ⵜⴰⵙⴰⵡⵔⵜ ⵏ ⵜⵉⵔⵔⴰ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ - ⴰⵏⴼⴰ 2025

ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵙⵙⵉⵡⵙ ⴳ ⵜⵓⵙⵙⵏⴰ ⵜⵉⵍⴻⵍⵍⵉⵜ ⴷ ⵓⵙⵎⴽⴽⵏ ⵏ ⵡⵓⴳⴳⵉⴷⵏ ⴳ ⵓⴷⵔⴰⵡ ⵉⵎⵔⵡⵉ ⴳ ⵓⵚⴽⴽⵓ ⵏ ⵓⵙⴰⵎⵓ ⵉⵍⴻⵍⵍⵉ, ⵜⵙⵏⵎⴰⵍⴰ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⵍⵎⵖⵔⵉⴱ ⵢⴰⵜ ⵜⵙⴰⵡⵔⵜ ⵜⴰⵎⵙⵉⵍⵖⵜ ⵅⴼ ⵖⴼ ⵜⵉⵔⵔⴰ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵓⵚⵉⴹⵢⴰⵙ 4 ⵎⴰⵢⵢⵓ 2025, ⴳ ⵓⵙⴰⵢⵔⴰⵔ ⵏ ⵙⴱⴱⴰⵢⵙ ⵜⵓ ⵡⵓⵔⴽ (Space to work) ⴳ ⵜⴳⵎⵎⵉ ⵜⵓⵎⵍⵉⵍⵜ. ⵜⵙⵎⵓⵏ ⵜⵙⴰⵡⵔⵜ ⵏⵏⴰ ⵢⵓⵎⵥⵏ ⴽⴽⵓⵥⵜ ⵜⵙⵔⴰⴳⵉⵏ 15 ⵏ ⵉⵎⴷⵔⴰⵡⵏ ⵙⴳ ⵉⵙⵎⵉⵍⵏ ⵉⵏⵡⵜⴰⵢⵏ ⵎⵣⴰⵔⴰⵢⵏⵉⵏ ⴷ ⵉⵎⵏⴰⴹⵏ ⵉⴽⴰⴷⵉⵎⵉⵜⵏ, ⵙ ⵓⵡⵜⵜⴰⵙ ⵏ ⵓⵙⴷⵓⵙ ⵏ ⵉⴼⵓⴽⵙⵏ ⵏⵏⵙⵏ ⴳ ⵓⵙⵏⵓⵍⴼⵓ ⴷ ⵜⵉⵔⵔⴰ ⵏ ⵉⵎⴳⵔⴰⴷⵏ ⴳ ⵜⵓⵏⵖⵉⵍⵜ ⵜⴰⵎⴰⵣⵉⵖⵜ ⵏ ⵡⵉⴽⵉⴱⵉⴷⵢⴰ.

ⵜⵕⵥⵎ ⵜⵙⴰⵡⵔⵜ ⵙ ⵢⴰⵜ ⵜⵉⵏⴰⵡⵜ ⵏ ⵓⵙⵏⵓⴱⴳ ⵙⴳ ⴷⴰⵔ ⵉⵎⵙⵙⵉⵍⵖⵏ, ⵏⵏⴰ ⵉⵙⴷⴷⵉⴷⵏ ⵅⴼ ⵡⴰⵜⵉⴳ ⵏ ⵡⵉⴽⵉⴱⵉⴷⵢⴰ ⴰⵎ ⵓⵙⴰⴳⵎ ⵏ ⵜⵓⵙⵙⵏⴰ ⴰⵎⴰⴹⵍⴰⵏ ⵉⵙⴰⴳⴰⵏ ⵉ ⴽⵓⵢⴰⵏ. ⵙⵙⵉⵙⴼⵉⵡⵏ ⵎⴰⵙ ⴷ ⴰⵡⵜⵜⴰⵙ ⵙⴳ ⵜⵙⴰⵡⵔⵜ ⴰⴷ ⵉⴳⴰ ⵜ ⴰⴷ ⵎⴽⴽⵏⵏ ⵉⵎⴷⵔⴰⵡⵏ ⴳ ⵓⵔⵎⴰⵙ ⵏ ⵜⴱⵔⵉⴷⵉⵏ ⵏ ⵜⵉⵔⵔⴰ, ⴷ ⴰⴷ ⴰⵙⵏ ⵜⵜⵓⴼⴽⴰⵏ ⵉⵎⴰⵙⵙⵏ ⵏⵏⴰ ⵙⵖⴰⵡⵙⴰⵏ ⵉ ⵓⵙⵙⴱⵖⵔ ⵏ ⵜⵓⵎⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⵙⵓⵍⵏ ⵜⴷⵔⵓⵙ ⵙ ⵓⵣⵎⵣⴰⵣⴰⵍ ⴷ ⵜⵓⵏⵖⵉⵍⵉⵏ ⵢⴰⴹⵏⵉⵏ ⵏ ⵡⵉⴽⵉⴱⵉⴷⵢⴰ. ⵙⵙⴽⵜⵉⵏ ⴷ ⵎⴰⵙ ⵓⵔ ⵜⵣⵔⵉ ⵜⵓⵎⴰⵢⵜ ⵜⴰⵎⴰⵣⵉⵖⵜ ⴳ ⵡⵉⴽⵉⴱⵉⴷⵢⴰ 12 ⵡⴰⴼⴹⴰⵏ ⵏ ⵉⵎⴳⵔⴰⴷⵏ, ⵎⴳⴰⵍ ⵓⴳⴳⴰⵔ ⵏ 6 ⵉⴷ ⵎⵍⵢⵓⵏ ⵏ ⵉⵎⴳⵔⴰⴷⵏ ⴳ ⵜⵓⵏⵖⵉⵍⵜ ⵜⴰⵏⴳⵍⵉⵣⵜ, ⴰⵢⵏⵏⴰ ⵉⵙⵙⵓⵎⴰⵏⵏ ⴰⵙⵙⴰⵔ ⵉ ⵓⵙⴷⵓⵙ ⵏ ⵜⵓⵎⵓⵜⵉⵏ ⵙ ⵜⵎⵣⵉⵖⵜ.

ⵜⴱⴹⴰ ⵜⵙⴰⵡⵔⵜ ⵖⴼ ⵙⵉⵏ ⵉⵙⴳⵓⵎⵏ ⵉⴷⵙⵍⴰⵏⵏ, ⵜⵙⵎⵓⵏ ⴳⵔ ⵉⵙⴽⴰⵏⵏ ⵉⵎⵉⵣⵕⵏ ⴷ ⵜⵡⵓⵔⵉ ⵜⵓⵙⵏⵉⵏ.

ⴳ ⵓⵙⴳⵓⵎ ⴰⵎⵣⵡⴰⵔⵓ, ⴼⴽⴰⵏ ⵉⵎⵙⵙⵉⵍⵖⵏ ⴱⵕⴰⵀⵉⵎ ⵙⵙⵄⵉⴷⵉ ⴷ ⵍⵃⵓⵙⴰⵢⵏ ⴱⴰⵏⵜⴰⵢⴼⴰⵙⵜ, ⵉⵎⴰⵔⴰⵜⵏ ⴷ ⵉⵎⵙⵙⵓⴳⵓⵔⵏ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ, ⵢⴰⵏ ⵓⵙⵙⴼⵔⵓ ⵉⴼⵔⵓⵔⵉⵏ ⵅⴼ ⵡⵉⴽⵉⴱⵉⴷⵢⴰ ⴷ ⵙⵎⵎⵓⵙⵜ ⵜⵉⵔⵙⴰⵍ ⵏⵏⵙ ⵜⵉⴷⵙⵍⴰⵏⵉⵏ, ⴷ ⵜⵙⵔⵜⵉⵜⵉⵏ ⵏ ⵜⵉⵔⵔⴰ ⵣⵓⵏ ⴷ ⵜⴰⵔⴰⵡⵙⴰⵏⵜ ⴷ ⵜⵥⴹⴰⵕⵜ ⵏ ⵓⵃⵇⵇⴰ ⴷ ⵡⴰⵔ ⴰⴷⴳⴳⵉ ⵏ ⵉⵔⵣⵣⵓⵜⵏ ⵉⵏⵚⵍⵉⵢⵏ ⴷ ⵡⴰⵜⵉⴳ ⵏ ⵜⵉⴽⴽⵉ ⵏ ⵉⵙⵓⴳⴰⵎ ⴷⵓⵙⵏⵉⵏ ⵉ ⵓⴹⴽⴰⵍ ⵏ ⵓⵖⵓⴷⵓ ⵏ ⵉⵎⴳⵔⴰⴷⵏ. ⵙⵙⵉⵙⴼⵉⵡⵏ ⴰⵡⴷ ⵜⴰⵎⴰⵎⴽⵜ ⵏ ⵓⵙⵏⵓⵍⴼⵓ ⵏ ⴽⵔⴰ ⵏ ⵓⵎⴳⵔⴰⴷ ⴰⵎⴰⵢⵏⵓ ⴷ ⵓⵙⴼⴰⵍⴽⵉ ⵏⵏⵙ, ⴷ ⵓⵔⵏⵏⵓ ⵏ ⵉⵙⵖⵓⵏⵏ ⵉⴳⵏⵙⴰⵏⵏ ⴷ ⵉⴱⵕⵕⴰⵏⵉⵢⵏ ⴷ ⵜⵡⵍⴰⴼⵉⵏ, ⴷ ⵓⵙⵏⵓⵍⴼⵓ ⵏ ⵜⴼⵍⵡⵉⵏ ⴷ ⵜⴼⵍⵓⵖⵎⵉⵙⵉⵏ. ⵙⵙⴷⵓⵙⵏ ⵓⵢⴰ ⵙ ⵉⵎⴷⵢⴰⵜⵏ ⵏ ⵉⵎⴳⵔⴰⴷⵏ ⵖⵓⴷⴰⵏⵉⵏ ⴳ ⵡⵉⴽⵉⴱⵉⴷⵢⴰ.

ⴳ ⵓⵙⴳⵓⵎ ⵡⵉⵙ ⵙⵉⵏ, ⵎⵎⵓⵜⵜⵉⵏ ⵉⵎⴷⵔⴰⵡⵏ ⵖⵔ ⵓⵙⵉⵍⵖ ⵓⵙⵏⵉⵙ ⵖⴼ ⵜⵉⵔⵔⴰ, ⵉⴷⴷⵖ ⵉⵙⵏⵓⵍⴼⴰ ⴽⵓ ⴰⵎⴷⵔⴰⵡ ⴰⵎⵉⴹⴰⵏ ⵏⵏⵙ ⵉⵥⵍⵉⵏ ⴳ ⵡⵉⴽⵉⴱⵉⴷⵢⴰ. ⵎⴽⵍⵍⵉ ⵢⵓⵎⴰ ⵓⵙⴳⵓⵎ ⵉⵍⴰⵖⵎⵓⵜⵏ ⵓⵙⵏⵉⵙⵏ ⵖⴼ ⵓⵙⴼⴰⵍⴽⵉ ⵏ ⵉⴹⵕⵉⵚⵏ, ⴷ ⵓⵔⵏⵏⵓ ⵏ ⵉⵙⵖⵓⵏⵏ ⵉⴳⵏⵙⴰⵏⵏ ⴷ ⵉⴱⵕⵕⴰⵏⵉⵢⵏ, ⴷ ⵓⵙⵏⵓⵍⴼⵓ ⵏ ⵜⴼⵍⵡⵉⵏ ⴷ ⵜⴼⵍⵓⵖⵎⵉⵙⵉⵏ. ⵉⵜⵜⵓⴼⴽ ⵉⵍⵎⵎⴰ ⵓⵣⵎⵣ ⵉ ⵉⵎⴷⵔⴰⵡⵏ ⴰⴷ ⴰⵔⵎⵏ ⵜⵉⵔⵔⴰ ⵏ ⵉⵎⴳⵔⴰⴷⵏ ⵅⴼ ⵉⵙⵏⴰⵍ ⵉⴷⵖⴰⵔⴰⵏⵏ.

ⵙⵙⵓⴳⴳⴰⵏ ⴷ ⵉⵎⴷⵔⴰⵡⵏ ⵢⴰⵏ ⵡⴰⵚⵚⴰⴱ ⴰⵎⵇⵔⴰⵏ ⴳ ⵜⵙⴰⵡⵔⵜ, ⵉⴷⴷⵖ ⵏⵏⴰⵏ ⵜⵓⴳⵜⵜ ⵏⵏⵙⵏ ⵎⴰⵙ ⵔⴰⵏ ⴰⴷ ⴹⴼⵕⵏ ⴰⴱⵔⵉⴷ ⵏ ⵜⵉⵔⵔⴰ ⴳ ⵜⴳⵉⵔⴰ ⵏ ⵜⵙⴰⵡⵔⵜ.

ⴳ ⵜⴳⵉⵔⴰ ⵏ ⵜⵙⴰⵡⵔⵜ, ⵉⵙⴽⵔ ⵕⴰⵛⵉⴷ ⵓⵔⵇⵢⵢⴰ, ⴰⴳⵎⴰⵎ ⴰⵏⵔⵎⴰⴷ ⴳ ⵜⵔⴰⴱⴱⵓⵜ ⵏ ⵉⵏⵙⵙⵎⵔⵙⵏ ⵏ ⵡⵉⴽⵉⵎⵉⴷⵢⴰ ⵍⵎⵖⵔⵉⴱ, ⴽⵔⴰ ⵏ ⵉⵙⵏⵎⴽⵜⴰⵜⵏ ⵏⵏⴰ ⴷ ⵉⵙⵙⵓⵎⴰⵏⵏ ⵎⴰⵙ ⵙⵏⵓⵍⴼⴰⵏ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ ⵙⵉⵏ ⴷ ⵎⵔⴰⵡ ⵏ ⵉⵎⴳⵔⴰⴷⵏ ⵉⵎⴰⵢⵏⵓⵜⵏ, ⵙⵖⵓⴷⵓⵏ ⵙⵎⵎⵓⵙ ⴷ ⵎⵔⴰⵡ ⵏ ⵉⵎⴳⵔⴰⴷⵏ ⵏⵏⴰ ⵢⴰⴷ ⵍⵍⴰⵏⵉⵏ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ, ⵜⵓⴳⵜ ⵏⵏⵙⵏ ⵣⴷⵉⵏ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ. ⵜⴻⵜⵜⵓⵙⴽⴰⵔⵜ ⵢⴰⵜ ⵜⵔⴰⴱⴱⵓⵜ ⵏ ⵓⵏⵢⴰⵍⴽⴰⵎ ⴳ ⵓⵥⵟⵟⴰ ⵏ ⵓⵎⵙⴰⵡⴰⴹ ⴰⵏⴰⵎⵓⵏ ⵉ ⵓⴹⴼⵓⵕ ⵏ ⵜⵡⴰⴷⴰ ⵏ ⵉⵎⴷⵔⴰⵡⵏ ⴷ ⵡⴰⵏⵏⴰⵍ ⵏⵏⵙⵏ ⴳ ⵓⴱⵔⵉⴷ ⵏ ⵜⵉⵔⵔⴰ.

ⵜⵎⴷⴰ ⵜⵙⴰⵡⵔⵜ ⵙ ⵜⵉⴽⴽⵉ ⵏ ⵉⵙⵍⴽⵉⵏⵏ ⵏ ⵓⴷⵔⴰⵡ ⵉ ⵉⵎⴷⵔⴰⵡⵏ, ⵉⵜⵜⵓⴼⴽ ⴰⵙⵏ ⵓⵏⵎⵓⵇⵇⴰⵔ ⴳ ⵜⵙⴰⵡⵔⵉⵏ ⵢⴰⴹⵏⵉⵏ ⴳ ⵉⵢⵢⵉⵔⵏ ⴷ ⵉⴷⴷⴰⵏ. ⵜⵙⵙⵓⵜⵔ ⵜⵔⴰⴱⴱⵓⵜ ⵏ ⵓⵙⵓⴷⵙ ⴰⴷ ⵢⵉⵍⵉ ⵓⵎⵢⴰⵡⴰⵙ ⴷ ⵓⵎⵙⴰⵡⴰⴹ ⴳⵔ ⵜⵎⴷⵔⴰⵡⵉⵏ ⴷ ⵉⵎⴷⵔⴰⵡⵏ ⴰⴼⴰⴷ ⴰⴷ ⵜⵣⵣⵓⴳⴰⵣ ⵜⵡⵉⵣⵉ ⵅⴼ ⵜⵉⵔⵔⴰ ⴳ ⵡⵉⴽⵉⴱⵉⴷⵢⴰ, ⵜⵙⴷⵉⴽⵏ ⵎⴰⵙ ⴷ ⴽⵓ ⴰⵎⴳⵔⴰⴷ ⵉⵜⵜⵢⴰⵔⴰⵏ ⵉⴳⴰ ⵢⴰⵜ ⵜⵎⵇⵇⵉⵜ ⴳ ⵢⵉⵍⵍ ⵏ ⵜⵓⵙⵙⵏⴰ ⵙ ⵜⵎⴰⵣⵉⵖⵜ.

ⵜⴳ ⵜⵙⴰⵡⵔⵜ ⴰⴷ ⵉⵎⵉⴽⴽ ⵙⴳ ⵜⵓⴳⴳⴰⵙ ⵙⵓⵍⵏⵉⵏ ⴰⴼⴰⴷ ⴰⴷ ⵜⵉⵍⵉ ⵜⵓⵙⵙⵏⴰ ⵙ ⵜⵎⴰⵣⵉⵖⵜ ⴳ ⵓⵎⴰⴹⴰⵍ ⴰⵎⵓⵟⵟⵓⵏ, ⴷ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵡⵉⴽⵉⴱⵉⴷⵢⴰ ⵏⵏⴰ ⵉⴳⴰⵏ ⵢⴰⵏ ⵓⵙⵉⵜ ⴰⵅⴰⵜⴰⵔ ⴳ ⵓⵎⴰⴹⴰⵍ. ⵙ ⵜⵓⴳⵜ ⵏ ⵜⵙⵏⵜⴰⵢⵉⵏ ⵣⵓⵏ ⴷ ⵜⴰ, ⵔⴰⴷ ⵉⴼⴰⵍⴽⵉ ⵉⵎⴰⵍ ⵏ ⵜⵓⵎⴰⵢⵜ ⵜⴰⵎⴰⵣⵉⵖⵜ ⴳ ⵡⵉⴽⵉⴱⵉⴷⵢⴰ ⴷ ⵡⴰⵏⵜⵉⵔⵏⵉⵜ ⵙ ⵓⵎⴰⵜⴰ.