ⴰⵙⴰⵢⵙ ⵏ ⵜⴰⵡⵙⵙⵏⴰ ⵜⴰⵎⴰⵣⵉⵖⵜ
ⵉⴳⴳⵓⵜ ⵎⴰ ⴰⵢⴷ ⵉⵙⵙⵏⵏ ⵎⴰⵙ ⵉⴳⴰ ⵎⵓⵃⵎⵎⴰⴷ ⴰⴽⵓⵏⴰⴹ ⵢⴰⵏ ⵙⴳ ⵉⵎⴰⵔⴰⵜⵏ ⵉⵎⴰⵣⵉⵖⵏ
ⵉⵎⵇⵇⵔⴰⵏⵏ, ⵉⴳ ⴰⵡⴷ ⴰⵎⴳⴳⴰⵢ ⴰⵏⴰⵎⵓⵏ ⵓⵔⵎⵉⴷ ⴳ ⵎⵏⵏⴰⵡⵜ ⵜⵎⵙⵎⵓⵏⵉⵏ. ⵎⴰⵛⵛ ⵉⴷⵔⵓⵙ ⵎⴰ ⴰⴷ
ⵉⵙⵙⵏⵏ ⵎⴰⵙ ⵉⴳⴰ ⴰⵡⴷ ⴰⵏⵖⵎⴰⵙ ⴷ ⵓⵎⵙⵙⵏⴽⴷ ⵏ ⵜⴰⵡⵙⵙⵏⴰ ⵜⴰⵎⴰⵣⵉⵖⵜ ⵏⵏⴰ ⵉⴳⴰⵏ ⵢⴰⵏ ⵓⵙⴰⵢⵙ ⵉⵎⵓⵔⵙⵏ ⴳ ⵓⵏⵣⵡⴰⵢ ⴰⵏⵎⵏⴰⴹ ⵏ ⵓⴳⴰⴷⵉⵔ ⵙⴳ ⵓⵙⴳⴳⵯⴰⵙ ⵏ 1993.ⵉⵃⵎⵍ
ⴱⴰⵀⵔⴰ ⵓⵙⵍⵎⴰⴷ ⵎⵓⵃⵎⵎⴰⴷ ⴰⴽⵓⵏⴰⴹ ⵜⴰⵖⵎⵙⴰ ⵙⴳ ⵜⵎⵥⵉⵢⵜ ⵏⵏⵙ, ⵉⴽⴽⴰ ⵜⵜ ⵏⵏ ⴰⵔ ⵉⵙⵙⴼⵍⵉⴷ
ⵉ ⵉⵙⵓⵢⴰⵙ ⴳ ⵓⵏⵣⵡⴰⵢ ⴰⵏⴰⵎⵓⵔ ⵙ ⵜⵎⴰⵣⵉⵖⵜ ⴷ ⵓⵏⵣⵡⴰⵢ ⴰⵏⵎⵏⴰⴹ ⵏ ⵓⴳⴰⴷⵉⵔ, ⴰⵔ ⵉⵙⵙⴼⵍⵉⴷ
ⵉ ⵉⵙⵓⵢⴰⵙ ⵏⵏⴰ ⵉⵣⵣⵔⴰⵢ ⵄⵎⵎⵉ ⵎⵓⵙⴰ ⴷ ⵎⵃⵎⵎⴷ ⵍⵄⵜⵎⴰⵏⵉ ⴷ ⵡⵉⵢⵢⴰⴹ. ⵍⵍⵉⵖ ⵉⴳⴰ
ⴰⵎⵣⵔⴰⵡ ⴳ ⵜⵖⵉⵡⴰⵏⵜ ⵏ ⵜⵓⵜⵍⴰⵢⵉⵏ ⴳ ⵎⵕⵕⴰⴽⵛ, ⴰⵔ ⵉⴷⵔⵔⵓ ⵏⵜⵜⴰⵏ ⴷ ⵢⴰⵏ ⵓⵎⵣⵔⴰⵡ ⴰⵛⵜⵓⴽ ⴳ
ⵉⵙⵓⵢⴰⵙ ⵏ ⵉⵏⵣⵡⴰⵢⵏ, ⴰⵔ ⴷⴳⵙⵏ ⵜⵜⵎⵙⴳⴷⴰⵍⵏ ⵖⴼ ⵜⵖⵎⵙⴰ.
ⴷⴳ ⵓⵙⴳⴳⵯⴰⵙ ⵏ 1993,
ⵉⵙⵎⵓⵏ ⵢⴰⵏ ⵉⴳⵉⵡⵔ ⴳ ⵡⴰⵡⵔⵉⵔ ⴳⵔ ⵓⵙⵍⵎⴰⴷ ⵄⴰⴱⴷⵓⵍⵍⴰⵀ ⴱⵍⵉⵍⵉⴹ ⴷ ⵄⴰⴱⴷⵓⵍⵍⴰⵀ ⴰⵙⴼⴰⵔ,
ⴰⵏⵖⵎⴰⵙ ⴷ ⵓⵎⵣⴷⴰⵢ ⵏ ⵜⵣⵓⵏⵉ ⵏ ⵜⵛⵍⵃⵉⵜ ⴳ ⵓⵏⵣⵡⴰⵢ ⴰⵏⵎⵏⴰⴹ ⵏ ⵓⴳⴰⴷⵉⵔ, ⵎⵙⴰⵡⴰⵍⵏ ⵖⴼ
ⵓⵙⴽⴽⵉⵔ ⵏ ⴽⵔⴰ ⵏ ⵓⵙⴰⵢⵙ ⴰⴷⵍⵙⴰⵏ ⵉⵏⵏⵣⴳⵎⵏ ⵙ ⵓⵎⴰⵢⵏⵓ ⵏ ⵜⴷⵍⵙⴰ ⵜⴰⵎⴰⵣⵉⵖⵜ, ⴷ ⵓⵙⵉⴳⴳⵍ ⵙ
ⴽⵔⴰ ⵏ ⵓⵙⵍⵎⴰⴷ ⵎⴰ ⴰⴷ ⵜ ⵉⵣⵣⵔⴰⵢⵏ, ⵉⵙⵓⵎⵔ ⵓⵙⵍⵎⴰⴷ ⵄⴰⴱⴷⵓⵍⵍⴰⵀ ⴱⵍⵉⵍⵉⴹ ⵎⵓⵃⵎⵎⴰⴷ
ⴰⴽⵓⵏⴰⴹ, ⵉⵏⵢⴰⵍⴽⴰⵎ ⵉⵍⵎⵎⴰ ⵓⵏⵖⵎⴰⵙ ⴰⵎⵣⴷⴰⵢ ⴷ ⵓⴽⵓⵏⴰⴹ, ⵉⵎⵛⴰⵛⴽⴰ ⴷ ⴷⵉⵙ ⵖⴼ ⵓⵙⴰⵢⵙ,
ⵉⵙⵎⵉⵇⵇⵉⵔⵜ ⴷ ⵓⵏⵎⵀⴰⵍ ⵏ ⵓⵏⵣⵡⴰⵢ ⵃⵎⴰⴷ ⴰⴱⵓⵏⴰⵚⵕ, ⵉⴷⴳⴳⵉ ⵜ. ⵉⴳⴰ ⵢⵉⵙⵎ "ⵜⴰⵡⵙⵙⵏⴰ ⴰⵔ
ⴰⴼⵔⴰⴽ" ⵉⵙⵎ ⴰⵎⵣⵡⴰⵔⵓ ⵉⵜⵜⵓⵙⵓⵎⵔⵏ ⵉ ⵓⵙⴰⵢⵙ ⵏⵖ "ⵜⴰⵡⵙⵙⵏⴰ ⵜⴰⵖⴰⵎⵜ ⵏ ⴽⵓⵢⴰⵏ", ⵎⴰⵛⵛ
ⴰⵎⵣⴷⴰⵢ ⵉⵙⵏⵢⵉⴼ "ⵜⴰⵡⵙⵙⵏⴰ ⵜⴰⵖⴰⵎⵜ ⵏ ⴽⵓⵢⴰⵏ".
ⵉⵏⵜⵉ ⵉⵍⵎⵎⴰ ⵓⵣⵎⵎⴻⵎ ⵏ
ⵜⵅⵕⵚⵉⵏ ⵏ ⵓⵙⴰⵢⵙ, ⴰⵔ ⵜⵣⵣⵔⴰⵢ ⵢⴰⵜ ⵜⵅⵕⵚⵜ ⵏ 15 ⵜⵓⵙⴷⵉⴷⵉⵏ ⴽⵔⴰⵢⴳⴰⵜ ⵉⵎⴰⵍⴰⵙⵙ, ⴰⵔ
ⴷⴳⵙ ⵉⵙⴰⵡⴰⵍ ⵓⵙⵍⵎⴰⴷ ⵎⵓⵃⵎⵎⴰⴷ ⴰⴽⵓⵏⴰⴹ ⵖⴼ ⵉⵙⵏⵜⴰⵍ ⵏ ⵜⵡⵙⵙⵏⴰ ⵜⴰⵎⴰⵜⴰⵢⵜ ⵙ ⵢⴰⵜ
ⵜⵎⴰⵣⵉⵖⵜ ⵉⵖⵓⵙⵏ. ⴰⵍⵍⵉⵖ ⵣⵔⵉⵏ ⵡⴰⵜⵜⴰⵢⵏ ⵏ ⵙⵉⵏ ⵉⵙⴳⴳⵯⵙⵏ ⵖⴼ ⵓⵙⵏⵜⵉ ⵏ ⵓⵙⴰⵢⵙ, ⴹⴰⵕⴰⵜ ⵏ
ⵢⵉⵏⴰⵡ ⵏ ⵓⴷⴰⴱⵓ ⴳ ⵓⵙⴳⴳⵯⴰⵙ 1994 ⵖⴼ ⵓⵙⵙⵉⴷⴼ ⵏ ⵜⵎⴰⵣⵉⵖⵜ ⵖⵔ ⵜⴱⴰⴷⵓⵜⵉⵏ ⵜⵉⵖⵎⵙⴰⵏⵉⵏ,
ⵉⵜⵜⵓⵙⵏⴼⵍ ⵢⵉⵙⵎ ⵏ ⵓⵙⴰⵢⵙ "ⵜⴰⵡⵙⵙⵏⴰ ⵜⴰⵖⴰⵎⵜ ⵏ ⴽⵓⵢⴰⵏ" ⵉⴳ "ⵜⴰⵡⵙⵙⵏⴰ ⵜⴰⵎⴰⵣⵉⵖⵜ",
ⴰⵔ ⵉⵣⵣⵔⴰⵢ ⴽⵔⴰⵢⴳⴰⵜ ⵉⵎⴰⵍⴰⵙⵙ ⴳ ⵓⵏⵣⵡⴰⵢ ⴰⵏⵎⵏⴰⴹ ⵏ ⵓⴳⴰⴷⵉⵔ, ⵢⵉⵍⵉ ⵡⴰⵍⵍⴰⵙ ⵏⵏⵙ ⴳ
ⵓⵏⵣⵡⴰⵢ ⴰⵏⴰⵎⵓⵔ ⵙ ⵜⵎⴰⵣⵉⵖⵜ ⴽⵔⴰⵢⴳⴰⵜ ⵉⵎⴰⵍⴰⵙⵙ ⴳ ⵢⵉⴹ. ⴳ ⵢⵉⵎⵉⵔ ⵏ ⵓⵏⴱⴷⵓ ⴰⵔ
ⵉⵜⵜⵏⴼⴰⵍ ⵢⵉⵙⵎ ⵏ ⵓⵙⴰⵢⵙ ⵉⴳ "ⵜⴰⵎⵉⵎⵜ ⵏ ⵓⵏⴱⴷⵓ", ⴰⵔ ⵜ ⵏⵉⵜ ⵉⵣⵣⵔⴰⵢ ⵓⵙⵍⵎⴰⴷ ⵎⵓⵃⵎⵎⴰⴷ
ⴰⴽⵓⵏⴰⴹ, ⴰⵔ ⵉⵍⵎⵎⴰ ⵉⵙⴱⵔⵔⴰⴽ ⵓⵙⴰⵢⵙ ⵉⵏⴱⴳⵉⵡⵏ, ⴰⵔ ⴷⵉⵙⵏ ⵉⵜⵜⵎⵙⴰⵡⴰⵍ ⵖⴼ ⵜⵎⵏⵜⵉⵍⵉⵏ ⵏ
ⵜⵡⵙⵙⵏⴰ. ⵖⵉⵍⴰ ⴰⵔ ⵉⵣⵣⵔⴰⵢ ⵓⵙⴰⵢⵙ ⴳ 25 ⵏ ⵜⵓⵙⴷⵉⴷⵉⵏ ⴽⵔⴰⵢⴳⴰⵜ ⵉⵎⴰⵍⴰⵙⵙ ⴳ ⵓⵏⵣⵡⴰⵢ
ⴰⵏⵎⵏⴰⴹ ⵏ ⵓⴳⴰⴷⵉⵔ ⵙ ⵢⵉⵙⵎ "ⵜⴰⵡⵙⵙⵏⴰ ⵜⴰⵎⴰⵣⵉⵖⵜ".
ⴳ ⵓⵙⴳⴳⵯⴰⵙ 1997, ⵢⵓⵎⵥ
ⵓⵙⴰⵢⵙ ⵜⴰⵙⵎⵖⵓⵔⵜ ⵏ ⵓⵙⴰⵢⵙ ⴰⵎⴰⵣⵉⵖ ⵢⵓⴼⵏ ⴳ ⵓⵙⵡⵉⵔ ⴰⵏⴰⵎⵓⵔ, ⵜⴰⵙⵎⵖⵓⵔⵜ ⵏⵏⴰ ⴳ ⴷⵔⵓⵏ
ⵜⵓⴳⵜⵜ ⵏ ⵉⵙⵓⵢⴰⵙ ⵏ ⵉⵏⵣⵡⴰⵢⵏ ⵉⵙⴳⴰⵡⴰⵏⵏ ⴷ ⵉⵏⴰⵎⵓⵔⵏ, ⴰⵢⵍⵍⵉ ⵢⵓⵊⵊⴰⵏ ⴰⵙⴰⵢⵙ ⴰⴷ ⵉⴷⴷⵓ ⵙ
ⴷⴰⵜ, ⵢⵉⵍⵉ ⴰⵣⵔⴰⴽ ⴷⴰⵔ ⵉⵎⴰⵙⴰⵢⵏ ⵏ ⵓⵏⵣⵡⴰⵢ ⴰⵏⵎⵏⴰⴹ ⵏ ⵓⴳⴰⴷⵉⵔ.
