ⵜⴰⴽⵔⵔⴰⵙⵜ - ⵜⵓⵍⵍⵉⵙⵜ

ⵜⴰⵡⵍⴰⴼⵜ ⵙⴳ ⵖⵓⵔ ⵙⴰⵏⴷⵉ ⵎⵉⵍⵔ ⴳ ⴰⵏⵙⴱⵍⴰⵛ

     ⴳ ⵢⵉⴹ ⴰⵏⵏ ⵉⵙⵎⵎⵉⴹⵏ, ⵓⵔ ⵊⵊⵓⵏ ⵜⵏⵜ ⴷ ⵉⵇⵇⵉⵏ ⵢⴹⵚ ⵉ ⵣⴰⵢⵏⴰ, ⴰⵔ ⵜⵙⵙⴼⵍⵉⴷ ⵉ ⵜⵎⵣⴰⵢⵡⵉⵏ ⴷ ⵉⴳⴳⵉⴳⵏ ⴷ ⵜⵖⵓⵢⵢⵉⵜ ⵏ ⵉⵢⴹⴰⵏ ⴳ ⴱⵕⵕⴰ. ⵎⵇⵇⴰⵔ ⵜⴷⵍ ⵙ ⵎⵏⵏⴰⵡ ⵉⴼⵓⴳⴳⴰ ⵜⵙⵓⵍ ⵓⴽⴰⵏ ⴰⵔ ⵜⴻⵜⵜⵔⴳⵉⴳⵉⵢ ⴷⴷⴰⵡ ⴰⵙⵏ, ⵉⴳⴳⵉⴳ ⵏⵏⴰ ⵎⵓ ⵜⵙⵙⴼⵍⴷ ⵉⴼⵍ ⴰⵙ ⴷ ⵜⴰⵡⵍⴰⴼⵜ ⴰⵏⵏ ⴳⵔ ⵜⵉⵟⵟⴰⵡⵉⵏ ⵏⵏⵙ, ⵜⴰⵡⵍⴰⴼⵜ ⴰⵏⵏ ⵍⵍⵉ ⵙ ⵜⴳⴳⴰⵎⵎⵉ ⴰⴷ ⵜⵜ ⵜⴻⵜⵜⵓ ⵜⴰⵎ ⵉⵙⴳⴳⵯⴰⵙⵏ ⴰⵢⴰ, ⵣⴰⵢⵏⴰ ⵜⴽⵯⵜⵢ ⵓⴽⴰⵏ ⵙⵓⵍ ⴰⵙⵙ ⴰⵏⵏ, ⴰⵙⵙ ⴰⵏⵏ ⵍⵍⵉⴳ ⵏⵏ ⵜⴰⵖⵓⵍ ⵙⴳ ⵜⵡⵓⵔⵉ ⵓⵔ ⵜⴰ ⵜⵍⴽⵉⵎ ⵜⵉⵣⵉ ⵜⴰⵏⵎⵢⴰⵔⵜ. ⵜⵡⴰⵜⵙ ⵜⴰⴷⴷⴰⵔⵜ ⵏⵏⵙ, ⵜⵕⵥⵎ ⵜⴰⴳⴳⵓⵔⵜ, ⵜⵙⵙⴼⵍⴷ ⵉ ⵡⴰⵡⴰⵍ ⴳ ⵓⵃⵏⵓ ⵏ ⵜⴳⵓⵏⵢ, ⵜⴰⵥ ⵜ ⵏⵏ, ⵜⴰⴳⴳⵯ ⵏⵏ ⴳⵉⵙ, ⵜⴱⵀⴹ! ⵉⴱⴷⴷ ⵡⵓⵍ ⵏⵏⵙ ⵢⴰⵜ ⵜⵉⵣⵉ, ⵓⵔ ⵜⴼⵍⵙ ⵎ'ⴰⴷ ⵜⵥⵕⴰ, ⵜⴰⵎⵙ ⵜⵉⵟⵟⴰⵡⵉⵏ ⵏⵏⵙ, ⵜⴰⵍⵙ ⵜⴰⵎⵙ ⵜⵏⵜ.

     ⵃⴰⵙⴰⵏ ⴰⵢⴰ ⵏⵏ ⴰⵔⴳⴰⵣ ⵏⵏⵙ, ⵜⵓⴼⴰ ⵏⵏ ⴷⴰⵔⵙ ⵜⴰⵏⴰⵔⴰⴳⵜ ⵏⵏⵙⵏ ⵙⵓⵄⴰⴷ. ⵜⵎⵎⵥⵡⵉ ⵙⵓⵄⴰⴷ, ⵜⵍⵙ ⴽⵔⴰ ⴳ ⵉⵊⵡⴰⵢⵏ ⵏⵏⵙ ⵙ ⵜⵖⴰⵡⵍⴰ, ⵜⴰⵣⵣⵍ ⵜⴼⴼⵖ, ⵜⴼⵍ ⵃⴰⵙⴰⵏ ⴰⵔ ⵜⵜⵏⴼⴰⵍⵏ ⵉⴽⵯⵍⴰⵏ ⴳ ⵡⵓⴷⵎ ⵏⵏⵙ, ⵉⵙⵙⵏ ⵉⵙ ⵉⵜⵜⵢⴰⵎⴰⵥ ⵜⵉⴽⴽⵍⵜ ⴰⴷ, ⵉⵏⴳⴹ ⵉⵍⵎⵎⴰ ⴳ ⵢⴰⵏ ⵓⵎⴰⴹⴰⵍ ⵏ ⵉⵙⵡⵉⵏⴳⵉⵎⵏ ⴰⵔ ⵉⵜⵜⵍⵍⵉ ⵎⴰ ⵙ ⵔⴰⴷ ⵉⴼⵙⵢ ⵜⴰⵎⵓⴽⵔⵉⵙⵜ ⴰⴷ. ⵎⴰⵛⴰ ⵓⵔ ⵏⵏ ⴱⴰⵀⵔⴰ ⵢⴰⴳⴳⵓⴳ ⵙ ⵉⵖ ⵜ ⵉⴷ ⵜⵙⴷⵓⵢ ⵣⴰⵢⵏⴰ ⵙ ⴽⵔⴰ ⵏ ⵉⵙⵇⵙⵉⵜⵏ ⵜⵉⵏⵉ ⴰⵙ:

     - ⵎⴰ ⴰⴷ ⴰⴽ ⵙⴽⵔⵖ ⴰ ⵃⴰⵙⴰⵏ? ⵎⴰ ⴰⴷ ⵉⵍⵍⴰⵏ ⴷⴰⵔ ⵉⵍⵍⵉⵙ ⴰⴷ ⵏ ⵜⵙⵓⴽⵜ ⵏⴽⴽ ⵓⵔ ⴷⴰⵔⵉ? ⵎⴰ ⵙ ⵉⵢⵉ ⵜⵓⴼ? ⵎⴰⵅⴼ ⴰⵍⵍⵉⴳ ⵖⵉⴼⵉ ⵜⴼⴼⵖⴷ ⴰⴱⵔⵉⴷ ⴰ ⵃⴰⵙⴰⵏ?

     ⵃⴰⵙⴰⵏ ⵉⴳⵍⵍⵉⵏ ⵓⵔ ⴷⴰⵔⵙ ⵎⴰ ⴰⴷ ⵉⵜⵜⵉⵏⵉ ⴰⵎⵔ ⴰⴷ ⵉⵜⵜⵔ ⴰⵙⵓⵔⴼ ⵉ ⵣⴰⵢⵏⴰ, ⵎⴽⵍⵍⵉ ⵉⵎⵢⴰⵔ, ⴰⴷ ⵓⵔ ⵉⵎⵉⵍ ⵉⵎⵍⵍⵓ ⵡⵓⵍ ⵏⵏⵙ ⵜⵙⵙⵓⵔⴼ ⴰⵙ.

     - ⴰⵎⵓⵔ ⵏⵏⵎ ⴰ ⵣⴰⵢⵏⴰ ⵙⵙⵓⵔⴼ ⵉⵢⵉ ⵖⴰⵙ ⵜⴰⵡⴰⵍⴰ ⴰⴷ ⵔⴰⴷ ⴰⵎ ⴳⴳⴰⵍⵖ ⵜⴰⴳⴰⵍⵍⵉⵜ ⵍⵍⵉ ⵙ ⴰⵔ ⵜⵜⴳⴰⵍⵍⴰⵏ ⵉⵔⴳⴰⵣⵏ ⵓⵔ ⵙⴰⵔ ⵓⵍⵉⵙⵖ ⵉ ⵣⵓⵏ ⴷ ⵓⵢⴰ.

     - ⵜⴰⴳⴰⵍⵍⵉⵜ ⵍⵍⵉ ⵙ ⴰⵔ ⵜⵜⴳⴰⵍⵍⴰⵏ ⵉⵔⴳⴰⵣⵏ! ⵢⴰⴽ ⵜⴳⴳⵓⵍⵜ ⵢⴰⴷ ⵙⵉⵙ ⴰⵙⵙ ⵍⵍⵉ ⵏⵜⴰⵀⵍ? ⵎⴰ ⵙ ⵔⴰⴷ ⵉⵢⵉ ⵜⵕⵡⵓ ⵜⴳⴰⵍⵍⵉⵜ ⴰⴷ ⵏⵏⴽ? ⵓⵔ ⴰⴷ ⴷ ⵜⵔⴰⵔ ⵜⴰⴼⵍⵙⵜ ⵍⵍⵉ ⵜⵕⵥⵉⴷ ⴳⵔ ⵉⵢⵉ ⴷⵉⴷⴽ.

     ⵜⵙⵎⵓⵏ ⵉⵍⵎⵎⴰ ⵣⴰⵢⵏⴰ ⴰⵕⵕⵓⴹⵏ ⵏⵏⵙ ⵜⴻⵜⵜⵔ ⵓⵍⵓⴼ ⵉ ⵃⴰⵙⴰⵏ ⵜⴷⴷⵓ ⴷⴰⵔ ⵉⵎⴰⵔⴰⵡⵏ ⵏⵏⵙ.