎⵎⴰ ⵉⴳ ⴰⵙⵍⵎⴰⴷ ⵏ ⵜⵄⵉⴱⵔⵉⵜ ⴳ ⵜⵉⵏⵎⵍ ⵏ ⵓⵎⵓⵍⵍⵉ ⴰⵢⵙⵔⴰⵢⵍⵉ ⴰⵖⵣⵓⵔⴰⵏ ⴳ ⵢⵉⵔⵓⵛⴰⵍⴰⵢⵉⵎ (ⴰⵔ ⵉⵙⵙⵍⵎⴰⴷ ⵜⴰⵄⵉⴱⵔⵉⵜ ⵙ ⵜⵄⵉⴱⵔⵉⵜ, ⵏⵉⵛⴰⵏ, ⵎⵉⵏ/ⴱⵍⴰ ⴰⵙⵓⵖⵍ), ⵉⵎⵉⴽⴽ ⴷⴰⵖ ⵔⴰⴷ ⵉⵙⵏⴼⵍⵓⵍ ⴽⵔⴰ ⵏ ⵜⵎⵙⵎⵓⵏⵉⵏ (ⵣⵓⵏ ⴷ “ⵜⵉⵅⵢⴰⵜ ⵉⵙⵔⴰⵢⵉⵍ”, “ⵛⴰⴼⴰ ⴱⵉⵔⵓⵔⴰ” ⴷ “ⴱⴰ ⴰⴷ ⵀⴰⵍⴰⵛⵓⵏ”), ⴷ ⴰⴷ ⵓⵔ ⵏⵜⵜⵓ ⵜⴰⴽⴰⴷⵉⵎⵉⵜ ⵏ ⵜⵓⵜⵍⴰⵢⵜ ⵜⴰⵄⵉⴱⵔⵉⵜ ⵏⵏⵉ ⵉⵙⴽⵔ (ⵜⵙⵓⵍ ⵜⵍⵍⴰ ⴰⵔ ⵡⴰⵙⵙⴰ) ⴰⴼⴰⴷ ⴰⴷ ⵉⵙⵙⴽⵜⵔ (ⵏⵜⵜⴰ ⴷ ⵉⵎⴰⵙⵙⴰⵏⵏ ⵢⴰⴹⵏⵉⵏ) ⵜⴰⵄⵉⴱⵔⵉⵜ ⵙ ⵉⵔⵎⴰⵡⵏ (ⵍⵎⵓⵚⵟⴰⵍⴰⵃⴰⵜ) ⵏⵏⴰ ⵓⵔ ⴳⵉⵙ ⵍⵍⵉⵏⵉⵏ.
ⴳ ⵜⴰⴷⴷⴰⵔⵜ ⵏⵏⵙ, ⵉⵛⵕⴹ ⵉⵍⵉⵄⵉⵥⴰⵕ ⴼ ⵜⵎⵖⴰⵔⵜ ⵏⵏⵙ ⴰⴷ ⵙⴰⵔ ⵙⵓⵍ ⵓⵔ ⵙⴰⵡⵍⵏ ⴽⵔⴰ ⵏ ⵜⵓⵜⵍⴰⵢⵜ ⴰⵎⵔ ⵜⴰⵄⵉⴱⵔⵉⵜ, ⵎⵇⵇⴰⵔ ⵉⵎⵙⴰⵔ ⴰⵢⵏⵏⴰ ⵉⵎⵙⴰⵔⵏ; ⵢⴰⵏ ⵡⴰⵙⵙ ⵢⵓⴼⴰ ⵜⴰⵎⵟⵟⵓⴹⵜ ⵏⵏⵙ ⴰⵔ ⵜⴻⵜⵜⵖⵏⵏⴰⵊ ⵉ ⵎⴻⵎⵎⵉⵙ ⵢⴰⵜ ⵜⵣⵍⵉⵜ ⵜⴰⵔⵓⵙⵉⵢⵜ, ⵉⴱⵕⵕⵎ ⵏⵉⵜ ⴳⵉⵙ, ⵢⵉⵏⵉ ⴰⵙ ⴰⴷ ⵙⴰⵔ ⵙⵓⵍ ⵓⵔ ⵜⴰⵍⵙ ⵉ ⵜⵉⴳⴰⵡⵜ ⴰⵏⵏ. ⵍⵍⵉⴳ ⴰⵙ ⵜⵎⵎⵓⵜ ⵜⵎⵟⵟⵓⴹⵜ ⴰⴷ (ⴷⵉⴱⵓⵕⴰ) ⵙ ⵡⴰⵟⵟⴰⵏ ⵏ ⵜⵓⵔⵉⵏ, ⵜⵓⵊⵊⴰ ⴰⵙ 5 ⵉⴳⵓⴳⵉⵍⵏ, ⵎⵎⵜⵏ ⵙⵉⴳⵙⵏ 3 ⵙ ⵡⴰⵟⵟⴰⵏ ⵏ ⴷⵉⴼⵜⵉⵔⵢⴰ, ⵉⴽⴽ 6 ⵡⴰⵢⵢⵓⵔⵏ ⵢⴰⵡⵍ ⵅⴰⵍⵜⵉⵙ ⵏ ⵡⴰⵔⵔⴰⵡⵏ ⵏⵏⵙ: ⵅⵉⵎⴷⴰ.
ⴳ ⵓⵙⴳⵎⵉ ⵏ ⵎⴻⵎⵎⵉⵙ (ⵏⵏⴰ ⵎⵉ ⵉⵙⵎⵎⴰ ⴱⵏ ⵚⵀⵢⵓⵏ), ⵉⴽⴽⴰ ⵜⵜ ⵏⵏ ⵓⵔ ⴰⵔ ⵜ ⵉⵜⵜⴰⵊⵊⴰ ⴰⴷ ⵢⵓⵔⴰⵔ ⴳ ⵜⵙⵓⴽⵜ, ⵏⵖ ⴷ ⴰⴷ ⵉⵎⵓⵏ ⴷ ⵜⴰⵔⵡⴰ ⵢⴰⴹⵏⵉⵏ, ⴰⵛⴽⵓ ⵓⵔ ⴰⵔ ⵙⴰⵡⴰⵍⵏ ⵜⴰⵄⵉⴱⵔⵉⵜ, ⴰⵢⴰⴷ ⴰⴷ ⵢⵓⵊⵊⴰⵏ ⴱⵏ ⵚⵀⵢⵓⵏ ⴰⴷ ⵉⴷⴷⵓⴽⴽⵍ ⴷ ⵓⵢⴷⵉ ⵏⵏⵙ (ⵏⵏⴰ ⵎⵉ ⵉⵙⵎⵎⴰ ⵎⴰⵀⵉⵔ); ⴰⵙⴳⵎⵉ ⴰⴷ ⴰⴷ ⵉⵙⴽⵔⵏ ⵙⴳ ⵓⵔⴱⴰ ⴰⴷ “ⴰⴼⴳⴰⵏ ⴰⵎⵣⵡⴰⵔⵓ” ⵏⵏⴰ ⵎⵉ ⵜⴳⴰ ⵜⵄⵉⴱⵔⵉⵜ ⵜⴰⵜⵔⴰⵔⵜ (ⵜⴰⵄⴰⵚⵕⵉⵜ) ⵜⵓⵜⵍⴰⵢⵜ ⵜⴰⵢⵎⵎⴰⵜ. ⵖⵔ ⴰⴳⵣⵣⵓⵎ ⵡⵉⵙⵙ ⵙⵉⵏ!
ⵢⵓⵔⴰ ⵜ ⵢⴰⵙⵉⵏ ⴰⵢⵜ ⵍⵎⵓⴷⴷⵏ, 2017
