ⴰⵟⵟⴰⵏ ⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019
ⴰⵟⵟⴰⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019
ⵉⵜⵜⵢⴰⵔⴰ ⵓⵎⴳⵔⴰⴷ ⴰⴷ ⴳ 2020, ⵉⵜⵜⵓⵙⵎⴰⵢⵏⵓ ⴳ 2023.
ⵉⴳⴰ ⵡⴰⵟⵟⴰⵏ ⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019 (ⵙ ⵜⵏⴳⵍⵉⵣⵜ: Coronavirus Disease 2019; ⴰⵙⴳⵣⵍ ⵏⵏⵙ: COVID-19/ⴽⵓⴼⵉⴷ-19) ⵢⴰⵏ ⵡⴰⵟⵟⴰⵏ ⵏⵖ ⴷ ⵢⴰⵜ ⵜⵎⴰⴹⵓⵏⵜ ⵉⵜⵜⵖⵎⵎⴰⵎⵏ, ⴰⵔ ⴳⵉⵙ ⵉⵙⵔⴰⴳ (SARS-COV-2/ⵙⴰⵔⵙ-ⴽⵓⴼ-2). ⴰⵟⵟⴰⵏ ⴰⴷ ⵓⵔ ⵢⴰⴷⵍⵍⵉ ⵉⵜⵜⵓⵙⵙⴰⵏ ⴷⴰⵔ ⵓⴼⴳⴰⵏ ⴷⴰⵜ ⴰⴷ ⴷ ⵢⵓⵎⴰⵏ ⵓⵙⵓⴹⵕⴻⵕ ⵏⵏⵙ ⴳ ⵜⵙⴳⴰ ⵏ ⵡⵓⵀⴰⵏ ⴳ ⵜⵎⵓⵔⵜ ⵏ ⵛⵉⵏⵡⴰ ⴷⴳ ⵡⴰⵢⵢⵓⵔ ⵏ ⴷⵓⵊⴰⵏⴱⵉⵔ 2019, ⵉⵙⵔⴳ ⵉⵍⵎⵎⴰ ⴳ ⵢⵉⵔⵉⴹⵉ ⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019—20.
ⵙⴳ ⵜⵎⵉⵜⴰⵔ ⵏⵏⴰ ⵙ ⴱⴰⵀⵔⴰ ⵉⵜⵜⵓⵙⵙⴰⵏ ⵡⴰⵟⵟⴰⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019 (ⴽⵓⴼⵉⴷ/COVID-19) ⴷⴰ ⵏⵜⵜⴰⴼⴰ: ⵜⴰⵡⵍⴰ, ⵜⵓⵙⵓⵜ, ⵜⵉⵎⵎⵔⵉ ⵏ ⵓⵙⵓⵏⴼⵙ. ⵉⵍⵉⵏ ⴽⵔⴰ ⵏ ⵉⵎⵓⴹⴰⵏ ⴰⵔ ⴷⴰⵔⵙⵏ ⵜⵜⵓⵎⴰⵏⴻⵏⵜ ⴽⵔⴰ ⵏ ⵜⵎⵉⵜⴰⵔ ⵢⴰⴹⵏⵉⵏ ⵣⵓⵏ ⴷ ⵉⴳⵥⴰⵥⵏ ⵏ ⵜⵣⵍⵎⵉⵏ, ⴰⵕⵎⴰⵢ, ⵉⴹⵏ ⵏ ⵢⵉⵖⴼ, ⴰⴱⵣⴰⴳ ⵏ ⵜⴰⵇⵇⴰⵢⵜ, ⴷ ⵓⵎⵖⵍⵉⵍ. ⵜⵉⵎⵉⵜⴰⵔ ⴰⴷ ⴰⴽⴽⵯ ⴰⵔ ⴷ ⵜⵜⵓⵎⴰⵏⴻⵏⵜ ⵉⵎⵉⴽⴽ ⵙ ⵉⵎⵉⴽⴽ.
ⴽⵔⴰ ⵙⴳ ⵎⵉⴷⴷⵏ ⴰⵔ ⵜⵏ ⵉⵜⵜⴰⵖ ⵡⴰⵟⵟⴰⵏ ⵎⵉⵏ ⴰⴷ ⵙⵉⵙ ⵙⵢⴰⴼⴰⵏ ⵓⵍⴰ ⵓⵎⴰⵏⴻⵏⵜ ⴼⵍⵍⴰⵙⵏ ⵜⵎⵉⵜⴰⵔ ⵏⵏⵙ, ⵎⵉⴷⴷⵏ ⴰⴷ ⴰⴽⴽⵯ ⴰⵎⴰⵜⴰ ⴷⵉⴳⵙⵏ (ⴰⵜⵜⴰⵢ ⵏ 80%) ⴰⵔ ⵜⵜⵊⵊⵉⵏ ⵎⵉⵏ ⴰⴷ ⴹⴼⵕⵏ ⴽⵔⴰ ⵓⵙⴰⴼⴰⵔ ⵉⵥⵍⵉⵏ. ⵢⴰⵏ ⵙⴳ ⵙⴹⵉⵙ (1/6) ⵎⴷⴷⵏ ⴰⵔ ⴷⴰⵔⵙⵏ ⵜⵜⵓⵎⴰⵏⴻⵏⵜ ⴽⵔⴰ ⵏ ⵜⵎⵉⵜⴰⵔ ⴱⴰⵀⵔⴰ ⵀⵔⵛⵏⵉⵏ ⵣⵓⵏ ⴷ ⵜⵉⵎⵔⵉ ⵏ ⵡⴰⵙⵓⵏⴼⵙ.
ⵎⵉⴷⴷⵏ ⵓⵙⵙⵔⵏⵉⵏ ⴷ ⵡⵍⵍⵉ ⴷⴰⵔ ⵍⵍⴰⵏⵜ ⵜⵎⵓⴽⵔⵉⵙⵉⵏ ⵜⵉⴷⵓⵙⴰⵏⵉⵏ (ⵜⵉⵎⵓⴽⵔⵉⵙⵉⵏ ⵏ ⵡⵓⵍ, ⵜⵉⵔⵉⴼⵉⵜ, ...) ⵍⵍⴰⵏ ⴳ ⵢⵉⵎⵉⵣⵉ ⵏ ⵡⴰⴷ ⵜⵏ ⵢⴰⵖ ⵡⴰⵟⵟⴰⵏ ⵏ ⵓⴼⵉⵔⵓⵙ ⵏ ⴽⵓⵔⵓⵏ ⵓⴳⴳⴰⵔ ⵏ ⵡⵉⵢⵢⴰⴹ.
ⴰⵎⵓⵜⵜⵢ ⵏ ⵓⵎⵙⵉⵖⵉ ⵏ ⴽⵓⴼⵉⴷ-19
ⵥⴹⴰⵕⵏ ⵎⵉⴷⴷⵏ ⵍⵍⵉ ⵢⵓⴹⵏⵏ ⵙ ⵡⴰⵟⵟⴰⵏ ⵏ ⵓⴼⵉⵔⵓⵙ ⵏ ⴽⵓⵔⵓⵏⴰ 2019 ⴰⴷ ⵜ ⵙⵖⵎⵎⵏ ⵉ ⵡⵉⵢⵢⴰⴹ, ⴰⵛⴽⵓ ⴰⵟⵟⴰⵏ ⴰⴷ ⴰⵔ ⵉⵜⵜⵎⵓⵜⵜⵓⵢ ⵙⴳ ⵢⴰⵏ ⵓⵎⴷⴰⵏ ⵢⵓⴹⵏⵏ ⵖⵔ ⵢⴰⵏ ⵢⴰⴹⵏ ⵓⵔ ⵢⵓⴹⵉⵏⵏ, ⵙ ⵜⵎⵇⵇⴰ ⵎⵥⵥⵉⵢⵏⵉⵏ ⵍⵍⵉ ⴷ ⵉⵜⵜⴼⴼⵓⵖⵏ ⴳ ⵜⵏⵅⴰⵔ ⴷ ⵢⵉⵎⵉ ⵏ ⵡⴰⵏⵏⴰ ⵉⵜⵜⵓⵙⵓⵏ. ⵜⵉⵎⵇⵇⴰ ⴰⴷ ⴰⵔ ⵟⵟⴰⵕⵏⵜ ⵖⴼ ⵉⴷⵖⴰⵔⵏ ⴷ ⵉⵙⴽⴽⵉⵏⵏ ⴷ ⵡⴰⵏⵏⴰ ⵢⴰⵥⵏ ⵉ ⵓⵎⴰⴹⵓⵏ ⵉⵜⵜⵓⵙⵓⵏ, ⵓⴽⴰⵏ ⵡⴰⵏⵏⴰ ⵎⵓ ⴽⵛⵎⵏⵜ ⵜⵎⵇⵇⴰ ⴰⴷ ⵜⵉⵟⵟⴰⵡⵉⵏ ⵏⵖ ⵜⵉⵏⵅⴰⵔ ⵏⵖ ⵉⵎⵉ ⵏⵏⵙ ⵙ ⵜⵖⴰⵔⴰⵙⵜ ⵜⵓⵙⵔⵓⴷⵜ, ⵏⵖ ⴷ ⵙ ⵜⵖⴰⵔⴰⵙⵜ ⵜⴰⵔⵓⵙⵔⵉⴷⵜ ⵉⴳ ⵉⵍⵍⴰ ⵎⴰⵢⴷ ⵉⴳⴳⵔⵏ ⵉ ⵉⴷⵖⴰⵔⵏ ⴷ ⵉⵙⴽⴽⵉⵏⵏ ⵏⵏⴰ ⵖⴼ ⴹⵕⵏⵜ ⵜⵎⵇⵇⴰ ⵏⵏⴰ ⵙ ⵓⴼⵓⵙ, ⵉⴳⴳⵔ ⵏⵏ ⵙⵉⵙ ⵉ ⵜⵉⵟⵟⴰⵡⵉⵏ ⵏⵖ ⵜⵉⵏⵅⴰⵔ ⵏⵖ ⵉⵎⵉ ⵏⵏⵙ, ⵔⴰⴷ ⵜ ⵉⵖⵎⵎ ⵓⴼⵉⵔⵓⵙ ⵏⵏⴰ ⵉⵜⵜⵙⵔⴰⴳⵏ ⴳ ⵡⴰⵟⵟⴰⵏ.
ⴰⵔⴰⵢ ⵙⴳ ⴽⵓⴼⵉⴷ-19
ⵏⵏⴰⵏ ⵉⵎⵣⵡⵓⵔⴰ: «ⴰⵔⴰⵢ ⵢⵓⴼ ⴰⵙⵉⵊⵊⵉ». ⴳ ⵓⵣⵎⵣ ⵏ ⵉⵕⵉⴹⵉ, ⴷⴰⵜ ⴰⴷ ⵜⵜⵢⴰⴼⴰⵏ ⵉⴳⵣⵣⴰⵢⵏ ⵎⴳⴰⵍ ⴰⴼⵉⵔⵓⵙ ⵏ ⴽⵓⵔⵓⵏⴰ, ⵙⵎⴰⴳⵍⵏ ⵉⵎⵙⵏⵉⵊⵊⵉⵜⵏ ⴷ ⵜⵎⴰⴷⴷⴰⵙⵉⵏ ⴷ ⵜⵎⵔⵙⴰⵍ ⵏ ⵜⴷⵓⵙⵉ ⴳ ⵓⵎⴰⴹⴰⵍ ⵙ ⵡⴰⵔⴰⵢ, ⴼⴽⵏ ⵜⵓⴳⵜ ⵏ ⵜⵖⴰⵔⴰⵙⵉⵏ:
- ⴽⵛⵉⵎⴰⵜ ⵜⵉⴳⵎⵎⴰ ⵏⵏⵓⵏ ⴰⵢⵏⵏⴰ ⵙ ⵜⵓⴼⴰⵎ!
- ⵉⴳ ⵜⴼⴼⵖⵎ, ⵍⵙⴰⵜ ⵜⴰⵏⵅⵅⴰⵎⵎⵓⵜ ⵏⵏⵓⵏ!
- ⴰⴷ ⵓⵔ ⵜⴻⵜⵜⵉⵍⵉⵎ ⴷ ⵓⴳⴷⵓⴷ!
- ⴰⴷ ⵓⵔ ⵜⵙⵙⵣⵓⵍⵎ ⵙ ⵓⴼⵓⵙ ⵓⵍⴰ ⵓⴷⵎ!
- ⴰⴷ ⵓⵔ ⵜⴻⵜⵜⴳⵉⵡⵉⵔⵎ ⴷ ⵉⵎⵓⴹⴰⵏ!
- ⴼⴼⴰⵍⴰⵜ ⵢⴰⵏ ⵎⵉⵜⵔ ⴳⵔⴰⵜⵓⵏ!
- ⵃⴱⴱⵓⵢⴰⵜ ⵉⵎⵉ ⵉⴳ ⴷⴰ ⵜⴻⵜⵜⵓⵙⵓⵎ!
- ⴰⴷ ⵓⵔ ⵜⵙⵍⴰⵢⵎ ⵓⴷⵎ ⵙ ⵓⴼⵓⵙ!
- ⵙⵙⵉⵔⵉⴷⴰⵜ ⵉⴼⴰⵙⵙⵏ ⵏⵏⵓⵏ ⵙ ⵓⵙⵔⵔⴰⴷ ⵎⵏⵏⴰⵡⵜ ⵜⵡⴰⵍ ⴳ ⵡⴰⵙⵙ!
ⴳ ⵜⴳⵉⵔⴰ, ⵜⵜⵢⴰⴼⴰⵏ ⵙⵓⵍ ⵉⴳⵣⵣⴰⵢⵏ ⵎⴳⴰⵍ ⴰⴼⵉⵔⵓⵙ ⵏ ⴽⵓⵔⵓⵏⴰ, ⵎⴰⵛⴰ ⵉⵖⴰⵎⴰ ⵡⴰⵔⴰⵢ ⵉⴳⴰ ⴰⵙⴰⴼⴰⵔ ⴰⵎⵣⵡⴰⵔⵓ, ⵙ ⵍⴰⵡⴰⵏⵏ ⴰⴽⴽⵯ ⴰⵍⵍⵉⴳ ⵓⵔ ⵍⴽⵉⵎⵏ ⵉⴳⵣⵣⴰⵢⵏ ⵜⵓⴳⵜ ⵏ ⵜⵎⵉⵣⴰⵔ ⵜⵉⵎⵥⵍⴰⴹ, ⵏⵖ ⴷ ⵉⴷⵔⵓⵙ ⵎⴰ ⴰⴷ ⵜⵏⵜ ⵉⵍⴽⵎⵏ.
