ⵎⵓⵃⵎⵎⴰⴷ ⵓⵙⵓⵙ

 

ⵉⵍⵓⵍ ⵎⴰⵙⵙ ⵎⵓⵃⵎⵎⴰⴷ ⵓⵙⵓⵙ ⴳ ⵎⵎⵓ ⵓⴳⴰⴷⵉⵔ/ⵎⵓⴳⴰⴷⵓⵔ/ⵜⴰⵚⵚⵓⵕⵜ ⴳ ⵓⵙⴳⴳⵯⴰⵙ ⵏ 1968, ⵉⴳⴰ ⴰⵎⵙⴷⵍⵙⴰ ⵉⵏⵏⵣⴳⵎⵏ ⵙ ⵜⵓⴳⵜ ⵏ ⵉⴳⵔⴰⵏ, ⵉⵙⵎⵓⵏ ⵏⴳⵔ ⵓⵙⵙⵍⵎⴷ ⴷ ⵜⵡⵉⵙⵉ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⴼⵍⵓⵍ.

ⵉⴳⴰ ⴰⵎⵙⴽⴰⵔ ⴳ ⵜⵓⴳⵜ ⵏ ⵜⵎⵙⵎⵓⵏⵉⵏ ⵏ ⵜⵓⵖⵔⵉⵎⵉⵏ ⵙⵍⴰⵡⴰⵏ ⴰⴽⴽⵯ ⵜⵉⵍⵍⵉ ⵏⵏⵣⴳⵎⵏⵉⵏ ⵙ ⵜⵙⴽⵍⴰ ⴷ ⵜⴷⵍⵙⴰ ⵜⴰⵎⴰⵣⵉⵖⵜ. ⵉⵙⵙⵓⵡⵔⵉ ⵓⵍⴰ ⴳ ⵜⵓⴳⵜ ⵏ ⵉⴳⵔⴰⵏ ⵣⵓⵏ ⴷ ⵜⵓⵜⵍⴰⵢⵜ ⴷ ⵜⴷⵍⵙⴰ, ⵜⴰⵙⵓⵙⵢⵓⵍⵓⵊⵉⵜ ⴷ ⵜⴰⵏⵜⵕⵓⴱⴱⵓⵍⵓⵊⵉⵜ. ⴰⵔ ⵜⵜ ⴱⴰⵀⵔⴰ ⵉⵜⵜⴰⵡⵉ ⴳ ⵓⵙⵖⴰⵏ ⴷ ⵓⵙⵡⵉⵏⴳⵎ ⴰⵎⵉⵜⵓⵍⵓⵊⵉ ⴰⵎⵕⵕⵓⴽⵉ.

ⵜⵙⵙⵓⴼⵖ ⴰⵙ ⴷ ⵜⵎⵔⵙⵍⵜ ⵜⴰⴷⵍⵙⴰⵏⵜ ⵏ ⵜⴰⵡⴰⵍⵜ ⴳ ⵓⵙⴳⴳⵯⴰⵙ ⵏ 2007 ⵢⴰⵏ ⵓⵎⴰⵡⴰⵏ ⵙ ⵓⵣⵡⵍ "ⴰⵎⴰⵡⴰⵍ ⵏ ⵉⵎⵓⴷⴰⵔ"

ⴳ ⵓⵙⴳⴳⵯⴰⵙ ⵏ 2008 ⵉⵙⵙⵓⴼⵖ ⴰⵙ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙⵉⵏ ⵉⴷⵍⵉⵙⵏ ⵉⵎⴰⵙⵙⴰⵏ ⴳ ⵓⵙⵡⵉⵏⴳⵎ ⴰⵎⵉⵜⵓⵍⵓⵊⵉ ⵏ ⵉⵎⴰⵣⵉⵖⵏ, دراسات في الفكر الميثي الأمازيغي (ⵜⵉⵣⵔⴰⵡⵉⵏ ⴳ ⵓⵙⵡⵉⵏⴳⵎ ⴰⵎⵉⵜⵓⵍⵓⵊⵉ ⴰⵎⴰⵣⵉⵖ) ⴷ كوكرا في الميثولوجيا الامازيغية (ⴽⵓⴽⵔⴰ ⴳ ⵜⵎⵉⵜⵓⵍⵓⵊⵉⵜ ⵜⴰⵎⴰⵣⵉⵖⵜ).

ⵉⴽⵍⵍⵉ ⴷⴰⵔⵙ ⴳ ⵓⵙⵓⵖⵍ ⴰⵡⵉⴳⵉⵎ ⴷ ⵓⴷⵍⵙⴰⵏ ⵍⵍⵉⵖ ⵉⵙⵓⵖⵍ ⴰⴷⵍⵉⵙ ⵏ ⵓⵎⴰⵔⴰ ⵊⴱⵕⴰⵏ ⵅⴰⵍⵉⵍ ⵊⴱⵕⴰⵏ ⵍⵍⵉ ⵉⵍⴰⵏ ⵙ ⵓⵣⵡⵍ "ⵉⵙⵔ" ⵙ ⵜⵎⴰⵣⵉⵖⵜ ⵜⵙⵙⵓⴼⵖ ⴰⵙ ⵜ ⵉⴷ ⵜⵉⵔⵔⴰ ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2014, ⵉⵙⵓⵖⵍ ⵙ ⵜⴷⵔⴰⵡⵜ ⴷ ⵎⴰⵙⵙ ⵎⵓⵃⵎⵎⴰⴷ ⴰⴽⵓⵏⴰⴹ ⵓⵏⴳⴰⵍ "ⴰⵖⵢⵓⵍ ⵏ ⵡⵓⵔⵖ" ⵏ ⵓⵎⴰⵔⴰ ⴰⴱⴱⵓⵍⵢⵓⵙ/ⴰⴼⵓⵍⴰⵢ.

ⴳ ⵢⵉⴳⵔ ⵏ ⵜⵖⵓⵔⵉⵡⵉⵏ ⵜⵉⵙⴽⵍⴰⵏⵉⵏ ⴷ ⵓⴼⵔⴰⵏ, ⵢⵓⵔⴰ ⵜⵓⴳⵜ ⵏ ⵉⵎⴰⴳⵔⴰⴷⵏ ⵅⴼ ⵜⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ ⵉⵙⵙⵓⴼⵖ ⵜⵓⴳⵜ ⴳⵉⵙⵏ ⴳ ⵜⵙⵖⵓⵏⵉⵏ ⵜⵉⵎⴰⵙⵙⴰⵏⵉⵏ ⴷ ⴰⵔ ⴱⴷⴷⴰ ⵉⵜⵜⴰⵡⵙ ⴳ ⵉⵏⵎⵓⵇⵇⴰⵔⵏ ⵉⴷⵍⵙⴰⵏⵏ. ⵏⵜⵜⴰ ⴰⴷ ⴰⴽⴽⵯ ⵢⵓⵔⴰⵏ ⵜⵓⴳⵜ ⵏ ⵜⵣⵡⵓⵔⵉⵏ ⵉ ⵜⵡⵛⴽⵉⵏⵉⵏ ⵏ ⵜⵎⴷⵢⴰⵣⵉⵏ ⵜⵉⵎⴰⵣⵉⵖⵉⵏ ⵜⵉⵜⵔⴰⵔⵉⵏ ⵍⵍⵉ ⴼⵙⵔⵏ ⵉⵎⴷⵢⴰⵣⵏ ⵏ ⵉⴼⴼⵓⵙ.

ⵉⴼⴼⵓⵖ ⴰⵙ ⴷ ⵢⴰⵏ ⵓⴷⵍⵉⵙ ⵙ ⵓⵣⵡⵍ "في رحاب الأنكال" ⵉⴳⴰ ⵜⵉⵖⵓⵔⵉⵣⵉⵏ ⴳ ⵡⵓⵏⴳⴰⵍ ⴰⵎⴰⵣⵉⵖ ⴳ ⵢⵉⴼⴼⵓⵙ, ⵜⵙⵙⵓⴼⵖ ⵜ ⵉⴷ ⵜⵣⵍⵖⴰ ⵏ ⵜⵉⵔⵔⴰ ⴳ ⵓⵙⴳⴳⵯⴰⵙ 2022.

ⵓⵔ ⵜⵜ ⵢⵉⵡⵉ ⵎⵓⵃⵎⵎⴰⴷ ⵓⵙⵓⵙ ⵖⴰⵙ ⴳ ⵓⵔⵣⵣⵓ ⴰⴷⵍⵙⴰⵏ, ⵓⵔ ⵉⵥⴹⴰⵕ ⵓⵎⵔⵣⵓ ⴰⴷ ⵏⵏ ⴳⵉⵙ ⵉⵃⴹⵓ ⴰⵎⵙⵏⴼⵍⵓⵍ ⵍⵍⵉⵖ ⵢⵓⵔⴰ ⵙ ⵜⵉⵔⴳⵉⵜ ⵏ ⵓⵙⵏⴼⵍⵓⵍ ⴳ ⵎⵏⵏⴰⵡ ⵉⴳⵔⴰⵏ.

ⵢⵓⵔⴰ ⴳ ⵜⵎⴷⵢⴰⵣⵜ ⵜⵉⵔⵎⵉⵜ ⵏⵏⵙ ⵜⴰⵎⵣⵡⴰⵔⵓⵜ ⵍⵍⵉ ⵎⵓ ⵉⴳⴰ ⵙ ⵓⵣⵡⵍ "ⵜⴰⴳⵍⵉⴷⵜ ⵏ ⵜⵉⴳⴳⴰⵙ" ⴳ ⵓⵙⴳⴳⵯⴰⵙ ⵏ 2009, ⵢⴰⵔⴰ ⵜⴰⵡⵛⴽⵉⵏⵜ ⵏⵏⵙ ⵜⵉⵙ ⵙⵏⴰⵜ ⵙ ⵜⴷⵔⴰⵡⵜ ⴷ ⵎⴰⵙⵙ ⵄⴰⴱⴷⵓⵍⵍⴰⵀ ⵍⵎⵏⵏⴰⵏⵉ ⵙ ⵓⵣⵡⵍ "ⵜⵉⵎⵇⵇⴰ ⵏ ⴼⴰⴷ" ⴳ ⵓⵙⴳⴳⵯⴰⵙ ⵏ 2011.

ⴳ ⵜⵓⵍⵍⵉⵙⵜ, ⵢⵓⵔⴰ ⵎⵓⵃⵎⵎⴰⴷ ⵓⵙⵓⵙ ⴽⵕⴰⴹⵜ ⵜⵡⵛⴽⵉⵏⵉⵏ ⵏ ⵜⵓⵍⵍⵉⵙⵉⵏ, ⵜⴰⵎⵣⵡⴰⵔⵓⵜ ⴳ ⵓⵙⴳⴳⵯⴰⵙ ⵏ 2009 ⵙ ⵓⵣⵡⵍ "ⴰⵢⵜ ⵉⵇⵊⴷⵔ ⴷ ⵓⵅⵙⴰⵢ", ⵜⵉⵙ ⵙⵏⴰⵜ ⵙ ⵓⵣⵡⵍ "ⴰⴷⵔⵏⵉⵇ ⵏ ⵡⴰⵢⵢⵓⵔ" ⴳ ⵓⵙⴳⴳⵯⴰⵙ ⵏ 2012, ⵜⵉⵙ ⴽⵕⴰⴹⵜ ⵙ ⵓⵣⵡⵍ "ⵜⵓⴳⴰ ⵉⵙⵎⵖⵉ ⵓⵥⴰⵡⴰⴹ" ⴳ ⵓⵙⴳⴳⵯⴰⵙ 2016.

ⴳ ⵓⵏⴳⴰⵍ, ⵢⵓⵔⴰ ⵓⵙⵓⵙ ⴽⴽⵓⵥ ⵉⴷⵍⵉⵙⵏ, ⴰⵎⵣⵡⴰⵔⵓ ⵢⵓⵔⴰ ⵜ ⴳ ⵓⵙⴳⴳⵯⴰⵙ ⵏ 2019 ⵙ ⵓⵣⵡⵍ "ⵉⵏⴰⴽⵓⴼⵏ".

ⴳ ⵓⵙⴳⴳⵯⴰⵙ ⵏ 2020, ⵉⵙⵙⵓⴼⵖ ⴷ ⵙⵉⵏ ⵡⵓⵏⴳⴰⵍⵏ "ⵜⴰⴹⵓⵕⵉ" ⴷ "ⵛⵎⵃⴹⵉⴹ ⴳⵔ ⵓⵣⵓⴽⵯⵏⵏⵉ ⴷ ⵓⵍⴷⵓⵏ”, ⵓⵏⴳⴰⵍ ⵏⵏⵙ ⵡⵉⵙ ⴽⴽⵓⵥ ⵉⴳⴰ ⴰⵙ ⵙ ⵓⵣⵡⵍ "ⵉⵅⴼ ⵏ ⵡⴰⵡⵡⵓⴽ", ⵉⴼⴼⵓⵖ ⴷ ⴳ ⵓⵙⴳⴳⵯⴰⵙ 2022.

ⴰⵔ ⵉⵜⵜⴰⵔⴰ ⵓⵙⵓⵙ ⵓⵍⴰ ⵉⵎⴰⴳⴰⵔⴰⴷⵏ ⵉⴷⵍⵙⴰⵏⵏ ⴷ ⵉⴼⵍⵙⴰⴼⵏ ⵙ ⵜⵎⴰⵣⵉⵖⵜ, ⵉⴼⴼⵖ ⴰⵙ ⴷ ⵓⴷⵍⵉⵙ ⵉⵙⵎⵓⵏⵜⵏ ⴳⵉⵙ ⵙ ⵓⵣⵡⵍ "ⵉⵅⴼⴰⵡⵏ ⴷ ⵉⵙⴰⵙⴰⵏ"

ⵉⴳⴰ ⵎⵓⵃⵎⵎⴰⴷ ⵓⵙⵓⵙ ⴳ ⵉⵎⵙⵏⴼⵍⵓⵍⵏ ⵉⵜⵔⴰⵔⵏ ⵍⵍⵉ ⵎⵎⴰⵖⵏⵉⵏ ⴰⴷ ⵙⴽⵓⵏ ⴰⵖⴰⵔⴰⵙ ⵏⵏⵙⵏ ⴳ ⵜⵙⴽⵍⴰ ⵜⴰⵎⴰⵣⵉⵖⵜ.

✎ ⵃⵎⵣⴰ ⴳⴳⵓⵍⵃⵢⴰⵏ